ايماقتار • 22 قاڭتار، 2020

«ورلەۋ» ماماندارى ەرىكتىلەر جۇمىسىن باستادى

10 رەتكورسەتىلدى

ۆولونتەرلەر جىلى ينستيتۋت ترەنەرلەرى ءۇشىن لاتىن گرافيكاسىنا قاتىستى تاقىرىپپەن بايلانىستى باستالدى. «ورلەۋ» باۇو» اق الماتى فيليالىنىڭ اعا وقىتۋشىلارى جانار يبراەۆا، اقبوتا قوڭىروۆا ەرىكتى رەتىندە №126 مامانداندىرىلعان ليتسەي مۇعالىمدەرىنە لاتىن گرافيكاسىنا كوشۋدىڭ ماسەلەلەرىنە قاتىستى پىكىرتالاس الاڭىن ۇيىمداستىردى. ورلەۋلىك ۆولونتەرلەر ۇيىمداستىرعان العاشقى پىكىرتالاس الاڭىنا ليتسەي ديرەكتورى مىرزاحان تولەنديەۆ باستاعان مەكتەپ ۇجىمى قاتىستى.

لاتىن الىپبيىنە قاتىستى سان-ءتۇرلى ساۋالدار مەن وزەكتى ماسەلەلەردى وي-تالقىسىنان وتكىزىپ، ۇلت ءتىلى ءۇشىن لاتىن گرافيكاسىنىڭ قانشالىقتى ماڭىزدىلىعىن ناسيحاتتاۋ ماقساتىندا كەلگەن ينستيتۋتتىڭ ەرىكتى وكىلدەرى ۇتىمدى پىكىر، ءتيىمدى ۇسىنىستارىمەن ءبولىستى. فيلولوگيا عىلىمدارىنىڭ كانديداتى، ينستيتۋت ترەنەرى اقبوتا قوڭىروۆا دۇنيە جۇزىندە 6،5 مىڭعا جۋىق ءتىل بار، سونىڭ ىشىندە نەبارى 200-دەي ءتىلدىڭ مەملەكەتتىك ءتىل دارەجەسىنە يە ەكەندىگىن اتاپ ءوتتى. سونىمەن قاتار اقبوتا تۇراعۇلقىزى انا ءتىلىمىزدىڭ مەملەكەتتىك ءتىل ەكەندىگىن ماقتان تۇتا وتىرىپ، ونىڭ ومىرشەڭدىگىن قامتاماسىز ەتەتىن جولدا تاباندىلىق تانىتۋعا شاقىردى.

پىكىرتالاس الاڭىنا قاتىسۋشىلار تاراپىنان ءارتۇرلى پىكىرلەر ايتىلىپ، ساۋالدار قويىلدى. «لاتىن گرافيكاسىنا كوشۋدىڭ قاجەتى جوق، ول وقۋشىنىڭ ءبىلىم الۋىنا تەجەۋ بولادى، تاريحىمىزدا قانشا رەت قارىپ اۋىستى...» دەگەن پىكىرلەر سوڭى، «لاتىن قارپى بىزگە جات ەمەس. لاتىن گرافيكاسى ەلىمىزدىڭ الەمدىك ءبىلىم كەڭىستىگىندە زامان تالابىنا ساي دامۋىنا جول اشادى» دەگەن ۇسىنىس-پىكىرلەرمەن جالعاسىن تاۋىپ، ليتسەي ديرەكتورى ينستيتۋت باسشىلىعى مەن ەرىكتىلەرگە العىس ءبىلدىرىپ، ىزگى باستاماعا ساتتىلىك تىلەدى.

ينستيتۋت ترەنەرلەرى لاتىن گرافيكاسى بويىنشا ەرىكتىلەر جۇمىسىن الماتى قالاسىنداعى مەكتەپتەردە ودان ءارى جالعاستىراتىن بولادى.

سوڭعى جاڭالىقتار

ۇقساس جاڭالىقتار