ايماقتار • 22 قاڭتار، 2020

كوكشەتاۋداعى قوپا كولى تازارتىلادى

35 رەتكورسەتىلدى

قوپا كولىنىڭ تازارۋى قىلشاقتى وزەنىندەگى ەكولوگيالىق جاعدايعا تاۋەلدى. ماماندار وزەن ارناسىن سۋ استى وسىمدىكتەرىنەن تازارتۋعا ۇلكەن كوڭىل ءبولىپ وتىر.

الداعى ءبىر اي بويى تابيعات قورعاۋشىلار مۇز ۇستىندەگى قامىستى ورىپ، قالا سىرتىندا شىعارماق. بۇل شارا سۋ ايدىنىنىڭ تازارۋىنا مۇمكىندىك بەرىپ، شاھاردىڭ شىرايىنا ۇلەس قوسپاق.

قوپانى جاعالاي وسكەن قامىستىڭ ۇزىندىعى ادام بويىمەن بىردەي. كول جاعالاي بىتكەن قامىستىڭ زيانى دا بار ەكەن. ماماندار سۋ ايدىنىنداعى قامىس مولشەرى جاعالاۋ اۋماعىنىڭ 18 پروتسەنتىنەن اسپاۋى كەرەك دەسەدى.

قامىستىڭ شامادان تىس كوپ بولۋى كول تۇبىنە لايدىڭ  تۇنۋىنا اكەلەدى. قالانى قاق جارىپ اعاتىن قىلشاقتى وزەنىنىڭ كەي تۇسىندا قالىڭ قامىستان سۋ بەتى كورىنبەيدى. ماماندار وزەن ارناسىن تازارتۋ ارقىلى قوپا كولىن قالىپقا كەلتىرۋدى كوزدەپ وتىر.     

–قازىر وزەن ساعاسىن قامىستان تازالاۋ جۇمىستارى باستالىپ كەتتى. بارلىعى 5 شاقىرىمدى قۇرايتىن  اۋماق. بۇل جۇمىس مەليوراتسيانى جانە سۋ تاسقىنىنا قارسى ارەكەتتى دە قامتيدى. سوڭعى ەكى جىلدا وبلىستىق تابيعي رەسۋرستار باسقارماسى قوپا كولىن بيولوگيالىق تاسىلمەن، ياعني شوپقورەكتى بالىق جىبەرۋ ارقىلى تازارتۋدى جۇزەگە اسىرىپ كەلەدى. وسى ۋاقىت ارالىعىندا 40 مىڭنان استام شاباق سۋ ايدىنىنا جىبەرىلدى. زەرتحانالىق تاجىريبەلەر سۋ ايدىنى ەداۋىر تازارعانىن كورسەتىپ وتىر. جاعالاۋداعى قامىستى ورۋ ارقىلى ءبىز قوپا مەن قىلشاقتىداعى بالدىر مەن لايدىڭ ازايۋىنا ىقپال ەتۋدى كوزدەپ وتىرمىز، دەيدى وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسى جەتەكشىسىنىڭ ورىنباسارى بولات توقىشەۆ.  

وسى باستامانى ءارى قاراي وڭىردەگى بارلىق مەكەمەلەر جالعاستىرماق نيەتتە. قازىر قوپا كولىندەگى وتتەگى مولشەرى 7-دەن 8،5 پايىزعا كوتەرىلدى. بۇل كول اكۆاتورياسىنىڭ تازارا باستاعانىن بىلدىرەدى. تيىسىنشە، جاعالاۋدا دەمالۋشىلار سانى دا ارتقان. تابيعات قورعاۋشىلار الداعى جاز ايلارىندا قامىستى ارنايى قۇرىلعىنىڭ كومەگىمەن تاعى ءبىر رەت ورىپ شىقپاق.

سوڭعى جاڭالىقتار

ۇقساس جاڭالىقتار