ۇكىمەت • 21 قاڭتار، 2020

اسقار مامين پاۆلودار وبلىسىنىڭ جاڭا اكىمىن تانىستىردى

109 رەتكورسەتىلدى

ۇكىمەت باسشىسى اسقار مامين پاۆلودار وبلىستىق ءماسليحاتىنىڭ كەزەكتەن تىس سەسسياسىنا قاتىستى، وندا مەملەكەت باسشىسى قاسىم-جومارت توقاەۆتىڭ ءوڭىر اكىمى لاۋازىمىنا ۇسىنعان ابىلقايىر سقاقوۆتىڭ كانديداتۋراسى ءبىراۋىزدان كەلىسىلدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

پاۆلودار وبلىسىنىڭ اكتيۆىنە جاڭا اكىمدى تانىستىرا وتىرىپ، پرەمەر-مينيستر ونىڭ وڭىرلىك جانە رەسپۋبليكالىق دەڭگەيلەردەگى باسشىلىق لاۋازىمدارداعى ۇلكەن جۇمىس تاجىريبەسىن اتاپ ءوتتى.

«تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ جانە مەملەكەت باسشىسى قاسىم-جومارت كەمەل ۇلى توقاەۆ ەلىمىزدىڭ يندۋستريالىق ورتالىقتارىنىڭ ءبىرى – پاۆلودار وبلىسىنىڭ دامۋىنا ەرەكشە ءمان بەرەدى. ءوڭىردىڭ ونەركاسىپتىك الەۋەتى ۇلكەن، مۇندا تاۋ-كەن مەتاللۋرگياسى كەشەنى، مەتاللۋرگيا جانە ماشينا جاساۋ سالاسى دامىعان»، — دەدى ا. مامين. 

ۇكىمەت باسشىسى ءوڭىردىڭ الەۋمەتتىك-ەكونوميكالىق دامۋى بويىنشا وبلىس اكىمدىگىنىڭ الدىندا تۇرعان مىندەتتەردى اتاپ ءوتتى، ولار: ەكونوميكانىڭ تۇراقتى دامۋىن قامتاماسىز ەتۋ، ينۆەستيتسيا تارتۋ، جاڭا جۇمىس ورىندارىن قۇرۋ، ءومىر ءسۇرۋ ساپاسىن ارتتىرۋ جانە حالىقتىڭ تابىسىن جاقسارتۋ.

«ابىلقايىر باقتىباي ۇلىنىڭ باسشىلىق قىزمەتتەگى تاجىريبەسى مەن ءبىلىمى وبلىس اكتيۆىمەن جانە ءماسليحات دەپۋتاتتارىمەن بىرگە مەملەكەت باسشىسى العا قويعان مىندەتتەردى ساپالى شەشۋدى قامتاماسىز ەتۋگە مۇمكىندىك بەرەتىنىنە سەنىمدىمىن»، — دەدى ا. مامين.

كەزدەسۋدە وبلىستىڭ قوعامدىق كەڭەسى توراعاسىنىڭ ورىنباسارى نۇرلان نابيەۆ پەن قالالىق قوعامدىق كەڭەس توراعاسى الەكساندر ريۋمكين ءسوز سويلەپ، مەملەكەت باسشىسى ۇسىنعان ءا. سقاقوۆتىڭ كانديداتۋراسىنا قولداۋ ءبىلدىرىپ، پاۆلودار وبلىسىنىڭ جاڭا اكىمىنە تابىستى ءارى ناتيجەلى جۇمىس اتقارۋدى تىلەدى.

ءا. سقاقوۆ 1974 جىلى 9 شىلدەدە پاۆلودار وبلىسى اقتوعاي اۋدانىندا دۇنيەگە كەلگەن. اقمولا قارجى-ەكونوميكالىق تەحنيكۋمىن «قارجى» ماماندىعى بويىنشا، شاكارىم اتىنداعى سەمەي مەملەكەتتىك ۋنيۆەرسيتەتىن «ەكونوميكا جانە قارجى» ماماندىعى بويىنشا، قازاق قۇقىقتانۋ جانە حالىقارالىق قاتىناستار ينستيتۋتىن «قۇقىقتانۋ» ماماندىعى بويىنشا جانە م. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن «ىسكەرلىك اكىمشىلەندىرۋ ماگيسترى» ماماندىعى بويىنشا تامامداعان.

1995-2006 جىلدارى پاۆلودار وبلىسى بويىنشا سالىق كوميتەتىنىڭ جۇيەسىندە جۇمىس ىستەگەن، جاناما سالىقتار ءبولىمىنىڭ مامانىنان پاۆلودار وبلىسى قاشىر اۋدانى بويىنشا سالىق كوميتەتىنىڭ توراعاسى قىزمەتىنە دەيىن كوتەرىلگەن. 2006-2008 جىلدارى پاۆلودار وبلىسىنىڭ دەنساۋلىق ساقتاۋ دەپارتامەنتى ديرەكتورىنىڭ ەكونوميكا جونىندەگى ورىنباسارى، 2008-2010 جىلدارى پاۆلودار وبلىسى بويىنشا سالىق دەپارتامەنتىنىڭ پاۆلودار قالاسى بويىنشا سالىق باسقارماسىنىڭ باسشىسى بولدى.

2010 جىلدىڭ قازان ايىنان 2012 جىلدىڭ مامىر ايىنا دەيىن قوستاناي وبلىسى بويىنشا سالىق دەپارتامەنتىن باسقاردى، 2012-2014 جىلدارى قارجى مينيسترلىگىنىڭ سالىق كوميتەتى توراعاسىنىڭ ورىنباسارى، قارجى مينيسترلىگىنىڭ مەملەكەتتىك كىرىستەر كوميتەتىنىڭ دامىتۋ جانە جاڭعىرتۋ دەپارتامەنتىنىڭ ديرەكتورى بولىپ جۇمىس ىستەدى.

2014 جىلعى قاراشادان 2016 جىلعى جەلتوقسانعا دەيىن استانا قالاسى بويىنشا مەملەكەتتىك كىرىستەر دەپارتامەنتىنە باسشىلىق ەتتى، 2016 جىلعى جەلتوقساننان 2019 جىلعى ساۋىرگە دەيىن قورعانىس ءمينيسترىنىڭ ورىنباسارى لاۋازىمىندا قىزمەت ەتتى.

2019 جىلعى ساۋىردەن باستاپ قازىرگى ۋاقىتقا دەيىن قارجى مينيسترلىگى قارجى مونيتورينگى كوميتەتىنىڭ توراعاسى قىزمەتىن اتقاردى.

 

سوڭعى جاڭالىقتار

ۇقساس جاڭالىقتار