ايماقتا ورنالاسقان ەرەكشە دۇكەندەرگە كەلۋشىلەرگە كيىم-كەشەك تەگىن بەرىلىپ, ولارعا تەگىن قىزمەت كورسەتىلەدى. سونىمەن قاتار زات الۋ ءۇشىن ءاربىر ازامات جەكە كۋالىگىمەن كەلە الادى. ال دۇكەننەن زات الۋعا كەلگەن ادام مىندەتتى تۇردە ارنايى دەرەكقور تىركەلەدى. سودان كەيىن كەلۋشىنىڭ مارتەبەسى اۆتوماتتى تۇردە انىقتالادى. كەيىن مۇقتاجدىعىنا قاراي قولداۋ كورسەتىلەدى. بۇگىنگە دەيىن 900-گە جۋىق تۇرعىننىڭ ءتىزىمى جاسالعان بولسا, ونىڭ 40 پايىزى دۇكەنگە تۇراقتى تۇردە كەلەدى ەكەن. الايدا تۇرعىندار بۇل جەردەن زاتتاردى الىپ قانا قويماي, وتكىزۋىنە دە بولادى. بۇل ءۇشىن قالاداعى ءىرى ساۋدا جانە حالىق كوپ جينالاتىن ورىنداردا ارنايى جاشىكتەر ورناتىلعان. بۇگىنگە دەيىن 5 جارىم توننا كيىم جينالىپ, ونىڭ ءبىر بولىگى مۇقتاج جاندارعا تاراتىلعان. جينالعان كيىمدەردى جونگە كەلتىرىپ, بارىنشا جۋىپ, تازالايتىن ۆولونتەرلەر جۇمىسى ۇيىمداستىرىلعان. «الەۋمەتتىك كارتا 24 تارماقتان تۇرادى. ولارعا كيىم, ازىق-ت ۇلىك بەرەمىز. بىراق بۇل ولاردىڭ ماسەلەسىن تولىق شەشپەيتىنى بەلگىلى. سوندىقتان دا وتباسىنداعى جاستاردى وقىتۋ, كاسىپتىك باعدار بەرۋ, جۇمىسپەن قامتۋ نەمەسە ولاردى كاسىپكە باۋلۋ ماقساتىندا گرانتتىق جوبالارعا تارتامىز», دەيدى جامبىل وبلىستىق جاستار ساياساتى ماسەلەلەرى باسقارماسى جاستار رەسۋرستىق ورتالىعىنىڭ ديرەكتورى باۋىرجان موربەكوۆ. ەندى, وڭىردەگى ۆولونتەرلەر كەلەسى جىلدان باستاپ ءتۇرلى باعىتتا جۇمىس ىستەيتىن بولادى. ولاردىڭ ءبىرى الەۋمەتتىك سالانى تاڭداسا, ەندى ءبىرى ۇلتتىق قۇندىلىق, رۋحاني جاڭعىرۋ, تۋريزم سياقتى سالالاردى تاڭداپ وتىر.
جامبىل وبلىسى
