مەملەكەت باسشىسىنىڭ حالىقتى قولجەتىمدى تۇرعىن ۇيمەن قامتاماسىز ەتۋ تۋرالى تاپسىرماسىنا سايكەس, جامبىل وڭىرىندە اۋقىمدى جۇمىستار اتقارىلۋدا. تاراز قالاسىندا بىلتىر «نۇرلى جەر» باعدارلاماسى بويىنشا 80 پاتەرلى 9 تۇرعىن ءۇي ەل يگىلىگىنە بەرىلدى. بۇل جاقسى ءۇردىس وڭىردە ءوز جالعاسىن تاۋىپ كەلەدى. وتكەن جىلدىڭ سوڭىندا جامبىل وبلىسىنىڭ اكىمى اسقار مىرزاحمەتوۆ تاراز قالاسىنداعى «قاراسۋ» شاعىن اۋدانىنان جاڭا سالىنىپ جاتقان 90 پاتەرلى جاتاقحانانىڭ كىلتىن كوپ بالالى وتباسىلارعا تابىستادى. بۇل ۇيدە تۇرعىندار جەكەشەلەندىرۋ قۇقىعىنسىز تۇرا الادى. اكىم ءوز سوزىندە وبلىستىڭ 80 جىلدىعىنا وراي 80 نىساننىڭ اياسىندا پايدالانۋعا بەرىلىپ وتىرعان تۇرعىن ءۇيدىڭ تالاي جىل بويى ءۇي كەزەگىندە تۇرعان كوپ بالالى جانە تۇرمىسى تومەن وتباسىلارعا تارتۋ بولعانىن, 80 جىلدىق بەكەر مال شاشپاق داڭعازا توي ەمەس, ەل يگىلىگىنە ارنالعان نىسانداردىڭ اشىلۋىمەن ەرەكشەلەنىپ وتىرعانىن جەتكىزدى. سونداي-اق ارقايسىسى 80 پاتەرلى 4 الەۋمەتتىك تۇرعىن ءۇي بەرىلەتىنىن اتاپ ءوتتى. جالپى, تاراز قالاسىنان كوپ بالالى جانە از قامتىلعان وتباسىلارعا ارنالىپ 12 جاتاقحانانىڭ قۇرىلىسى جۇرگىزىلۋدە. بۇدان كەيىن ءسوز العان 12 بالانىڭ اناسى گۇلفيا ءداۋىتوۆا ءوزىنىڭ العىسىن ءبىلدىرىپ, كوپ بالالى وتباسىلارعا تاعى دا وسىنداي مۇمكىندىكتەر كوپتەپ جاسالسا ەكەن دەگەن تىلەگىن جەتكىزدى.
بۇگىندە تاراز قالاسىنداعى «قاراسۋ» جانە «اراي» شاعىن اۋداندارىندا كوپ بالالى وتباسىلارعا ارنالعان 6 كوپقاباتتى الەۋمەتتىك جاتاقحانانىڭ قۇرىلىسى جۇرگىزىلۋدە. قۇرىلىستىڭ جالپى اۋماعى 8100 شارشى مەتردى قۇراسا, پاتەردىڭ ءبىر شارشى مەترىنىڭ قۇنى 100,2 مىڭ تەڭگەگە اينالۋدا. مۇندا ينفراقۇرىلىم ماسەلەسى تولىقتاي شەشىلگەن. جاقىندا پايدالانۋعا بەرىلگەلى وتىرعان جاتاقحانالاردىڭ ىشكى قۇرىلىسى ەكى بولمەلى پاتەرلەردەن تۇرادى. ءبىر پاتەردىڭ جالپى اۋدانى 35-40 شارشى مەتردى قۇرايدى. ءار پاتەردە زال جانە جاتىن بولمەلەر, سونداي-اق جەكە اس ءۇيى, اجەتحاناسى مەن جۋىناتىن بولمەسى بار. سونداي-اق كوپ بالالى وتباسىلار ءۇشىن جاتاقحانانى جالعا الۋ قۇنى 3500 تەڭگەدەن اسپايدى.
جامبىل وبلىسى
