رۋحانيات • 18 قاڭتار، 2020

شىمكەنتتە اپتانىڭ ءبىر كۇنى پوەزياعا ارنالادى

114 رەتكورسەتىلدى

شىمكەنت قالاسىندا «مارتەبەلى پوەزيا مىنبەرى» اتتى  رۋحاني باعدارلاما باستاۋ العان بولاتىن. بۇل تۋرالى شىمكەنت قالاسى اكىمدىگىنىڭ ءباسپاسوز قىزمەتى حابارلادى.

پرەزيدەنت قاسىم-جومارت توقاەۆ «اباي جانە ءححى عاسىر» ماقالاسىندا «اباي قۇنانباي ۇلىنىڭ 175 جىلدىعىن اتاپ ءوتۋ توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەگەن بولاتىن. 

وسى تۇرعىدا قايىرىمدى قالا تۇرعىندارىن رۋحاني ازىقتاندىرۋ ماقساتىندا ءار جۇما پوەزيا كۇنىنە ارنالماق. شاراعا تمد ەلدەرى مەن رەسپۋبليكاعا تانىمال بەلگىلى اقىندار ارنايى شاقىرتىلىپ، مىنبەردە وي مەن سەزىمنەن تۋىنداعان پاراساتتى جىرلار وقىلماق. اپتا سايىن وتكىزىلەتىن وسىناۋ رۋحاني شارا ۇلى ابايدىڭ ولەڭدەرى مەن قارا سوزدەرىن وقۋمەن باستالاتىن بولادى.

پوەزيا كۇنىنىڭ العاشقى قوناعى جازۋشىلار وداعىنىڭ توراعاسى، اقىن، جۋرناليست،  قازاقستاننىڭ ەڭبەك سىڭىرگەن قايراتكەرى   ۇلىقبەك ەسداۋلەت بولدى. 

«وتىرار» كىتاپحاناسىندا وتكەن پوەزيا كەشىندە قالامگەردىڭ ولەڭدەرى وقىلىپ، شىعارماشىلىعىنان كىتاپتار كورمەسى قويىلدى.

1

پوەزيا كەشىنىڭ سالتاناتتى اشىلۋىندا ءسوز العان قالا اكىمى ەرلان ايتاحانوۆ اتالعان شارانىڭ ءمان-ماقساتىنا توقتالىپ، رۋحاني بايلىق-ادامگەرشىلىك نەگىزى ەكەنىن اتاپ ءوتتى.

«بۇگىنگى كۇننىڭ وزەكتى ماسەلەسى جاس ۇرپاققا-ادامگەرشىلىك-رۋحاني تاربيە بەرۋ. قۇندى قاسيەتتەرگە يە بولۋ، رۋحاني باي ادامدى قالىپتاستىرۋ ونىڭ تۋعان كەزىنەن باستالۋى كەرەك. حالىقتا «اعاش ءتۇزۋ ءوسۋ ءۇشىن وعان كوشەت كەزىندە كومەكتەسۋگە بولادى، ال، ۇلكەن اعاش بولعاندا ونى تۇزەتە المايسىڭ» دەپ بەكەر ايتىلماعان. سوندىقتان بالانىڭ بويىنا جاستايىنان ىزگىلىك، مەيىرىمدىلىك، قايىرىمدىلىق، ياعني ادامگەرشىلىك قۇندى قاسيەتتەردى ءسىڭىرۋىمىز قاجەت. وسى تۇرعىدا اتالعان رۋحاني باعدارلامانىڭ ۇرپاق تاربيەسىندە الار ورنى زور بولادى دەپ سەنەمىن» دەدى ەرلان قۋانىش ۇلى. شاھار باسشىسى ءوز ءسوزىن ۇلى ابايدىڭ ءبىر شۋماق ولەڭىمەن قورىتىندىلادى.

پوەزيا كەشىنە كورشىلەس وزبەكستان رەسپۋبليكاسىنان دەلەگاتتار مەن ەلىمىزگە بەلگىلى مارحابات بايعۇت، ءحانبيبى ەسەنقاراقىزى سىندى اقىن، جازۋشىلار، زيالى قاۋىم وكىلدەرى مەن جاستار قاتىستى.

وندا ستۋدەنت جاستار مەن مەكتەپ وقۋشىلارى اباي قۇنانباي ۇلىنىڭ ولەڭدەرىن جاتقا ايتىپ، قارا سوزدەرىنەن ءۇزىندى وقىدى. بۇدان بولەك كەش قوناعى ۇلىقبەك ەسداۋلەتتىڭ ولەڭدەرى دە وقىلدى.

قالامگەر ۇلىقبەك ەسداۋلەت «قانات قاقتى»، «جۇلدىز جارىعى»، «اپتايدىڭ التىنتامىرى»، « ۇلىستىڭ ۇلى كۇنى»، «اق كەرۋەن»، «جاراتىلىس»، «جۇرەكتەگى جارىلىستار»، «التاي اسۋلارى»، «زامان-اي»، «كيىز كىتاپ»  سىندى كىتاپتار مەن «احيللەستىڭ وكشەسى» ولەڭدەر جيناعىنىڭ، قازاق تىلىندەگى «ىنتىق زار»، ء«ابىلحايات» 5 تومدىق شىعارمالار جيناعى مەن

«سەمەي-نەۆادا» قوزعالىسىنىڭ ءانۇرانى جانە «زامان-اي» ءانى سوزدەرىنىڭ اۆتورى. اقىننىڭ شىعارمالارى  بىرنەشە شەت تىلدەرىنە اۋدارىلعان. 

سوڭعى جاڭالىقتار

ۇقساس جاڭالىقتار