قوعام • 15 قاڭتار، 2020

وڭىرارالىق اۋە تاسىمالىنىڭ ءورىسىن كەڭەيتسەك

61 رەتكورسەتىلدى

بىلتىر اتىراۋ، اقتوبە، پاۆ­لودار اۋەجايلارى ساتىلىمعا شى­عارىلعانى بەلگىلى. ءسويتىپ ەلى­مىزدەگى بارلىق تەرمينالدار، ۇشۋ-قونۋ جولاعى، اۋە ايلاعى «سا­مۇرىق-قازىنا» ۇلتتىق ءال-اۋقات قورى اق يەلىگىنەن اتالعان ءۇش وب­لىستىڭ اكىمدىكتەرىنىڭ كوممۋ­نال­دىق مەنشىگىنە بەرىلدى.

«سا­مۇرىق-قازىنا» ۇلتتىق ءال-اۋقات قورى اقتوبە، اتىراۋ، پاۆلودار سياقتى وبلىس ورتالىقتارىنداعى اۋەجاي­ل­اردى جە­كە­شەلەندىرۋ جونىندەگى اۋكتسيونعا شى­عاردى. الايدا بۇل اۋەجايلاردىڭ اكتسيالارىن ساتىپ العىسى كەلەتىن كاسىپكەرلەر تابىلمادى. سوندىقتان ۇكىمەت تاراپىنان ەلىمىزدەگى ستراتەگيالىق نىسان سانالاتىن اۋەجايلاردى وبلىستىق اكىم­دىكتەردىڭ كوممۋنالدىق مەنشىگىنە اۋدا­رۋ تۋرالى شەشىم قابىلداندى. ەندى اۋەجايلاردىڭ قىزمەتىنە وبلىستىق اكىمدىكتەردىڭ وڭىرلىك «جولاۋشىلار كولىگى جانە اۆتوموبيل جولدارى» باس­قار­ماسى باسشىلىق جاسايدى. ال اۋەجاي­لاردىڭ جەكەمەنشىگىندە ۇشاقتار جوق. بۇل ماسەلەمەن تاسىمالداۋشى كومپانيا­لار اينالىساتىنى بەلگىلى.

قازىر ەلىمىزدە نۇر-سۇل­تان، الماتى، شىمكەنت، اقتاۋ، قارا­عاندى، وسكەمەن، پاۆلو­دار، كوكشەتاۋ، تاراز، پەترو­پاۆل، سەمەي قالالارىنىڭ اۋەجاي­لارىندا سىناق رەتىندە «اشىق اسپان» رەجىمى ەنگىزىلگەنى حابارلاندى. بۇل ماسەلە اۋە كەڭىس­تىگىن­دەگى بارلىق ۇشۋ باعىت­تارى­نا قاتىستى شەكتەۋلەردى الىپ تاستاۋدى، شەتەلدىك اۆيا­كوم­پانيالارعا دا «اۋە ەركىن­دىگىن» بەرۋدى قاراستىرادى. ال ەلى­مىزدەگى وڭىرارالىق ۇشۋ باعىت­تارىندا ۇشاق بيلەتتەرىنىڭ قىمبات ەكەنىن ەكىنىڭ ءبىرى بىلەدى. ءتىپتى ەرتە السا، ارزان بولادى دەپ جارتى جىل بۇرىن بيلەت الىپ قوياتىندار دا، ودان كەيىن جول تۇسپەي بارا المايتىنداي جاعداي بولسا، العان بيلەتىن وتكىزە الماي قالعان، جارتى اقشاسىن عانا العان جايلار دا كەزدەسەدى نەمەسە ۇشۋعا ءبىر كۇن قالعاندا، تاۋلىك ىشىندە بيلەت ساتىپ الاتىن جولاۋشىلارعا باعاسىن ەسەلەي قىمباتتاتىپ ساتاتىنى دا كوپشىلىككە ءمالىم. سوندىقتان «اشىق اسپان» ارقىلى وڭىرارالىق ىشكى جانە شەتەلدىك تاسىمالداۋشىلار كەلسە، جاڭا حالىقارالىق مارشرۋتتار اشىلسا، باسەكەلەستىك ارتادى دەگەن ءۇمىت بار. ياعني، اۆيا­بيلەتتەردىڭ باعاسى تومەن­دەپ، قاراپايىم حالىق تا ۇشاقپەن ۇشۋعا قولدارى جەتەر ەدى.

ەلىمىزدەگى ۇشاق بيلەتتەرى­نىڭ قىمباتتىعىنا پرەزيدەنت قاسىم-جومارت توقاەۆ تا نازار اۋدارىپ، اۋە كەڭىستىگىن اشۋ كەرەكتىگى تۋرالى ۇكىمەتكە تاپسىرما بەردى. بۇل – ەلىمىزدەگى اۋە­جايلار ءبىر كومپانيا­نىڭ مۇد­دەسىن عانا ويلايتىن تاۋەلدىلىكتەن قۇتىلادى دەگەن ءسوز. بيلەت باعاسى دا شارىقتاماس ەدى. ەكىنشىدەن، «اشىق اسپان» ارقىلى وزگە جۇرت كەلەدى، ەلدە ءتۋريزمنىڭ جولى اشىلادى. كوك اسپانداعى «اۋە ەركىندىگى» شە­تەلدىك كومپانيالارعا ەلىمىز­دىڭ قالالارى ارقىلى باسقا ەلدەرگە ۇشۋىنا دا مۇمكىندىك بەرە الادى. جەرگىلىكتى وتاندىق اۋەجايلار ارقىلى ترانزيتتىك جولاۋشىلار تاسىمالى دا كوبەيە تۇسەدى.

وبلىستىق اكىمدىكتەردىڭ قاراۋىنا بەرىلگەن ەلىمىزدەگى بىرقاتار وڭىرلىك اۋەجاي قۇرى­لىمدارىن جوندەۋ، جەرگىلىكتى اۋە جەلىلەرىنىڭ ۇشۋىن قالپىنا كەلتىرۋ ءۇشىن بۇگىندە وڭىرلىك ساناتتاعى ۇشاقتار ساتىپ الۋ جوسپارلانىپ وتىر.

جەرگىلىكتى اۋەجاي قۇرى­لىم­دارىنداعى تاعى ءبىر ماسەلە، بىلىك­­تى مامانداردىڭ قاجەتتىگى. اۋە­جاي جۇمىسشىلاردى، ينجە­نەر-تەحنيكتەردى، اۆيا-ديس­پەت­چەرلەردى، اۋە كومپانياسىنىڭ قىز­مەتكەرلەرىن، تەحنيكالىق، اۆيا­تسيالىق وقۋ ورتالىقتارىنىڭ مامان­دارىن كۇتەدى. ال نۇر-سۇل­­­تان قالاسىندا سالىنىپ جات­­قان «اۆياتسيالىق وقىتۋ ورتا­­لىعى» بولاشاقتا اۆياتسيا مامان­­دارىنىڭ بىلىكتىلىگىن ارتتىرۋ ور­تا­لىعى بولاتىنى انىق. بۇل – اسى­­رەسە، قازاق جاستارى وسى باعىتقا قاراي تالپىناتىن جاڭا ماماندىق.

ال وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى دينا مۇقانوۆانىڭ ايتۋىنشا، الداعى جىلدارى وبلىس ورتالىعىنداعى اۋەجاي اۋە باعىتتارىنا جاڭا تاسىمالداۋ­شىلاردى ارىپتەستىككە شاقى­رىپ، ۇشۋ جەلىلەرى كەڭەيتىلەدى. بىلتىر «پاۆلودار – ءنوۆوسىبىر» باعىتى قايتا اشىلعان. ءسىبىر جاقىنداي ءتۇستى دەپ ورىستار قۋانۋدا. ياعني، نارىقتا بۇل باعىتقا سۇرانىس بار. بۇعان دەيىن دە «پاۆلودار – شىمكەنت» باعىتىندا اۋە باعىتى جارتى جىل عانا ۇشىپ، توقتاپ قالعان-دى. ەندى الداعى مامىر ايىنان باستاپ «پاۆلودار – شىمكەنت» باعىتىندا FlyArystan كومپانيا­سى قىزمەت كورسەتەتىن بولادى. ويتكەنى شىمكەنت باعىتىنداعى ۇشۋ نارىعى زەرتتەلدى. مىسالى، سولتۇستىككە كوشكىسى كەلەتىن وڭ­تۇس­تىك تۇرعىندارىنا دا، «سەر­پىن» باعدارلاماسىمەن وقيتىن ستۋ­دەنتتەرگە، ولاردىڭ اتا-انا­­­لارىنا، وقۋ بىتىرگەن سوڭ وسى وبلىستا قالىپ قىزمەت ەتە­تىن جاس مامانداردىڭ وتباسى جاع­­دايلارىمەن، مەرەكەلەردە ۇي­لەرىنە ۇشىپ بارىپ-كەلۋ­­لەرىنە وڭتايلى بولماق. ەكىنشى­دەن، پاۆلودار تەمىرجول ۆوكزا­لىنان جۇرەتىن «سەمەي – نۇرسۇل­تان» پو­يى­زىنا بۇرىن ءبىر ۆاگون جالعانىپ، وعان شىم­­­كەنت، سارىعاشقا باراتىن جولاۋ­شىلارعا بيلەت ساتىلاتىن. جولاۋشى دا، ستۋدەنت تە كوپ. بي­لەت جەتپەيدى، ورىن جوق. بۇدان كەيىن تەمىرجول باسقارماسى شىمكەنت – سارىاعاش باعىتىنا ەكىنشى ۆاگون جالعادى. تۇركياعا ۇشۋ نارىعىنا دا سۇرانىس جو­عارى. جىلى جاققا دەمالۋ­عا با­راتىن پاۆلودارلىقتار قارا­عاندى، نۇر-سۇلتان، الماتى، شىمكەنت ارقىلى ۇشۋعا ءماجبۇر بولسا، ەندى ينۆەستورلار كەلسە، تۋ­ريستەرگە اۋە جولى اشىلادى.

ەندىگى ماسەلەنىڭ ءمانىسى، جەر­گى­لىكتى اۋەجايدان ەلىمىزدىڭ شىعىس، باتىس وبلىستارىنا ۇشا­تىن اۋە باعىتتارىن اشۋ. ەلى­مىزدە 60-قا جۋىق اۋە كومپانياسى جۇمىس ىستەيدى. اۆياتسيا ماماندارى­نىڭ ايتۋىنشا، اۋە باعىتتارىنا تەندەر جاريالانعانىمەن، وعان كەز-كەلگەن كومپانيا قاتىسا المايدى ەكەن. مىسالى، ەكى جىلدان اسا ۋاقىت بۇرىن باياناۋىلدا شاعىن ۇشاقتار ۇشىرۋ جوسپارلاندى. تۋريستىك الەۋەتتى ارتتىرامىز دەپ قانشا قاراجات شىعىنداپ، شاعىن اۋەجاي دا سالىندى. بىراق سۋبسيديا، تاريف ماسەلەلەرى شە­­شىل­مەگەن سوڭ ۇشاقتار كوك­كە كوتەرىلگەن جوق. شاعىن اۋە­جايدىڭ جاعدايى وسىنداي بولىپ تۇرعاندا، ءبىزدىڭ ۇشۋ نارىعى ءالسىز «اشىق اسپانعا» شاقىرتۋىمىزعا شەتەلدىك كوم­پانيالار كەلە مە، جوق پا، ما­سەلە سوندا. ۇشۋ نارىعىنىڭ السىزدىگىنە بىرىنشىدەن، جولاۋشىلار ءۇشىن بيلەت باعاسىنىڭ قىمباتتىعى، ەكىنشىدەن، كەنەتتەن بولاتىن اۋە اپاتتارى دا اسەر ەتۋى مۇم­كىن. ەلىمىزدىڭ اۋە كەڭىس­تىگىندە پاي­دالانۋ ۋاقىتى ءوتىپ كەتكەن ەسكى ۇشاقتار ۇشادى دەگەن قورقىن­شىتى قاۋەسەت تاعى بار.

دەسە دە ءبىرىنشى قازاقستاندىق لوۋكوستەر سانالاتىن FlyArystan پاۆلودارعا ارزان اۋە بيلەتتەرىن ۇسىنۋدا. اۋە كومپانيالارى­نىڭ اراسىندا جايلىلىق پەن قاۋىپسىزدىك دەڭگەيىمەن ەرەك­شە­لەنەتىن Airbus A320 رەاكتيۆتى ۇشاقتارى جاڭا ەكەنىن ەسكەرگەن ابزال. قازىر بۇل ۇشاقتار وبلىس ورتالىعىنان نۇر-سۇلتان قالاسىنا ۇشادى. بىرجاقتى بيلەت قۇنى 5999 تەڭگەدەن باستا­لادى. پاۆلودار اۋەجايى وڭىردەگى جولاۋشىلاردىڭ سانىن كوبەيتۋ ءۇشىن FlyArystan جانە بارلىق اۋەكومپانياعا قولداۋ كور­­سەت­پەك. سونىمەن بىرگە FlyArystan بىلتىر 30 مامىردا الماتى – پاۆ­لودار – الماتى باعىتى بو­يىنشا ارزان باعامەن ۇشاق با­عىت­تارىن دا اشتى.

«پاۆلودار اۋەجايى» اق اۋەجايى بىلتىر حالىقارالىق مارتەبەگە يە بولدى. ەندى وڭىردەگى جولاۋشىلارعا قىزمەت كورسەتۋ ساپاسىن ارتتىرۋ ءۇشىن تۇركيا­لىق ينۆەستورلار تارتىلۋى مۇم­كىن. باسقارمانىڭ مالىمەتىنشە، اۋەجاي­دىڭ بەرەشەك قارىزدارى جوق. قازىر اۋە­جاي قۇرىلىمىن­دا 200-دەن استام ادام قىزمەت ەتەدى. ىشكى قۇجاتتاردى رەتتەۋ جانە رەسىمدەۋ، اۋەجاي قىزمە­تىن ودان ءارى جاقسارتۋ جۇمىستارى جالعا­سۋدا. «قورشاعان ورتانى قورعاۋ» باعدارلاماسى اياسىندا «پاۆلودار اۋە­جايى» اق اۋە باسسەينىن، جەر، سۋ رە­سۋرستارىن ساقتاۋ، تابيعاتتى، جەر قوي­ناۋىن پايدالانۋ جانە قورعاۋ سياقتى ەكولوگيالىق باعىتتا جۇمىس ىستەي­دى. الداعى جىلدارى ەلىمىزدىڭ وزگە  وڭىر­لەرىنە جىلدام، قولايلى ءارى قاۋىپسىز جەتە­تىن جاڭا باعىتتاردى جوسپارلاۋدا. جالپى، پاۆلودار اۋەجايىنان جىلىنا 1 مىڭعا جۋىق ۇشاق ۇشادى. بۇل كۇندەرى ۇشاقتار نۇر-سۇلتان، الماتى، رەسەيدىڭ ماسكەۋ، ءنوۆوسىبىر، بەلارۋستىڭ مينسك قالالارى مەن تۇركياعا ۇشۋدا.

اۋە كومپانيالارىنىڭ كەلىسى­مىمەن جولاۋشىلار سۇرانىسىنا ساي جاڭا باعىت­تار اشىلماق. اۋەجاي ساعاتىنا 200-دەن استام جولاۋشى قابىلداي الادى. وتكەن جىلدىڭ قورىتىندىسى بويىنشا اۋەجاي ارقىلى 200 مىڭنان استام جولاۋ­شى تاسىمالدانىپ، 300 مىڭ توننادان استام جۇك پەن پوشتا جەتكىزىلگەن.

ەڭ باستىسى، نارىقتاعى ۇشۋ با­عىتتارىنىڭ تولىق زەرت­تەلۋى. پاۆلودار اۋەجايىنان وسكە­مەن، شىمكەنت، اقتاۋ، اتى­­راۋ باعىتتارىنا ۇشاتىن ۇشاق­قا سۇرانىستىڭ بارى باي­قالدى. شىعىس ءوڭىرىنىڭ كاتون­قاراعايداعى دەمالىس ورىندارىنا، ماڭعىستاۋ ءوڭىرىنىڭ كاس­پي تەڭىزى جاعالاۋىنا، وڭتۇس­تىكتەگى سارىاعاشقا، تۇركىستانعا، شىمكەنت پەن تاشكەنت قالا­لارىنا بارعىسى كەلەتىن تۋريستەر، قۇدالىققا، تويعا باراتىن تۋىس-تۋعاندار سياقتى جولاۋشى­لار وسى باعىتتا قىزمەت كور­سە­تەتىن اۋە كومپانيالارىن كۇتۋدە.

1

 

پاۆلودار وبلىسى

 

سوڭعى جاڭالىقتار

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

اۋىلدا سپورت كەشەنى سالىنۋدا

ايماقتار • بۇگىن، 09:28

قحل قىركۇيەكتە باستالادى

سپورت • بۇگىن، 08:09

ۇقساس جاڭالىقتار