اقتوبە وبلىسىنداعى قارابۇتاق اۋىلىندا ۇيلەنۋ تويى وتكىزىلىپ, وندا 60-تان اسا ادام ساپاسىز تاعامنان ۋلانۋ دەرەگى تىركەلدى.
توي وتكىزىلگەن رەستوران اۋدان اكىمى زايىبىنىڭ (دەمەك, اكىمنىڭ!) مەنشىگى كورىنەدى. سوندىقتان جەرگىلىكتى جەردەگى اۋداندىق اۋرۋحانا ءدارىگەرلەرى بولعان وقيعا جونىندە اقپارات بەرۋدەن باس تارتقان. كۋاگەرلەردىڭ ايتۋلارى بويىنشا, تاعامنان ۋلانعانداردىڭ ىشىندە بۇلدىرشىندەر دە بار ەكەن.
بۇل وقيعا تۋرالى تەلەارنا ءتىلشىسىنە بەرگەن سۇحباتىندا رەستوران قىزمەتكەرى ايمان ەسىموۆا بىلاي دەدى: «جاسىراتىن نەسى بار, توي داستارقانىنان ءدام تاتقان مەنىڭ وتباسىم دا ۋلاندى. ويتكەنى, جۇرتقا بەرىلگەن ەت تاعامى قارايىپ كەتكەن. سورپاسى دا سونداي».
بىزگە كەلىپ تۇسكەن سوڭعى اقپاراتتا سانيتارلىق-ەپيدەميولوگيالىق ساراپتاما ورتالىعى ماماندارىنىڭ بۇل وقيعانى ەندى تەكسەرۋگە كىرىسكەنى جونىندە جازىلعان. سوعان قاراعاندا, العاشقى كەزدە وسى ماسەلەنى تۇبەگەيلى زەرتتەۋگە ەشكىمنىڭ باتىلى جەتپەگەن سىڭايلى.
دانيار تۇيمەباي.
