قۇدايعا شۇكىر, بۇگىندە ءوزىمىز اۋىز تولتىرىپ ايتا بەرەتىن تاۋەلسىز ەلمىز. ەلدىڭ ناق ورتاسىنداعى قابىلدانعان شەشىمنىڭ ساعىزشا سوزىلىپ, كۇشىن السىرەتەتىن دە ءجونى جوق. وعان قوسا استانادا قابىلدانعان قاۋلىنىڭ ينتەرنەت اتاۋلىدان ماقۇرىم دەيتىن شالعايداعى اۋىلدارعا كەشىگىپ جەتكەنىنە تۇسىنىكپەن قاراۋعا بولار. ال ەلوردانىڭ ىرگەسىندەگى اقمولا وبلىسى, ەرەيمەنتاۋ اۋدانى اكىمدىگىنىڭ قىزمەتكەرلەرى قازاقستان پرەزيدەنتىنىڭ 28 جەلتوقساندى جالپىۇلتتىق ازا تۇتۋ كۇنى دەپ جاريالاپ, ەلىمىزدەگى مەملەكەتتىك تۋلاردى تومەن تۇسىرۋگە جانە بارلىق ويىن-ساۋىق شارالارىن توقتاتۋعا تاپسىرما بەرگەنىنەن بەيحابار بولعانى ما؟
ولاي دەيتىنىمىز قالىڭ جۇرت قابىرعاسى قايىسىپ, الماتىدا ۇشاق اپاتىنان قازاق بولعان جانداردى ازا تۇتىپ جاتقاندا, ەرەيمەنتاۋ اۋدانىنىڭ اتقامىنەرلەرى الدىنا الا تاپسىرىس بەرىپ قويعان جاڭاجىلدىق كەشتى دۋمانداتىپ وتكىزىپتى. قىسقاسى, مەملەكەت باسشىسىنىڭ تاپسىرماسى مەن حالىقتىڭ باسىنا تۇسكەن قايعىنى ەرەيمەنتاۋلىق شەنەۋنىكتەر وسىلايشا «تويلاتىپتى».
ەرەيمەنتاۋ اۋدانىنىڭ اكىمى اباي ءالجانوۆ بولسا سول كەشتە ايەلىمەن بىرگە «تۋعان كۇندە» بولعانىن ايتادى. ء«بىر تۋىستاردىڭ تۋعان كۇنىندە بولدىق. مەن كىردىم دە, شىقتىم, ءبىر تۋىسىمنىڭ... نەسىنە... جولداسىممەن. بەرەتىنىمدى بەرىپ, قۇتتىقتاپ شىقتىم», – دەدى اباي ءالجانوۆ.
قالاي بولعاندا دا, اۋدان اكىمىنىڭ «قۇتتىقتاپ شىققانى» ازا تۇتۋ كۇنى ويىن-ساۋىق كەشتىڭ بولعانىن ايعاقتايدى. سوندا بۇكىل توعىزىنشى تەرريتوريا اۋماعىندا, قازاقستاننىڭ شەتەلدەگى ەلشىلىكتەرىندە مەملەكەتتىك تۋلار تومەن ءتۇسىرىلىپ, بارلىق ويىن-ساۋىق شارالارى توقتاتىلىپ جاتقاندا, ەرەيمەنتاۋ اۋدانىنداعى «قۇتتىقتاۋدى» قالاي باعالاۋعا بولادى؟
