بۇدان بىرازىراق بۇرىن « ۇلىسىمنىڭ ۇيىتقىسى – وڭتۇستىك» اتانعان التىن قۇرساقتى ايماعىڭىزدىڭ الىستاعى اۋدانىندا الاشىڭىزدىڭ اسا كورنەكتى سۋرەتكەرى, ۇلتىڭىزدىڭ ۇلاعاتتى قالامگەرى, شىنايىلىقتىڭ شىڭىنا شىققان شىعارماشىلىق وكىلى, بالالار ادەبيەتىنىڭ زەرگەرى بەردىبەك سوقپاقباەۆقا ارنالعان كەش ۇيىمداستىرىلدى. ءبىر اقىنىمىز سوندا: «ەلەگەي ەگەمەن ەل ەر-داناسىن; بىرەگەي بەردىبەكتىڭ بەر باعاسىن!» دەپ ولەڭ وقىعان.
بۇدان بىرازىراق بۇرىن « ۇلىسىمنىڭ ۇيىتقىسى – وڭتۇستىك» اتانعان التىن قۇرساقتى ايماعىڭىزدىڭ الىستاعى اۋدانىندا الاشىڭىزدىڭ اسا كورنەكتى سۋرەتكەرى, ۇلتىڭىزدىڭ ۇلاعاتتى قالامگەرى, شىنايىلىقتىڭ شىڭىنا شىققان شىعارماشىلىق وكىلى, بالالار ادەبيەتىنىڭ زەرگەرى بەردىبەك سوقپاقباەۆقا ارنالعان كەش ۇيىمداستىرىلدى. ءبىر اقىنىمىز سوندا: «ەلەگەي ەگەمەن ەل ەر-داناسىن; بىرەگەي بەردىبەكتىڭ بەر باعاسىن!» دەپ ولەڭ وقىعان.
«بالالىق شاققا ساياحات», «جەكپە-جەك», «مەنىڭ اتىم قوجا», «قايداسىڭ, گاۋھار؟» پوۆەستەرى, «ولگەندەر قايتىپ كەلمەيدى», «بۋرىل ات», «ءارىپباي جانە كوكجال قاسقىر», «ءبىر قالتا قۇرت», «ۇلتان وقيعاسى», «كويلەك ماسەلەسى», «مەن قالاي ۇيلەندىم» اتتى اڭگىمەلەرى. بۇلار – بەردىبەك سوقپاقباەۆتىڭ تاڭدامالى دەلىنەتىن تۋىندىلارى عانا.
جوعارىدا, ءسوزىمىزدىڭ ءبىسمىللاسىندە جەرگىلىكتى اقىنىمىزدىڭ ولەڭىنەن قوس قاتاردى كەلتىردىك قوي. شىنىندا دا, قازاق پروزاسىنداعى قازاقى قۇنارلى, قازاقى قاراپايىمدىلىق دەپ اتالاتىن شەبەرلىكتىڭ قايتالانباس ۇلى مەكتەبىن بەيىمبەت مايلين باستاسا, بەردىبەك سوقپاقباەۆ – سول ۇلى مەكتەبىڭىزدىڭ كەرەگەسىن, ياعني قازاق قارا ءسوزىنىڭ, قازاق كوركەم ادەبيەتىنىڭ كوكجيەگىن كەڭەيتۋىمەن كەمەل تۇلعا.
جازۋشى بەردىبەك سوقپاقباەۆتىڭ تۇسپالعا تولى, استارى الۋان تۋىندىلارىن وقىمايتىن, بىلمەيتىن بالا-شاعا دا, جاس تا, جاسامىس تا جوقتىڭ قاسى ەدى. كەزىندە. كەڭەستىك زامانىڭىزدا. سوقپاقباەۆ بىردە-ءبىر شىعارماسىندا سول قوعامىڭىزدى, سول زامانىڭىزدى, پارتياڭىز بەن ۇكىمەتىڭىزدى ماداقتاعان جوق. سوقپاقباەۆتىڭ «سويىلى» كەرەعار سىلتەنەتىن. استار مەن تۇسپالدى تاپتىشتەيتىنىمىز سوندىقتان. ءبىر تاڭدانارلىعى – بەردىبەگىڭىزدىڭ كەز كەلگەن شىعارماسى تاۋەلسىزدىك العاننان كەيىن دە جاپپاي وقىلعانى. قازىر دە كىتاپ وقىمايتىن, وقىلمايتىن ۋاقىتتا دا وقىلىپ ءجۇرگەنى. ەرتەڭ دە, كەلەشەكتە دە وقىلاتىنى. سەنبەسەڭىز, عالامتوردى قاراپ بايقاڭىز. يلانباساڭىز, كىتاپحانالارعا بارىپ, سۇراستىرىپ كورىڭىز. اگاركي, بەردىبەك سوقپاقباەۆتىڭ تۋىندىلارىن «مەنىڭ اتىم قوجا», «ولگەندەر قايتىپ كەلمەيدى», «بالالىق شاققا ساياحات», «قايداسىڭ, گاۋھار؟» دەگەن اتپەن باسىپ شىعارىپ, كىتاپ دۇكەندەرىنە تۇسىرسەڭىز بار عوي, جىلدار بويى وتپەي جاتقان جيناقتاردان ءجۇز ەسە جىلدامدىقپەن تاراپ-اق كەتەر ەدى-اۋ.
سوقپاقباەۆ ەشقانداي دا سىي-قۇرمەت كورمەدى. كورسەتە المادىق. قالامگەردىڭ قادىر-قاسيەتىن, پوۆەستەرى مەن اڭگىمەلەرىنىڭ, رومانىنىڭ قۇندىلىقتارىن بىلە تۇرىپ, بىلگىمىز كەلمەدى. كەڭەستىك كەزدىڭ بيلىگى, ياكي ۇكىمەتى مەن پارتياسى باعالامادى. باعالاعىسى جوق ەدى. كوزى تىرىسىندە كۇندەستىكتىڭ, ءىشتارلىقتىڭ, باقاستىقتىڭ قىل شىلبىرىمەن قىلقىندىرۋدان تانبادىق. تابيعي, تۋما دا تۇما تالانتىن كورە المادىق. ءاربىر اڭگىمەسىن, ءاربىر پوۆەسىن باس كوتەرمەي وقىپ, قالاي اياقتاعانىن اڭعارماي دا قالىپ, تامسانىپ, تاڭعالىپ وتىراتىن تالاي-تالاي قالامداستارىنىڭ ىشتەرىن قىزعانىشتىڭ قىزىل ءيتى تىرناپ: «بۇلاي جازۋعا بولمايدى. ءبۇيتىپ كەز كەلگەن ادام جازادى», دەسەتىن. الايدا, سوندايلاردىڭ وزدەرى سوقپاقباەۆ سوقپاقتارىنىڭ ماڭايىنا دا جولاي الماس-تى.
بەردىبەگىڭىزدى تىرىسىندە نەلىكتەن باعالامادى؟ سەبەبى سول, بەردىبەگىڭىز بىربەتكەيتۇعىن. تايسالمايتىن تۋراشىلدىعى توتاليتاريزم تالاپتارىنا قايشىتۇعىن. بولمىس-ءبىتىمىندە جاعىمپازدىق پەن جاندايشاپتىقتىڭ, جىلپوستىقتىڭ جۇرناعى دا جوقتۇعىن. ول ەشكىمنەن ەشتەڭە سۇراماعان. يشارالاپ يەك كوتەرمەگەن. تومەنشىك تارتىپ باسىن يمەگەن. تالانت تازالىعى, دارىن دارالىعى, كىرپيازدىعى كوپ جۇرتتارىڭىزعا ۇناي بەرمەس-ءتى. بىلەتىندەردىڭ بەدەرلەۋىنشە, بەردىبەگىڭىز ءازىل-وسپاققا وراسان بولعان. وسىپ-وسىپ جىبەرگەندى كىم جاراتسىن؟ قالجىڭى قالىڭدىعىنا قاراماستان, قاتار-قۇربى قالامداستارىنا دا اسا اشىلماعان. قوعامىنا دا, زامانىنا دا, ادامىنا دا كۇرەڭقاباقتاۋ كەيىس كورسەتۋمەن وتكەن دە كەتكەن.
سوقپاقباەۆىڭىزدىڭ سوقپاقتارى سونىلىعىمەن سىندارلى. سوقپاقباەۆ ءستيلى وتە-ءموتە تۇسىنىكتىلىگىمەن, سولاي بولا تۇرا جۇمباقتارى جاسىرىنىپ جاتاتىن قات-قات قاتپارلارىمەن قىمبات-تى. ءبىر قاراعاندا, قولىنا قالام ۇستاعان كەز كەلگەن «نانتالاپ» جازا سالاتىنداي سەكىلدەنەر. وپ-وڭاي, جەپ-جەڭىل ورىلگەندەي كورىنەر. سولاي سەزىلەر. ولاي ويلاساڭىز, وڭباي قاتەلەسەسىز. ونداي قاراپايىمدىلىققا, بەيىمبەت باستاعان, بەردىبەك بيىكتەتە بىلگەن قازاقى قۇنارلى قازاقى قاراپايىمدىلىققا ەكىنىڭ ءبىرى ەمەس, مىڭنىڭ دا ەمەس, ميلليوننىڭ ءبىرى وڭايلىقپەن قول ارتا الماس. ءمايليننىڭ عانا مانەرى. سوقپاقباەۆتىڭ عانا ءستيلى. ورنەكتەرى. بەيىمبەتىڭىزگە دە اللادان ايرىقشا باق بوپ قونعان. ءدۇريا دارىن. بەردىبەگىڭىزگە دە ءبىر عانا حاق تاعالا دارالاي دارىتقان. تابيعات انا ارقىلى اياماي توككەن. توگىلمە تالانت.
وزىنشە نەگە ورشەلەنىپ وتىر دەمەڭىز. وزگەلەرگە دە قۇلاق قويىڭىز. باقاستىقتان بويلارىن اۋلاعىراق ۇستاعاندار باعاسىن بىلگەن. بىلگەنىن بەدەرلەگەن. جۇرەكتەگىلەرىن جازعان. قازاعىڭىزدىڭ قادىرى, الاشىڭىزدىڭ اقيىق اقىنى, شاندوز شايىرى مىرزا ءالى ءبۇي دەگەن: «ءبارىمىز دە بالا بولدىق. قازىر ەسەيدىك, ەرەسەك تارتتىق. دەگەنمەن, سوناۋ كەزىمىزدەگىدەي پاك ەمەسپىز. ال سول كوڭىل-كۇيىمىزدى اينا-قاتەسىز بەينەلەگەن «مەنىڭ اتىم قوجانى» بارلىعىمىز وقىپ شىقتىق. ءبىز سونى جازعان بەردىبەك اعامىزعا سول كەزدە-اق مەملەكەتتىك سىيلىعىن سىيلاپ قويعانبىز».
انەكيىڭىز. كوردىڭىز بە؟! سوقپاقباەۆتىڭ «مەنىڭ اتىم قوجاسى» دا, «بالالىق شاققا ساياحاتى» دا, «ولگەندەر قايتىپ كەلمەيدىسى» دە, اڭگىمەلەرىن «قايداسىڭ, گاۋھار؟» اتتى عاجايىپ حيكاياتىمەن توپتاساڭىز دا, ارقايسىسى ءبىر-ءبىر مەملەكەتتىك سىيلىققا ابدەن-اق لايىق ەدى. امال قانشا, بەرىلمەدى بىرەگەي بەردىبەككە. قايران, قادىر اعامىز سوناۋ الپىسىنشى جىلدارىڭىزدىڭ ورتا تۇسىندا-اق سىيلاپ قويعان ەكەن. مەمسىيلىعىڭىزدى. وزىنشە. ەل كوكەيىندەگىنى ەلگەزەك سەزىپ. مىڭ العىس!
تۋراسىنان تارتاتىن تازا اعالارىمىزدىڭ تاعى ءبىرى مۇزافار الىمباەۆتى تىڭداڭىز: «بەردىبەك سوقپاقباەۆ − سوزىنە بەرىك, ىسىنە ۇقىپتى جان. مەن بىلەتىن جازۋشىلاردىڭ ىشىندەگى قاراپايىم, شارۋاقورى. وزىنە دە, وزگەگە دە قاتال, تۋرا, ءادىل. ءتىل ونەرىندە دە سولاي: ءار ءسوزدىڭ, ءار سويلەمنىڭ ءوز ورنىندا تۇرعانىن قالايدى. بەردىبەك سوقپاقباەۆتىڭ كىتاپتارىنىڭ سوڭعى بەتىن جاپقاندا, ءوزىڭنىڭ ەڭ تاتۋ-ءتاتتى دوس, جولداستارىڭدى ۇزاق ساپارعا شىعارىپ سالعانداي بولاسىڭ. قيمايسىڭ. كوڭىلىڭ بۇزىلادى. جازۋشى ءۇشىن بۇدان اسقان باقىت بولۋى مۇمكىن ەمەس».
كلاسسيك قالامگەرىمىز تاحاۋي احتانوۆ تا اعىنان جارىلادى: «قوجا بەينەسى – قازاق بالالار ادەبيەتىنە قوسىلعان قوماقتى ولجا. ونىڭ ەڭسەسى بارعان سايىن بيىكتەپ, مارك تۆەننىڭ توم سويەرىمەن, اركادي گايداردىڭ تيمۋرىمەن, قازاق فولكلورىنىڭ تازشا بالاسىمەن تايتالاسپاي-اق, ءتىپتى سولارعا جەتەقابىل جۇرگەنىنىڭ ءوزى ادەبيەتىمىز ءۇشىن از بەدەل مە؟!».
«جازادى – ءتۇبىن ءتۇسىرىپ بارىپ ءبىر-اق توقتايدى. بۇل – بەردىبەكتىڭ شىرايى, بەردىبەككە عانا ءتان نارسە», – دەيدى سايىن مۇراتبەكوۆ. «ساياساتتان سايا ىزدەمەي, رەسمي يدەولوگيانى ىقتاماي وتكەن بەردىبەك شىعارمالارىندا ءوز تەندەنتسياسىن بەرىك ۇستانىپ, سونىسىنان اينىماي, اقيقاتشىلدىقتى تەمىرقازىق تۇتتى. ءوزى قالتقىسىز بىلەتىن ءومىردى عانا قالتقىسىز جازىپ كەتتى», – دەيدى جاساندىلىققا جانى قاس قالامگەرىڭىز قاستەك بايانباي.
ويپىراي! دەيسىز. وسىنشاما ويىپ-ويىپ بادىزدەلگەن بايىپتامالارعا قاراماستان, بەردىبەك سوقپاقباەۆ نەگە باعاسىن الا الماعان؟! مەمسىيلىقتان قالايشا قاعىس قالعان؟!
ەندى وتكەن عاسىرىڭىزدى قويا تۇرىپ, قازىرگى كەزەڭگە كەلەيىك. بۇگىنىمىزدىڭ ۇنىندەي, تاۋەلسىزدىگىمىزدىڭ گ ۇلىندەي ءبىلىمپاز بالامىز, سىن الەمىندەگى سونىلىقتىڭ ۇلگىسىن تانىتىپ جۇرگەن تالانتىمىز امانگەلدى كەڭشىلىك ۇلى اقيقاتشىل اتاسى بەردىبەك سوقپاقباەۆتىڭ قالامىنان تۋعان شىعارمالاردا ينەنىڭ جاسۋىنداي دا جاساندىلىق جوق ەكەنىن جان-جاقتى دالەلدەيدى. وقىرمان ءوسپىرىم, جانى ءمولدىر جاس وسكىن كەزىندەگى اسەرى ارقىلى. قازىرگى قازاق سىنىنداعى شەرتپە كۇيشىدەيىن شىمىرلاتا شەر تارقاتار, تۇڭعيىققا تارتار سىرلى سازى ارقىلى. امانگەلدىنىڭ بەردىبەك حاقىنداعى ءدۇر دۇنيەسىنەن ءۇزىندى كەلتىرسەك, ۇزاڭقىراپ كەتەرمىز. اركىمنىڭ ءوز كوزىمەن زەيىندەي زەردەلەمەگى ابزال شىعار.
عالامتورسىز وتىرا المايسىز. قارايسىز. بۇگىنگى وقىرماندارىڭىزعا قوسىلا تولعاناسىز: «بەردىبەك اعامىز شىنىندا دا ءوز باعاسىن الا الماي جۇرگەن ۇلى جازۋشى», «وكىنىشكە قاراي, بەردىبەك تۋرالى گازەت بەتتەرىندە وتە از ايتىلادى». امانگەلدى جاقسى ايتىپتى. «ول كىسى بالالار جازۋشىسى عانا ەمەس, بالا تۋرالى ايتا وتىرىپ, ۇلكەن ماسەلە كوتەرگەن كلاسسيك». «بەردىبەك اعامىز – قازاقتىڭ مارك تۆەنى». «كىتاپ دۇكەندەرىنەن بەردىبەك سوقپاقباەۆتىڭ دۇنيەلەرىن قانشا ىزدەسەك تە, تاپپايمىز». «سوقپاقباەۆ شىعارمالارى بالالاردى جاقسى ىسپەن اينالىسۋعا تالپىندىراتىن ۇلگى-ونەگەگە تولى دەپ ەسەپتەيمىن. «جەكپە-جەكتى» وقىعان سوڭ مەندە سپورتقا دەگەن قۇلشىنىس پايدا بولىپ, بوكسپەن اينالىسۋعا يتەرمەلەدى».
مىنەكيىڭىز, وسىلايشا جالعاسار وي-پىكىرلەر از ەمەس.
بۇگىنگى تاڭداعى بۇلا تالانت يەلەرىنىڭ ءبىرى, جاڭاشىل ىزدەنىستەرىمەن ءسۇيسىنتىپ جۇرگەن جاس قالامگەر الماس ءنۇسىپ بالامىز دا بىرازىراق بۇرىن «قازاق ادەبيەتى» گازەتىنىڭ تۇتاس بەتىندە بەردىبەك اتاسىنىڭ تۋىندىلارى تۋراسىندا تەبىرەنىسكە ءتۇستى. كۇنى كەشە عانا ىرگەلى سۋرەتكەرىمىز دۇكەنباي دوسجاننىڭ دۇنيەسىن «جۇلدىز» جۋرنالىنان وقىپ ريزالاندىق. دۇكەڭ «بەردىبەك سوقپاقباەۆ» اتتى ەسسەسىنىڭ سوڭىندا ءبۇي دەپتى: «كوپ ۇزاماي, ەشكىمگە مىندەتسىنبەي, ەشكىمنەن جاقسىلىق, جارىلقاۋ كۇتپەي, ەشكىمنىڭ سىباعاسىن, نەسىبەسىن قىزعانباي... مىنا جارىق جالعاننىڭ ەمەن ەسىگىن اقىرىن عانا جاۋىپ... ەندى قايتىپ كەلمەيتىن باقي جالعاننىڭ ولكەسىنە جونەلىپ كەتە بەردى. سوڭىندا ەت-جۇرەكتى سىزداتقان ساعىنىش قانا قالدى. كوپ سىرى ىشىندە كەتتى. قۇلپى بەرىك, التىن ساندىقتاي اعامىزدىڭ جان سارايىن اشىپ ءالى تالاي ەستەلىك جازىلار, ءالى تالاي اۋەزدى اڭگىمە ايتىلار-اۋ».
دۇكەڭ كوكەم اڭعارتقانداي, وسى «كوپ سىرى ىشىندە كەتتى» دەگەندى بەكەڭ جونىندە جازعانداردىڭ ءبارى دەرلىك كەۋدەلەرىن كۇرسىنىس كەرنەي مەڭزەيدى. نەگە؟ جۇمباق. ادامزاتىڭىزدىڭ ابايىنان دا انتالاعان, شەشىلمەيتىن جۇمباق قوي ول.
تىرىسىندە تيىسىنشە باعالانباعاندار, كوزى كەتكەننەن كەيىن دە باعاسىن الا الماعاندار از ەمەس, ارينە. قايران قاسىم امانجولوۆ تا سوندايلاردىڭ سويىنانتۇعىن. اللاعا شۇكىر, الدى. باعاسىن. ورتالىق قازاقستانىمىزدىڭ وتتى جۇرەگىندەي, بۇكىل بايتاعىمىزدىڭ بولات بىلەگىندەي بىرەگەي قالامىز قاراعاندىنى قازاق بالاسى بۇرىنعىدان بەتەر قادىر تۇتاتىن بولدى. قاراعاندى وبلىسىنىڭ سول كەزدەگى اكىمى سەرىك نىعمەت ۇلى احمەتوۆكە العىس جاۋعاي. سوڭعى جىلدارى وتكەن مەرەيتويلاردىڭ ىشىندە قاسىم مەرەكەسىنىڭ ءجونى بولەك, جوسىعى ەرەك بولعانى راس. امانجولوۆتىڭ الىپ ەسكەرتكىشى ەڭسەلەندى. «قاسىم امانجولوۆ جانە جاڭا ءداۋىر پوەزياسى» اتتى رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلدى. توم-تومداپ جىر جيناقتارى جارىق كوردى. استانا قالاسىنىڭ ۇلكەن كوشەسىنە قاسىمنىڭ ەسىمى قويىلدى. جوندەمدى ۇيگە قولى جەتپەي-اق كەتكەن امانجولوۆتىڭ ەكى قىزىنا جاڭا پاتەرلەردىڭ كىلتى تابىستالدى. ءمۇشايرا مەن اقىندار ايتىسىندا جىر دۇلدۇلدەرى ۇلىقبەك ەسداۋلەت پەن اينۇر تۇرسىنباەۆا ءبىر-ءبىر «دجيپ» اۆتوكولىگىن ءمىندى...
قاسىم امانجولوۆتايىن اياۋلىمىزدى ايتقاندا, بەردىبەك سوقپاقباەۆ سىندى ساڭلاعىڭىزدىڭ ويعا ورالا بەرەتىنى نەلىكتەن ەكەن...
سونىمەن, ماعلۇم بولدى: بەردىبەك سوقپاقباەۆىڭىز – تەڭدەسسىز تىرلىك تىندىرعان تۇلعا. تاۋەلسىزدىگىڭىز تۇسىندا دا ەگەمەن ەلىنە ەڭبەك سىڭىرۋدە. ارتىندا قالعان اقيقاتشىل دۇنيەلەرىمەن. بولاشاقتا دا بەكەڭ قازاقتىڭ قانشاما ۇرپاقتارىن تالىمدەپ-تاربيەلەي بەرمەكشى. ولمەس تە وشپەس, ونەگەلى ونەرىمەن. وزىنە عانا ءتان ورنەگىمەن.
كەلەسى جىلى كوركەمدىك جىرشىسىنىڭ تۋعانىنا 90 جىل تولادى. نە ىستەمەك كەرەك؟ جۇرتشىلىقتىڭ پىكىرىنە دەن قويساق: «قىم-قۋىتتانعان ۋاقىتتان ءبىر ءسات بەردىبەك باعىتىنا بۇرىلساق. ەلدىگىمىزدى, مەملەكەتتىگىمىزدى, قازاقتىعىمىزدى, ۇلت رەتىندە وسكەندىگىمىزدى تانىتساق. بولاشاعىمىزدى باياندى ەتە تۇسپەكتى تەرەڭىرەك پايىمداپ, پاراساتتىلىققا جۇگىنسەك. وسى ماقساتتا ۇكىمەتىمىز بەردىبەك سوقپاقباەۆتىڭ تۋعانىنا 90 جىل تولۋى تۋراسىندا تولىققاندى قاۋلى قابىلداسا. سول قۇجاتقا سايكەس جاۋھار جازۋشىڭىزدىڭ بەس تومدىق تۋىندىلار جيناعى بيۋدجەت قارجىسى نەمەسە ۇلتتىق كومپانيالار قولداۋىمەن اسپەتتەي ادىپتەپ, قولعا ۇستاعاندا كوڭىل سۇيسىنەرلىكتەي, سانا ساۋلەنەردەي ەتىپ, كەم دەگەندە 10 مىڭ تارالىممەن شىعارىلسا. بالالارىمىز بەن نەمەرلەرىمىزدىڭ قامىن, جاس ۇرپاق تاربيەسىن ەسكەرە وتىرىپ, بەس تومدىقپەن عانا شەكتەلمەي, جەكەلەگەن شىعارمالارىن «مەنىڭ اتىم قوجا», «ولگەندەر قايتىپ كەلمەيدى», «جەكپە-جەك», «قايداسىڭ, گاۋھار؟» دەگەن اتتارمەن الۋان ءتۇرلى ديزاينمەن, مول تارالىممەن كىتاپ ەتىپ باسسا, شىركىن-اي. مارك تۆەندەر تاقىلەتتەس. رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلسا. ەلىمىزدە داستۇرگە اينالعان «ءبىر ەل – ءبىر كىتاپ» اكتسياسى الداعى جىلى بەردىبەك سوقپاقباەۆقا ارنالسا. استانا مەن الماتى جانە تالدىقورعان قالالارىنان ءبىر-ءبىر كوشەنىڭ, ەلوردامىزدا جاڭادان اشىلعان مەكتەپتەر مەن كىتاپحانالاردىڭ بىرىنە اتى بەرىلسە. الماتىنىڭ اسەم ءبىر الاڭى نەمەسە ساياجولى مەن گۇلزارىنا ءازىل-قالجىڭى مەن تەرەڭ ويى, بالا مىنەزى مەن ءمولدىر مۇڭى, «كوپ سىرى ىشىندە كەتكەن» كەيپى بەينەلەنگەن ەرەكشەلەۋ ەسكەرتكىشى قويىلسا. اۋماق-الاڭ جاعىنا ساراڭدىق جاساماي-اق, كەرەمەت كەيىپكەرلەرىمەن قوسا كەشەن-ەسكەرتكىش جاسالسا شە؟! عاجاپ جاڭالىق بولار ەدى-اۋ! تۋىپ-وسكەن اۋىلى مەن اۋدانىنان, ەڭ بولماعاندا, ەسىمىن ەنشىلەگەن ەكى مەكتەبىنىڭ بىرىنەن كەڭ-مولداۋ مۋزەي جابدىقتالماسا, ءجۇدا ۇيات بولاتىن سياقتى.
ۇكىمەتىمىز كوپ كەشىكپەي ارنايى قاۋلى قابىلدايتىن شىعار دەگەن وقىرماندار جەتىپ-ارتىلىپ جاتىپتى. ۇلت سۋرەتكەرى ۇمىت قالماس. سەنەمىز وسىعان. «ەلەگەي ەگەمەن ەل ەر-داناسىن; بىرەگەي بەردىبەكتىڭ بەر باعاسىن!» دەپ شايىر شىرىلدايدى...
ما رحابات بايعۇت,
جازۋشى, قازاقستاننىڭ
ەڭبەك سىڭىرگەن قايراتكەرى.
شىمكەنت.
