كەزدەسۋ اياسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ «رۋحاني جاڭعىرۋ» باعدارلاماسىن جۇزەگە اسىرۋ ماسەلەلەرى جانە «پەداگوگ مارتەبەسى تۋرالى» زاڭنىڭ نەگىزگى ەرەجەلەرى تالقىلاندى. قابىلدانعان «پەداگوگ مارتەبەسى تۋرالى» زاڭ ءبىلىم بەرۋ سالاسى قىزمەتكەرلەرىنىڭ قۇقىقتارى مەن الەۋمەتتىك قورعالۋىن قامتاماسىز ەتۋمەن قاتار, ەلىمىزدەگى پەداگوگيكا قاۋىمىنىڭ مارتەبەسىن ارتتىرۋعا جانە مۇعالىم بەدەلىن كوتەرۋگە باعىتتالعانى ايتىلدى.
دەپۋتات تولەۋبەك مۇقاشەۆ قازاقستان رەسپۋبليكاسى پارلامەنتى سەناتىنىڭ ءبىر جىل ىشىندە اتقارعان جۇمىسى تۋرالى حاباردار ەتتى جانە «پەداگوگ مارتەبەسى تۋرالى» جاڭا زاڭنىڭ ماڭىزىنا توقتالدى. «كوپتەگەن جىلدار بويى ءبىزدىڭ ۇستازدارىمىزدىڭ مارتەبەسى مەن بەدەلى تومەندەپ كەتتى. جاڭا زاڭدا مۇعالىمدەردى الەۋمەتتىك قولداۋ, ولاردىڭ قىزمەتى مەن شىعارماشىلىعى جانە قۇقىقتارىن قورعاۋ ماسەلەلەرى بەلگىلەندى. بۇل قۇجات بۇگىنگى تاڭدا پەداگوگتاردىڭ قولداۋىنا يە بولىپ وتىر», - دەدى سەناتور.
اباي اتىنداعى قازۇپۋ پەداگوگيكا جانە پسيحولوگيا ينستيتۋتىنىڭ ديرەكتورى, پروفەسسور بەرىكجان المۇحامبەتوۆ ەلىمىزدىڭ پارلامەنتىندە وتكەن وتىرىستار مەن ۇكىمەت ساعاتتارىندا ءبىلىم بەرۋ ساپاسىنا بايلانىستى وزەكتى ماسەلەلەر ۇدايى كوتەرىلىپ, ۇنەمى نازاردا بولاتىنى ءۇشىن العىسىن ءبىلدىردى.
جاراتىلىستانۋ جانە گەوگرافيا ينستيتۋتىنىڭ ديرەكتورى, پروفەسسور كۇلاش قايمولدينوۆا بۇگىنگى تاڭدا وقۋلىقتاردىڭ ساپاسىنا بايلانىستى سىن-پىكىرلەر كوپ ەكەنىن اتاپ ءوتتى. «ويتكەنى وقۋ باعدارلامالارى جوعارىدان كەلىپ تۇسەدى. وقۋلىقتار وسى باعدارلامانىڭ نەگىزىندە جازىلادى, ال باعدارلامادا وقۋشىلارعا ءتۇسىنۋدى قيىنداتاتىن ماسەلەلەر كوپ. سوندىقتان باعدارلامالاردى ويلاستىرۋ قاجەت. سوندا عانا وقۋلىق ساپالى بولادى», - دەدى ك.قايمولدينوۆا.
كەزدەسۋدە ءبىلىم ساپاسىنا قاتىستى باسقا دا وزەكتى ماسەلەلەر تالقىلاندى. ماسەلەن, ونەر, مادەنيەت جانە سپورت ينستيتۋتىنىڭ ديرەكتورى توققوجا قوجاعۇلوۆ بۇگىنگى كۇنى ورتا مەكتەپتەردە سىزۋ, سۋرەت جانە ەڭبەك پاندەرى بىرىكتىرىلىپ, ولارعا بولىنگەن ساعاتتار قىسقارتىلعانىن اتاپ ءوتتى. بۇل جاس ۇرپاقتىڭ ونەر پاندەرى بويىنشا لايىقتى ءبىلىم الا الماۋىنا اكەلىپ سوعادى. سىزۋ مەن ساۋلەت جانە ديزاينعا بايلانىستى تەحنيكالىق جوعارى وقۋ ورىندارىنا ءتۇسۋدى جوسپارلاپ جۇرگەن مەكتەپ تۇلەكتەرى وسى سالالار بويىنشا دايىندىعى بولمايدى جانە كوپتەگەن قيىندىقتارعا تاپ بولادى. ۇستازدار قاۋىمى وسىعان بايلانىستى ماسەلەنى شەشۋگە كومەك كورسەتۋدى سۇرادى.
