بۇل تۋرالى ايماقتىڭ «الەۋمەتتىك كارتاسىنداعى» مىندەتتەردىڭ ورىندالۋى جايىندا ەسەپ بەرگەن وبلىس اكىمىنىڭ ورىنباسارى باتىرجان بايجۇمانوۆ مالىمدەدى. بەلگىلى بولعانداي, 2019 جىلى وڭىردەگى ورتاشا ايلىق ەڭبەكاقى مولشەرى 137 054 تەڭگەنى قۇراعان. بۇل كورسەتكىش 2018 جىلمەن سالىستىرعاندا 20,6 پروتسەنتكە وسكەن. ال ناقتى ءوسىم كورىنىسى 14,7 پروتسەنت شاماسىندا بولعان. جالپى, ايماقتاعى ەڭ جوعارعى جالاقى قارجى سالاسى مەن ساقتاندىرۋ قىزمەتكەرلەرىنە تيەسىلى. ولاردىڭ ايلىعى – 211 241 تەڭگە. ال ەڭ تومەنگى, 78 939 تەڭگە جالاقىنى اكىمشىلىك جانە قوسالقى قىزمەت كورسەتۋ سالاسىندا ەڭبەك ەتەتىندەر الادى ەكەن.
-مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, بيىل الەۋمەتتىك سالا قىزمەتكەرلەرىنىڭ جالاقىسى كوبەيمەك. اتاپ ايتقاندا, وڭىردەگى 60 مىڭنان استام مۇعالىمنىڭ جالاقىسى 25 پروتسەنتكە, مادەنيەت, ونەر, سپورت جانە مۇراعات سالاسىنداعى 5 مىڭ قىزمەتكەردىڭ جالاقىسى 30 پروتسەنتكە ارتسا, 3 800 دارىگەردىڭ ايلىعى 30 پروتسەنتكە جانە 12 200 مەدبيكەنىڭ تابىسى 20 پروتسەنتكە وسەدى. سونداي-اق وبلىستاعى 3 100 الەۋمەتتىك قىزمەتكەردىڭ دە جالاقىسىنا ورتاشا ەسەپپەن 30 پروتسەنتكە دەيىن ۇستەمە قوسىلادى, دەدى وبلىس اكىمىنىڭ ورىنباسارى باتىرجان بايجۇمانوۆ.
