دوڭگەلەك ۇستەلگە قاتىسۋشىلاردىڭ ءبىرى, №22 «الەم» بالاباقشاسىنىڭ ادىسكەرى ولگا گەلەۆەريا تاربيەشىلەر قۇقىعى مۇعالىمدەرمەن تەڭ دارەجەدە ەكەندىگىن اتاپ ءوتتى. بۇل پەداگوگيكالىق شەبەرلىگى ءۇشىن اقى تولەۋدەن, دەمالىس مەرزىمىنىڭ ۇزارۋىنان كورىنىس تاپقاندىعىن تىلگە تيەك ەتتى.
«زاڭدا پەداگوگتار جالاقىسىن وسى جىلدان باستاپ 25%-عا ارتتىرۋ قاراستىرىلعان. بۇل قۋانىشتى حابار, سەبەبى مەكتەپكە دەيىنگى ۇيىمدارداعى پەداگوگتارىنىڭ جالاقىسى جوعارى ەمەس. سونىمەن قاتار تاربيەشىلەرگە پەداگوگيكالىق شەبەرلىگى ءۇشىن جالاقى كولەمىنە ساي 30% -دان 50%-عا دەيىن اقى تولەنەتىن بولادى. قازىرگى كەزدە تاربيەشىلەر مۇعالىمدەرمەن تەڭ قۇقىلى.
سونداي-اق مەكتەپكە دەيىنگى ۇيىمدار ۇستازدارىنا دەمالىس مەرزىمى 56 كۇنگە دەيىن ۇزاردى. ودان بولەك, پەداگوگتارعا نەگىزسىز ءتىل تيگىزگەنى ءۇشىن ايىپپۇل قاراستىرىلعان» دەدى ولگا گەلەۆەريا. سونداي-اق جاڭا زاڭ تۋرالى پىكىرىمەن كولىك جانە كوممۋنيكاتسيا كوللەدجىنىڭ ديرەكتورى, ءماسليحات دەپۋتاتى زۋلفۋحار گايپوۆ ءبولىستى.
«بىزگە زاڭنىڭ 8 بابىنىڭ 4-تارماعى ۇنايدى. ول بويىنشا نەگىزگى جۇمىس ورنى مەملەكەتتىك مەكەمە بولاتىن پەداگوگتارعا فيلوسوفيا عىلىمدارىنىڭ دوكتورى دارەجەسىنە, سونداي-اق عىلىم كانديداتى عىلىمي دارەجەسى ءۇشىن 17 اەك (45 مىڭ تەڭگە), عىلىم دوكتورلارىنا 34 اەك (90 مىڭ تەڭگە) كولەمىندە اقى تولەنەدى دەپ ايتىلعان. بۇل پەداگوگتار ءۇشىن ۇلكەن ىنتالاندىرۋ» دەدى ول.
قالا اكىمى ورىنباسارىنىڭ ايتۋىنشا, «پەداگوگ مارتەبەسى تۋرالى» زاڭ – پەداگوگيكالىق قاۋىمداستىقتىڭ بەدەلى مەن ەلىمىزدەگى ءاربىر پەداگوگتىڭ ءرولىن نىعايتۋعا باعىتتالعان ماڭىزدى قادام.
«پەداگوگتاردىڭ جاعدايىن جاقسارتاتىن بارلىق نورمالار بەكىتىلدى, ماماندىق جاستار مەن وسكەلەڭ ۇرپاق ءۇشىن تارتىمدى بولادى. قازىرگى ۋاقىتتا كادرلاردىڭ جەتىسپەيتىنىن ەسكەرسەك, بۇل وزەكتى ماسەلە. بۇل زاڭ جاستاردى ىنتالاندىرۋعا مۇمكىندىك بەرەدى» دەدى باقتيار ماكەن.
اكىم ورىنباسارى زاڭدا پەداگوگتاردىڭ كاسىبي قىزمەتىندەگى قۇقىقتارى مەن مىندەتتەرى ەگجەي-تەگجەيلى كورسەتىلگەنىن, سونداي-اق ماتەريالدىق قامتاماسىز ەتۋ, كوتەرمەلەۋ مەن الەۋمەتتىك كەپىلدىكتەرگە قاتىستى نورمالاردى قامتيتىنىن اتاپ ءوتتى.
«پەداگوگتار ءۇشىن حالىقارالىق وليمپيادا جۇلدەگەرلەرى ءۇشىن ءۇش لاۋازىمدىق جالاقى مولشەرىندە ءبىر جولعى سىياقى تۇرىندە كوتەرمەلەۋ قاراستىرىلعان. سونداي-اق اۋىلدىق جەرلەردەگى وقىتۋشىلارعا جەر ۋچاسكەسىنە باسىم قۇقىق بەرىلگەن. ءاربىر باپ نورماتيۆتىك-قۇقىقتىق اكتىلەرمەن بەكىتىلگەن. ولار ءىس جۇزىندە ورىندالادى, قاعازدا بەتىندە قالمايدى. اتالمىش نورمالار بالالارمەن جۇمىس ىستەيتىن بارلىق تۇلعالارعا قاتىستى» دەدى ول.
ءوز بايانداماسىن باقتيار ماكەن ۇلى اقىن اباي قۇنانباەۆتىڭ قارا سوزىمەن قورىتىندىلادى.
«مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالاسى جارىق كوردى. ماقالا ءوز ۋاقىتىندا دەر كەزىندە شىقتى جانە ماڭىزدى دەپ سانايمىن. سەبەبى, ۇلى اقىننىڭ ارقاسىندا ءبىز بۇگىندە ۇستازدىقتىڭ جاقسىلىعىن ءتۇسىنىپ وتىرمىز. ول كىسىنىڭ «ادامنىڭ ادامگەرشىلىگىن جاقسى ۇستازىنان بىلۋگە بولادى» دەگەن جاقسى ءسوزى بار» دەپ ءسوزىن تۇيىندەدى اكىم ورىنباسارى.
