«قازبريگ» بىتىمگەرلىك بريگاداسىنىڭ «ىلە» پوليگونىندا اسكەري قىزمەتشىلەردىڭ بىتىمگەرلىك وپەراتسيالارداعى ءىس-قيمىلىنا جاتتىعاتىن وقۋ قالاشىعىنىڭ قۇرىلىسى اياقتالدى. قالاشىق قۇرىلىسى قازاقستان مەن اقش قورعانىس مينيسترلىگى اراسىنداعى بەس جىلدىق ىنتىماقتاستىق جوسپارى شەڭبەرىندەگى «بىتىمگەرلىك وپەراتسيالارى جونىندەگى عالامدىق باستاما» باعدارلاماسى بويىنشا جۇرگىزىلدى.
«قازبريگ» بىتىمگەرلىك بريگاداسىنىڭ «ىلە» پوليگونىندا اسكەري قىزمەتشىلەردىڭ بىتىمگەرلىك وپەراتسيالارداعى ءىس-قيمىلىنا جاتتىعاتىن وقۋ قالاشىعىنىڭ قۇرىلىسى اياقتالدى. قالاشىق قۇرىلىسى قازاقستان مەن اقش قورعانىس مينيسترلىگى اراسىنداعى بەس جىلدىق ىنتىماقتاستىق جوسپارى شەڭبەرىندەگى «بىتىمگەرلىك وپەراتسيالارى جونىندەگى عالامدىق باستاما» باعدارلاماسى بويىنشا جۇرگىزىلدى.
جاقىندا «ىلە» پوليگونىندا وقۋ قالاشىعىنىڭ رەسمي اشىلۋى بولىپ ءوتتى.
وعان قازاقستان قارۋلى كۇشتەرى اەروۇتقىر اسكەرلەرى قولباسشىسىنىڭ ءبىرىنشى ورىنباسارى – شتاب باستىعى, پولكوۆنيك تالعات يسمايلوۆ پەن اقش-تىڭ قازاقستان رەسپۋبليكاسىنداعى ەلشىسى كەننەت فەيرفاكس قاتىستى.
پوليگوندا بوي كوتەرگەن وقۋ قالاشىعى قالالىق كۆارتالدى يميتاتسيالاۋ ماقساتىنداعى ۇيلەردەن, كوشەلەر مەن قيىلىستاردان تۇرادى. قالاشىق قۇرىلىسىن اقش قارۋلى كۇشتەرىنىڭ «See Bees» («تەڭىز ارالارى») اسكەري ينجەنەرلىك بولىمشەسىنىڭ كومانداسى جۇرگىزدى. وقۋ قالاشىعى قالالىق جەردەگى اسكەري وپەراتسيالار نىسانى بولىپ تابىلادى جانە قالالىق جاعدايدا ۇرىس جۇرگىزۋ قيمىلدارىن پىسىقتاۋعا ارنالعان. قالاشىق مەتالدى كونتەينەرلەردەن تۇرعىزىلعان 17 عيماراتتان تۇرادى. ۇيلەردىڭ جاتتىعۋ كەزىندە اسكەري قىزمەتشىلەر كىرىپ-شىعاتىن ەسىك-تەرەزەلەرى جانە قالقالارى بار. قازاقستاندىق بىتىمگەرلەر بولىمشەسىنىڭ وقۋ قالاشىعىندا, سونداي-اق پاترۋلدىك جاساۋعا, عيماراتتى شابۋىلداۋعا, كەپىلگە الىنعانداردى بوساتۋعا جانە بىتىمگەرلىك وپەراتسيالارى شەڭبەرىندەگى باسقا دا ءىس-قيمىلداردى جۇرگىزۋگە مۇمكىندىگى بار.
ءىس-شاراعا قاتىسۋشىلار اعىمداعى جىلعى 10 تامىزدا «ىلە» پوليگونىندا باستالاتىن «دالا قىرانى» حالىقارالىق بىتىمگەرلىك وقۋ-جاتتىعۋلارى قارساڭىندا وقۋ قالاشىعىنىڭ پايدالانۋعا بەرىلۋىن ەرەكشە اتاپ ءوتتى. ال بيىل جاتتىعۋعا قازاقستان, ۇلىبريتانيا, اقش, گەرمانيا, شۆەيتساريا, يتاليا, ءتاجىكستان, قىرعىزستان باستاعان وننان استام مەملەكەتتىڭ اسكەري ءبولىمشەلەرى قاتىسادى. بىتىمگەرلەر ءۇشىن جاڭا وقۋ قالاشىعىنىڭ بازاسىندا ءىس-قيمىلدى پىسىقتاۋ قالالىق جاعدايدا تاپسىرمالاردى ورىنداۋدا ۇلكەن كەشەندى تاجىريبە بولارى انىق.
وقۋ قالاشىعىن تاپسىرۋ سالتاناتىنان سوڭ «قازبريگتىڭ» بىتىمگەرلىك بولىمشەسى جەرگىلىكتى جەردى تازارتۋ, "شابۋىلداۋ" ەلەمەنتتەرىن قامتىعان سىناق ساباقتارىن وتكىزدى. اسكەري قىزمەتشىلەردىڭ ايتۋىنشا, يميتاتسيالانعان عيماراتتاردا دايىندالۋ قالالىق جاعدايدا اسكەري وپەراتسيالار جۇرگىزۋگە شىنايى مۇمكىندىك بەرەدى.
«ەگەمەن-اقپارات».
