گرەكو-عا قوسىلۋ قازاقستاننىڭ سىبايلاس جەمقورلىققا قارسى ءىس-قيمىل سالاسىنداعى شەتەلدىك ارىپتەستەرمەن ءوزارا سەرىكتەستىگىن كەڭەيتۋدەگى كەزەكتى قادامى بولدى. بۇل سىبايلاس جەمقورلىققا قارسى ءىس-قيمىلدىڭ ۇلتتىق جۇيەسىن ودان ءارى جەتىلدىرۋ ءۇشىن ەۋروپا كەڭەسىنىڭ ساراپشىلىق الەۋەتىن تارتۋعا مۇمكىندىك بەرەدى.
– بىلتىر 30 جەلتوقساندا ەلىمىز ءتيىستى زاڭ جوباسىن راتيفيكاتسيالاپ, قازاقستان رەسمي تۇردە ەۋروپا كەڭەسىنىڭ سىبايلاس جەمقورلىققا قارسى مەملەكەتتەر توبىنىڭ (گرەكو) 50-ءشى مۇشەسى بولدى, – دەدى و.بەكتەنوۆ.
گرەكو-عا مۇشەلىك سىبايلاس جەمقورلىققا قارسى زاڭنامانىڭ ەۋروپالىق ستاندارتتارعا سايكەستىگىنە تۇراقتى مونيتورينگ جۇرگىزۋدى كوزدەيدى. بۇل ءوز كەزەگىندە ەلدە جۇرگىزىلىپ جاتقان سىبايلاس جەمقورلىققا قارسى ساياساتتىڭ تيىمدىلىگىن باعالاۋعا مۇمكىندىك بەرەتىن ەۋروپا كەڭەسى تاراپىنان اۋديت سانالادى. مونيتورينگ قورىتىندىسى بويىنشا ۇسىنىمدار ازىرلەنىپ, ولاردى ورىنداۋ ءۇشىن مەملەكەتتەرگە 18 اي بەرىلەدى.
سونىمەن قاتار قازاقستاندىق ساراپشىلار دا وزگە قاتىسۋشى ەلدەردىڭ مونيتورينگى ءۇشىن باعالاۋ توپتارىنىڭ قۇرامىنا ەنەدى. ولار قازاقستاننىڭ سىبايلاس جەمقورلىققا قارسى ساياساتىنىڭ پروگرەسسيۆتى ەلەمەنتتەرىن ۇيىمعا كىرەتىن باسقا ەلدەردە تاراتۋدا «جولسەرىك» بولادى.
سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى و.بەكتەنوۆ گرەكو-عا كىرۋ قازاقستانعا ەۋروپا كەڭەسى كونۆەنتسياسىنىڭ سىبايلاس جەمقورلىق ءۇشىن قىلمىستىق جاۋاپكەرشىلىك جانە باسقا دا ماڭىزدى حالىقارالىق نورماتيۆتىك قۇقىقتىق اكتىلەردى راتيفيكاتسيالاۋعا مۇمكىندىك بەرەتىنىن اتاپ ءوتتى.
– ولاردى راتيفيكاتسيالاۋ شەتەلدىك ارىپتەستەرمەن قىلمىسكەرلەردى ەكستراديتسيالاۋعا, شەتەلگە شىعارىلعان اكتيۆتەردى قايتارۋ بولىگىندە ودان ءارى ءتيىمدى ىنتىماقتاستىقتى دامىتۋعا مۇمكىندىك بەرەدى, – دەدى و.بەكتەنوۆ.
