سەبەبى وسى تاس جولدىڭ بويىندا ورنالاسقان كەمپينگكە الماتىدان دا, ەكاتەرينبۋرگتەن دە جولسوقتى بولىپ كەلە جاتقان جولاۋشىنىڭ توقتامايتىنى كەمدە-كەم دەسە بولادى. كەمپينگتىڭ اۋلاسىنا قاتار-قاتار توقتاعان جۇك ماشينالارى, جەڭىل كولىكتەر ءيىن تىرەسەدى.
– جولدىڭ قيىندىعىن جولاۋشىدان ارتىق كىمنەن سۇرايسىز؟ مىنا جۇك ماشينالارىنىڭ جۇرگىزۋشىلەرى مۇندا جۋىنىپ, ىستىق تاماق ءىشىپ الۋ ءۇشىن توقتايدى. قولايسىزداۋ بولسا دا ايتايىن, جول بويىندا جىلىتىلعان دارەتحانانىڭ بولماۋى دا جولاۋشى ءۇشىن شەشىمىن تاپپاي كەلە جاتقان شارۋا عوي. ال بىزدە تاۋلىگىنە مىڭ جارىم, جول جابىق كەزدە ەكى مىڭنىڭ سىرتىندا جولاۋشى توقتايدى. دارەتحانا مەن دۋش ءۇشىن ايىنا ءبىر مىڭ تەكشە مەتر سۋ كەتەدى. دارەتحانا تازالىعىن بىرنەشە تەحنيكالىق قىزمەتكەرلەر كۇن-ءتۇنى كەزەكپەن قاداعالايدى. تۇششى سۋدىڭ قىمباتتىعى ءوز الدىنا, – دەيدى كەمپينگتىڭ يەسى مارات ايتقازين.
راسىندا, مارات نۇرعالي ۇلىنىڭ سوزىنە ەشقانداي الىپ-قوسۋدىڭ قاجەتى جوق. بۇل جولاۋشىنىڭ بارلىعىنا دا بەلگىلى جول قيىندىعىنىڭ ءبىرى. جەلتوقسان ايىنىڭ باس كەزىندە قوستاناي وڭىرىندە تاۋلىككە جۋىق كوزگە تۇرتسە كورگىسىز بوران سوقتى. از ۋاقىتتا اينالانى قار باسىپ قالدى دا, جول پوليتسياسى بارلىق باعىتتاعى جولداردى جاۋىپ تاستادى. سول كۇنى قارابالىق كەمپينگىنىڭ الدىنا توقتاعان ۇلكەن جۇك جانە جەڭىل كولىكتەردىڭ سانىندا ەسەپ بولعان جوق. سىيماعان كولىكتەر ۇزىننان ۇزاق جولدىڭ شەتىنە توقتاپ, جۇرگىزۋشى, جولاۋشىلار كەمپينگكە كەلىپ, ىستىق تاماق ءىشىپ, جۋىنىپ-شايىنىپ, بوران باسىلعانشا دەمالدى.
اسحانا, دۇكەن, اۆتوكولىكتى ساقتاندىرۋ بەكەتى سياقتى جولاۋشى قاجەتىن وتەيتىن قىزمەتتىڭ بارلىعى بار. كەڭ جولاقتى ينتەرنەت تە ىستەپ تۇر.
ەلباسى نۇرسۇلتان نازارباەۆ 2014 جىلى قازاقستان حالقىنا جولداعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا «كولىك ينفراقۇرىلىمى – يندۋستريالىق ەكونوميكا مەن قوعامىمىزدىڭ تامىرىنا قان جۇگىرتەتىن جۇيە» ەكەنىن ايتا وتىرىپ, «لوگيستيكالىق قىزمەت كورسەتۋ سەكتورىن دامىتۋ قاجەتتىگىن» مىندەتتەگەن بولاتىن. كاسىپكەردىڭ 90-جىلدارى توقتاپ, قاڭقاسى قاراۋسىز تۇرعان ءسۇت زاۋىتى عيماراتىنىڭ جاڭاشا تۇرلەندىرۋىنە ەلباسىنىڭ وسى جولداۋى تۇرتكى بولىپتى.
قارابالىق كەمپينگى جولاۋشىلارعا قىزمەت كورسەتۋدى زاماناۋي دەڭگەيگە كوتەرگەن. «تەاتر كيىم ىلگىشتەن باستالادى» دەگەندەي, كەمپينگكە كىرە بەرىستە-اق كەلگەن كىسى تاڭدانىپ قارايتىن جاعدايدىڭ بارلىعى جاسالعان. ەڭ باستىسى, جولسوقتى جولاۋشى كەمپينگكە كىرە بەرگەننەن شىبىن تايىپ جىعىلاتىن تازالىق ونىڭ بويىن سەرگىتىپ سالا بەرەدى.
«مەن جۇمىس بابىمەن جولدا كوپ جۇرەمىن. قازاقستاننىڭ وزگە وڭىرىنەن ءدال مۇنداي كەمپينگ كەزدەستىرگەن ەمەسپىن. جاتار ورنىڭ تازا, تاماعى ءدامدى, ءىشى ءساندى. جول بويىندا وسىنداي كەمپينگتەر كوبەيگەنىن قالايمىن» دەپ جازادى كەمپينگتىڭ پىكىر قالدىرۋ كىتابىنا مۇحاممەد دەگەن جولاۋشى. ء«بىز سامارادان كەلە جاتىرمىز. كەمپينگە كىرگەندە ءوزىمىزدى ەۋروپادا جۇرگەندەي سەزىندىك. شىنىمىزدى ايتساق, مۇنداعى قىزمەت كورسەتۋدىڭ كاسىبي بىلىگىنىڭ جوعارىلىعى تاڭعالدىردى», دەپ جازادى ناتاليا مەن ياروسلاۆ گرەمۋحيندەر.
قوستاناي وبلىسى,
قارابالىق اۋدانى
