ماسەلەن, الماتى وبلىسىندا 660 بالا پوليتسيا ەسەبىندە تۇر ەكەن. ايماقتا 2019 جىلدىڭ 9 ايى ارالىعىندا كامەلەتكە تولماعان بالالاردىڭ قولىمەن 213 قىلمىس جاسالعانى انىقتالدى. جاسوسپىرىمدەرگە نەگىزىنەن «قىلمىستىق كودەكستىڭ» 188-بابى بويىنشا «بوگدە ادامنىڭ مۇلكىنە قول سالۋ» ايىبى تاعىلعان. جالپى, جاسوسپىرىمدەردىڭ قىلمىسقا بارۋى بىلتىرعى ەسەپتى مەرزىمىمەن سالىستىرعاندا 9 پايىزعا تومەندەگەن. وتكەن جىلى 9 ايدا 235 ءىس تىركەلگەن بولاتىن. ال تارتىپسىزدىگى شەكتەن شىققان وقۋشىلار سوت شەشىمىمەن ارنايى ورىندارعا جىبەرىلۋدە. قازىر الماتى قالاسىنداعى دەۆيانتتى مىنەز-ق ۇلىقتى بالالارعا ارنالعان مەكەمەدە 12 ءجاسوسپىرىم, شىعىس قازاقستان وبلىسىنداعى ەرەكشە رەجىمدەگى مەكەمەدە وبلىستىڭ 6 بالاسى تاربيەلەنىپ جاتىر.
بۇل – قوعامداعى وتباسى قۇندىلىعىنىڭ السىرەۋىنىڭ كورىنىسى ەكەنى داۋسىز. اسىرەسە اۋلەتتەردىڭ اجىراپ, بالا تاربيەسى الدىنداعى جاۋاپكەرشىلىكتى سەزىنبەۋى بەلەڭ العان. وكىنىشتىسى, ايماقتا اجىراسۋ دەرەگى دە از ەمەس. وبلىستىڭ سوت ورىنداۋشىلارى 2019 جىلدىڭ ون ايى ارالىعىندا 20 مىڭ اليمەنت بەرەشەگى بويىنشا ىسپەن اينالىسقان. قازىر ونىڭ 16 مىڭى وندىرىستە تۇرسا, 3 مىڭ ءىس ءوزارا كەلىسىم نەگىزىندە توقتاتىلعان كورىنەدى. ال اليمەنت تولەمەگەن 1000 ادامنىڭ جالپى قارىزى 800 ملن تەڭگەدەن اسىپ وتىر.
– جۇمىس بارىسىندا اليمەنت بويىنشا 211 بورىشكەر اكىمشىلىك جاۋاپقا تارتىلدى, سونىڭ ىشىندە 178 ادام 1 كۇننەن 5 كۇنگە دەيىن قاماۋعا الىندى. ال 4 بورىشكەر قىلمىستىق ىسكە تارتىلىپ, 1 جىلعا دەيىن باس بوستاندىقتارىنا شەكتەۋ قويىلدى. 188 بورىشكەردىڭ جەكە كۋالىكتەرىنىڭ قولدانىسى توقتاتىلدى. 266 بورىشكەرگە ىزدەۋ جاريالاندى. مەملەكەتتەن شىعۋعا 3,5 مىڭ بورىشكەرگە شەكتەۋ قويىلدى. 427 بورىشكەردىن مۇلكىنە تىيىم سالىنىپ, 21 بورىشكەردىڭ مۇلكى باعالانىپ ساتىلدى, – دەيدى الماتى وبلىسى جەكە سوت ورىنداۋشىلارى وڭىرلىك پالاتاسى باسشىسىنىڭ ورىنباسارى مۇحتار بايقۇلوۆ.
دەمەك, اجىراسۋدىڭ سوڭى جەتىمدىك قامىتىن كيگەن جاسوسپىرىمدەر سانىنىڭ ارتۋىنا اكەلىپ سوعاتىنى ءسوزسىز. وكىنىشتىسى, قوعامدا تاعدىر سىنىنا ۇشىراعان تۇل جەتىمدەردىڭ سانىنان اجىراسقان اتا-انالاردىڭ اراسىندا جۇرگەن «جارتىلاي جەتىمدەردىڭ» قاتارى كوپ ەكەن. تاعى دا الماتى وبلىسىنان مىسال كەلتىرەيىك. بۇگىندە ايماقتا اتا-انا قامقورلىعىنسىز قالعان 2810 بالا بار. سونىڭ ىشىندە 2267 بالا قامقورلىق قورعانىندا, 110 بالا پاترونات تاربيەسىندە, 56 بالا وتباسى ۇلگىسىندەگى بالالار ۇيىندە ءوسىپ جاتىر. ال 21 بالانى جەكە وتباسىلار اسىراپ العان. سونداي-اق 356 بالا الەۋمەتتىك باعىتتاعى ينتەرناتتاردا تاربيە الۋدا. ال وسى تىزىمدەگى 60 بالانىڭ جەكەمەنشىك ۇيگە قاقىلى, تاعى 197 بالانىڭ ءۇي يەلەنۋگە ۇلەستىك قۇقى بار ەكەن. 2750 بالا تۇرعىن ۇيگە مۇقتاج بولسا, مەملەكەتتىك باسپانا قورىنان ءۇي الۋ كەزەگىندە 2606 جەتىم بالا كەزەكتە تۇر. 2019 جىلى 115 بالانىڭ قۇجاتى قارالىپ, ولاردىڭ جيىرما بەسى كەرى قايتارىلعان. جالپى, وڭىردە 2015-2017 جىل ارالىعىندا 327 بالا تۇرعىن ۇيمەن قامتىلسا, سوڭعى ەكى جىل كولەمىندە 64 پاتەر ارنايى ءبولىنىپتى.
الماتى وبلىسى
