بتا-بانكتىڭ بۇرىنعى باسشىسى مۇحتار ءابىلازوۆ فرانتسيانىڭ تۇستىگىندەگى كاننى قالاسىنا جاقىن ماڭدا قاماۋعا الىندى. بۇل تۋرالى ءابىلازوۆ وتباسىلارى ادۆوكاتىنىڭ دەرەگىنە سۇيەنگەن بريتانيالىق Financial Times اتتى ىسكەرلەر گازەتى حابارلادى.
قازاقستاندىق وليگارحتى تۇتقىنعا الۋ وپەراتسياسىن فرانتسۋزدىڭ ارنايى قىزمەت ساربازدارى جۇزەگە اسىرعان سياقتى. باسىلىمنىڭ مالىمەتىنە قاراعاندا, ءابىلازوۆتى ءوز ەلىنە جەتكىزۋدى رەسەي بيلىگى وتىنگەن بولىپ شىقتى.
ادۆوكاتتىڭ ايتۋىنشا, بانكيردىڭ وتباسى مۇشەلەرى قازىر مۇنىڭ الدىندا ايەلى مەن قىزىنا جاسالعانى سياقتى, ونىڭ دا قازاقستانعا جونەلتىلۋىنەن قورقاتىنعا ۇقسايدى. قورعاۋشى سونىمەن قاتار ۇستالعان كەزىندە مۇحتار ءابىلازوۆتىڭ جانىندا وڭتۇستىك افريكا رەسپۋبليكاسىنان الىنعان پاسپورت بولعانىن ايتادى.
ازىرگە بۇل وقيعاعا بايلانىستى بۇدان باسقا اقپارات جوق.
بۇعان قوساتىنىمىز, قازاقستاندا مۇحتار ءابىلازوۆ وراسان زور مولشەردە اقشا ۇرلادى, ۇيىمداسقان توپ قۇردى دەگەن ايىپ بويىنشا ىزدەستىرىلىپ جاتقان بولاتىن. وعان بتا-بانكتىڭ 6 ميللارد دوللارعا جۋىق اقشاسىن الىپ كەتتى دەگەن كۇدىك تاڭىلدى. وعان قاتىستى رەسەي قۇقىق ورگاندارى دا قىلمىستىق ءىس قوزعادى. ەكى جاق تا ونىڭ سىرتىنان قىلمىستىق ءىس قوزعادى.
مۇرات ايتقوجا.
