قاسىم-جومارت توقاەۆ ماقالادا ابايدىڭ كوپ ءتىل بىلگەنىن ايتا كەلە, بۇگىنگى ۇرپاققا شەت تىلدەردى ۇيرەنۋ كەرەكتىگىن ايتادى. دامىعان ەلدەردىڭ ءتىلى مەن مادەنيەتىن ءبىلۋ ءۇشىن, ونىڭ قىر-سىرىن ۇعىنۋ ءۇشىن ەڭ اۋەلى ونىڭ ءتىلىن مەڭگەرۋ كەرەك. الداعى ۋاقىتتا ابايدىڭ قارا سوزدەرى مەن شىعارمالارى ون شاقتى تىلگە ءتارجىمالاناتىنى ەرەكشە قۋانتتى. بۇل ارقىلى وزگە مەملەكەتتەر دە اباي مۇراسىمەن تانىسا الادى. شەتەلدىكتەر ءبىزدى ابايدىڭ ەلى دەپ تانىپ جاتسا نۇر ۇستىنە نۇر بولار ەدى. سوندىقتان ابايدىڭ تاعىلىمدارىن ءبىرىنشى ورىنعا قويۋ كەرەك. بۇل جايىندا قاسىم-جومارت توقاەۆ ماقالاسىندا بايىپتى سارالاعان. بۇل جاي عانا ۇران دا ناۋقانشىلدىق تا ەمەس. راسىندا پرەزيدەنت ابايدىڭ حالقىنىڭ جەتىلگەنىن قالايتىندىعىن شىعارمالارىنان ۇزىندىلەر بەرە وتىرىپ, كەرەمەت مىسالدارمەن بايانداعان.
سونداي-اق ماقالادا اباي شىعارمالارى ارقىلى سانانى جاڭعىرتۋ كەرەكتىگى جازىلعان. ابايدى تەرەڭدەپ ءبىلۋ اسىرەسە جاستار ءۇشىن قاجەت ەكەنىن پرەزيدەنت استىن سىزىپ ايتىپتى. مەنىڭشە, بۇل ماقالا – ناعىز باعدارلامالىق ماقالا. بۇل – ەلدى, جاستاردى تاربيەلەيتىن تاعىلىمدى ماقالا. ۇلگى بەرەتىن دۇنيە. تەرەڭ وي تۇر, تەرەڭ ىزدەنىستەرگە جول سىلتەپ تۇر بۇل ماقالا.
سونىمەن قاتار ماقالادا مادەني شارالارعا دا ەرەكشە ءمان بەرىلەتىنى جازىلعان. الداعى ۋاقىتتا نەگىزگى وزەگى اباي تاقىرىبىنا ارنالاتىن رەسپۋبليكالىق جانە حالىقارالىق دەڭگەيدە تەاتر جانە مۋزىكا فەستيۆالدارى وتەدى. ماقالادا ءمالىم بولعانداي, ابايدىڭ تۋعان جەرىندەگى تاريحي-مادەني نىساندار جاڭا تالاپقا ساي جاڭعىرتىلىپ, ۇلى اقىننىڭ مەرەيتويىنا كەلەتىن جۇرتشىلىققا قولايلى جاعداي جاسالاتىن بولادى. ءسوز سوڭىندا مەملەكەت باسشىسى ابايدى ەڭ اۋەلى ءوز ەلىمىزدە تولىق تانىپ, سودان كەيىن شەتەلگە تانىتۋىمىز قاجەت ەكەنىن ايتادى. ول ءۇشىن عالىمدار اتسالىسۋ كەرەك دەگەندى العا تارتىپ وتىر.
ءادىل احمەتوۆ,
فيلولوگيا عىلىمدارىنىڭ دوكتورى,
پروفەسسور, قوعام قايراتكەرى
