بۇگىندە وڭاي ولجاعا قۇنىققانداردىڭ دانىككەندەرى سونشالىق, الداپ-ارباۋدىڭ ءتۇرلى ءادىس-ايلالارىن مەڭگەرىپ, قاراپايىم حالىقتى قان قاقساتۋدا. بۇعان دالەل ءىىد ءباسپاسوز قىزمەتىنىڭ جەتەكشىسى ارداگەر ءۋايديننىڭ ايتۋىنشا, تاياۋدا ءىىد-ءنىڭ كەزەكشى بولىمىنە 34 جاستاعى ەمبى تۇرعىنى حابارلاسىپ, 19 ساۋىردە اۋە قالاشىعى اۋدانىندا 33 جاستاعى ايەلدىڭ وعان نەسيە الىپ بەرۋگە كومەكتەسەتىنىن ايتىپ, 52 مىڭ تەڭگەسىن الىپ كەتكەندىگىن حابارلادى. كريمينالدى پوليتسيا كۇدىكتىنى قولعا ءتۇسىردى. ىلە-شالا پوليتسيا قىزمەتكەرلەرى 35 جاستاعى تاعى ءبىر ايەلدى ۇستاعان. ول تىيىم سالىنعان پاتەردى الىپ بەرەمىن دەپ, ەكى ايەلدىڭ بىرىنەن 80 مىڭ, ەكىنشىسىنەن 800 مىڭ تەڭگە الىپ, الداپ كەتكەن. 46 جاستاعى تاعى ءبىر اقتوبەلىك جوندەۋ جۇمىستارىن جۇرگىزۋگە ۋادە بەرىپ, 28 جاستاعى جىگىتتىڭ 200 مىڭ تەڭگەسىن قاعىپ كەتىپتى.
پوليتسياعا شاعىممەن كەلگەن 38 جاستاعى ايەل ءوزىنىڭ تانىسى 35 جاستاعى قۇربىسىنىڭ ۇيىنە كەلىپ, «نۇربانك» اق ارقىلى تومەن باعا بويىنشا پاتەر الۋعا كومەكتەسەتىنىن ايتىپ, 80 مىڭ تەڭگەسىن قولدى قىلعانىن ايتقان. ال 26 جاستاعى قىز بالا 27 جاستاعى تانىڭقىرامايتىن ءبىر جىگىتتىڭ نەسيەنى تولەپ تۇرامىن دەگەنىنە سەنىپ, ونىڭ اتىنا «كاسپي بانكىنەن» نەسيە راسىمدەپ, «سۋلپاك» ساۋدا ۇيىنەن ءتۇرلى-ءتۇستى تەلەديدار الىپ بەرگەن. قىز سەنىمىنە كىرگەن ازامات كەيىن ءىزىن سۋىتىپ, كورىنبەي كەتكەن. اقشا تابۋدىڭ ارام جولىن تاڭداعان اقتوبەلىك الاياقتار بەتتىڭ ارىن بەلگە ءتۇيىپ, اڭقاۋلاردىڭ اۋزىن ايعا قاراتىپ كەتۋگە ابدەن داعدىلانىپ العان. قازىر كىم-كورىنگەنگە سەنەتىن كەز ەمەس. سوندىقتان «مايشەلپەك» جاۋدىرۋعا دايىن «پىسىقتارعا» الدانىپ قالماۋعا تىرىسۋ كەرەك. «بۇل نە دەگەن باتپان قۇيرىق, ايدالادا جاتقان قۇيرىق» دەگەندەي, زاڭدى اينالىپ ءوتىپ, يگىلىككە قول جەتكىزەمىن دەۋ اۋرەشىلىك ەكەنىن ۇدايى ەستە ۇستاعان ءجون.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
