كەشە قاراعاندىنىڭ «شاحتەر» كومانداسى چەمپيوندار ليگاسىنىڭ ءۇشىنشى ىرىكتەۋ كەزەڭىنىڭ العاشقى ويىنىندا البانيانىڭ «سكەندەربەۋ» كلۋبىمەن كەزدەسىپ, 3:0 ەسەبىمەن جەڭىسكە جەتتى.
بۇل ماتچ ەلوردانىڭ «استانا ارەنا» ستاديونىندا اسا قىزىقتى جانە تارتىستى جاعدايدا ءوتتى. كەزدەسۋدە «شاحتەر» سالعان بەتتەن شابۋىلعا شىعىپ, قارسىلاستار قاقپاسىنا بىرىنەن سوڭ ءبىرى قاۋىپتى جاعدايلار جاساپ وتىردى. سونداي ساتتەردىڭ بىرىندە قاراعاندىلىقتاردىڭ ويىنشىسى دجيليچ ەسەپ اشىپ, كومانداسىن العا شىعاردى. وسىدان كەيىن دە «شاحتەر» البانداردىڭ ايىپ الاڭىنان شىقپاي, ەسەپتى ەسەلەۋگە بار كۇشىن سالدى. بىراق قوناقتاردىڭ قورعانىسىن بۇزا الماعان الاڭ يەلەرى ءبىرىنشى تايمدا جالعىز عانا گول سوعا الدى. ويىننىڭ ەكىنشى جارتىسىندا رومان مۇرتازاەۆ پەن سەرگەي حيجنيچەنكو ءبىر-ءبىر گولدىڭ اۆتورى اتاندى.
جالپى, بۇل كەزدەسۋدە «شاحتەردىڭ» بۇدان دا ۇلكەن ەسەپپەن جەڭىسكە جەتۋگە ءمۇمكىندىكتەرى بولدى. ماسەلەن, ويىننىڭ ءبىرىنشى تايمىندا قارسىلاستار قاقپاسىنا ءبىر ەمەس, بىرنەشە دوپ سوعۋعا مۇمكىندىگى بولسا دا, «شاحتەردىڭ» بارلىق ويىنشىلارى مۇنداي ءساتتى ءتيىمدى پايدالانا المادى. ەكىنشى تايمدا دا جاعداي وسىلاي قايتالاندى. بۇل ماتچتا «شاحتەرگە» ەۋروپا كوماندالارىمەن ويىندا ءالى دە تاجىريبە جەتىسپەيتىندىگىن كوردىك. وسىنداي ۇلكەن ەسەپپەن جەڭۋگە بولاتىن ويىندا وتانداستارىمىز ءۇش گولدى عانا قاناعات تۇتتى.
ەندى كەلەسى ويىن 6 تامىزدا البانيانىڭ تيرانا قالاسىندا وتەدى. وسى كەزدەسۋدە الاڭ يەلەرى «شاحتەردى» 4 دوپ ايىرماشىلىعىمەن جەڭبەسە, قاراعاندىلىقتار چەمپيوندار ليگاسىنىڭ پلەي-وفف كەزەڭىنە شىعادى. ەگەر وندا قارسىلاسىن جەڭسە, توپتىق كەزەڭگە, ال جەڭىلسە, ەۋروپا ليگاسىنىڭ توپتىق تۋرنيرىنە قاتىسادى.
داستان كەنجالين,
«ەگەمەن قازاقستان».
