بيىل 1 قاڭتاردان باستاپ ءتورت جانە ودان دا كوپ بالاسى بار وتباسىلارعا جەكە جاردەماقى بەرىلەدى. ەسكەرەرلىگى, بۇل ساناتتاعى وتباسىلاردىڭ بالالارى كامەلەت جاسىنا تولماعان نەمەسە 23 جاسقا دەيىنگى كۇندىزگى وقۋ ءبولىمىنىڭ ستۋدەنتى بولۋى شارت. بۇل جاردەماقى وتباسىنىڭ كىرىس دەڭگەيىنە قاراماستان بەرىلەدى.
اتاپ ايتقاندا, ءتورت بالاعا – 42 496 تەڭگە, بەس بالاعا – 53 127 تەڭگە, التى بالاعا – 63 757 تەڭگە, جەتى جانە ودان دا كوپ بالاسى بار وتباسىلارعا 74 388 تەڭگە جاردەماقى تاعايىندالدى. سونداي-اق باتىر انا, «التىن القا», «كۇمىس القا» القالارىمەن نەمەسە «انا داڭقى» وردەنىمەن ماراپاتتالعاندارعا اي سايىن 16 967 تەڭگە تولەنەدى.
سونىمەن بىرگە اتاۋلى الەۋمەتتىك كومەك بيىلدان باستاپ توقسان سايىن تاعايىندالادى. بۇل اتاۋلى الەۋمەتتىك كومەك كىرىسى وتباسىنىڭ ءار مۇشەسىنە شاققاندا كۇنكورىس مينيمۋمىنىڭ 70 پايىزىنان تومەن بولعان جاعدايدا بەرىلەدى. ياعني, بيىل كۇنكورىس مينيمۋمى 31 183 تەڭگە بولىپ بەلگىلەنگەنىن ەسكەرسەك, اتالعان سومانىڭ 70 پايىزى 21 828 تەڭگە بولۋى ءتيىس. اتاۋلى الەۋمەتتىك كومەك تابىسى تومەن بارلىق وتباسىنا تاعايىندالادى. ياعني, اتالعان ساناتتاعى كوپ بالالى وتباسىلار بالالاردىڭ جاردەماقىسىمەن بىرگە ااك تە الا الادى.
ااك الاتىن وتباسىلاردىڭ بالالارى كەپىلدىك بەرىلگەن الەۋمەتتىك توپتاماعا يە بولادى. ايتالىق, 1 جاستان 6 جاسقا دەيىنگى تابىسى از وتباسىلاردىڭ بالالارى ازىق-ت ۇلىك جيىنتىعىمەن جانە گيگيەنالىق قۇرالدارمەن, 6 جاستان 18 جاسقا دەيىنگى بالالار مەكتەپتەردە ىستىق تاماقپەن, وقۋ قۇرالدارىمەن جانە مەكتەپ كيىمدەرىمەن قامتاماسىز ەتىلەدى, سونداي-اق ولاردىڭ مەكتەپكە دەيىنگى جول ءجۇرۋ شىعىندارى وتەلەدى.
ااك ەسەپتەۋ كەزىندە قانداي كىرىستەر ەسەپكە الىنباق؟ ەڭبەك جانە حالىقتى الەۋمەتتىك قورعاۋ مينيسترلىگىنىڭ ااك الۋعا ءوتىنىم بەرگەن كەزدە قارايتىن كىرىستەرىنىڭ ىشىندە ەڭبەكاقى, زەينەتاقى, مۇگەدەكتىك جانە اسىراۋشىسىنان ايىرىلعاندارعا بەرىلەتىن جاردەماقى, كوپ بالالى انالارعا بەرىلەتىن جاڭا جاردەماقى, ارناۋلى مەملەكەتتىك جاردەماقى, ەڭبەك جاعدايىنىڭ اسا اۋىر جانە زياندى, اشىق تاۋ-كەن جانە جەراستى كاسىپورىندارىندا جۇمىس ىستەۋشىلەرگە ارناۋلى جاردەماقى, الەۋمەتتىك ساقتاندىرۋ قورىنان الەۋمەتتىك تولەمدەر, ءبىر جاسقا دەيىنگى بالا باعۋعا بەرىلەتىن جاردەماقى, ۇيدە وقيتىن مۇگەدەك بالالاردى وقىتۋ شىعىنىن وتەۋ, اتا-انا قامقورلىعىنسىز قالعان بالالار مەن جەتىمدەردى ءوسىرۋ ءۇشىن قامقورشىلارعا بەرىلگەن جاردەماقى, پاتروناتتىق تاربيەگە تاپسىرىلعان بالالاردى وسىرۋگە ارنالعان جاردەماقى, مۇگەدەك بالا تاربيەلەپ وتىرعان قامقورشىلار مەن اسىراپ الۋشىلارعا ارنالعان جاردەماقى, جۇمىس بەرۋشىلەر قارجىسىنىڭ ەسەبىنەن الەۋمەتتىك قامتاماسىز ەتۋ بويىنشا جاردەماقى, قالالىق قوعامدىق كولىكتەگى جولاقىعا ماتەريالدىق كومەك, كومەكتىڭ ناقتى تۇلەرىنىڭ باعاسى, سونىمەن بىرگە ونىڭ ورنىنا تولەنگەن سوما, تولەماقىنىڭ بارلىق تۇرىنە قوسىمشا تولەماقى, اليمەنت, كاسىپكەرلىك كىرىسى, جالعا بەرۋدەن نەمەسە ساتۋدان (جىلجىمايتىن م ۇلىك, كولىك) تۇسەتىن تابىس, قۇندى قاعازدار كىرىسى, م ۇلىكتى سىيعا نەمەسە مۇراعا الۋ, نەسيە مەن شاعىن نەسيە, قايتارىمسىز قاراجات الۋ, قارجىلاي سالىم مەن دەپوزيتتىڭ سىياقىسى, اقشالاي اۋدارىمدار, سونداي-اق بايقاۋدا, جارىستا, وليمپيادادا, فەستيۆالدە, لوتورەيادا جانە تاعى باسقا ۇتىستار قارالىپ, ەسەپكە الىنادى.
ەگەر جۇمىسپەن قامتۋ ورتالىعى وتباسىنىڭ ەڭبەككە قابىلەتتى مۇشەسىنە جۇمىس ۇسىنسا, ال اتالعان ۇسىنىس قابىلدانباسا وندا وتباسىنىڭ بارلىق مۇشەسىنە ااك تولەنبەيدى.
ااك راسىمدەۋ ءتارتىبى وزگەرگەن جوق. جاردەماقى تاعايىنداۋ ءۇشىن جۇمىسپەن قامتۋ ورتالىعىنا جەكە كۋالىك كوشىرمەسىمەن بىرگە ءوتىنىم بەرۋ قاجەت. سونداي-اق تۇرعىلىقتى جەرى بويىنشا تۇراقتى نەمەسە ۋاقىتشا تىركەۋ بولۋى ءتيىس. ءوتىنىم بەرىلگەننەن كەيىن جەتى جۇمىس كۇنى ىشىندە ءوتىنىم بەرۋشىنىڭ ۇيىنە كوميسسيا كەلىپ, تەكسەرۋ اكتىسىن تولتىرادى. وسىدان كەيىن عانا ااك تاعايىنداۋ تۋرالى شەشىم شىعارىلادى.
