وسكەمەندەگى اباي اتىنداعى وبلىستىق امبەباپ كىتاپحانا ۇجىمى جاقىندا شاكارىم قۇدايبەردى ۇلىنىڭ تۋعانىنا 155 جىل تولۋىنا وراي «ساحارانىڭ دانا ويشىلى» تاقىرىبىنداعى بيبليو-شاڭىراق جوباسىنىڭ اشىلۋ سالتاناتىن وتكىزدى.
ورتالىق ساياباقتاعى شاكارىم ەسكەرتكىشىنىڭ جانىنا قازاقى كيىز ءۇي قۇرىلىپ, ءىشى ۇلتتىق جيھازدارمەن, قولونەر بۇيىمدارىمەن, جادىگەرلەرمەن بەزەندىرىلدى. سونىمەن قاتار, قازىرگى زامانعا ساي زاماناۋي سورەلەر مەن ۇستەلدەرگە اقىن ءومىرى مەن شىعارماشىلىعىنا ارنالعان كىتاپحانا قورىندا بار ادەبيەتتەر مەن باسىلىم بەتتەرىنە شىققان ماقالالار قويىلدى. ۇلى عۇلامانىڭ شىعارمالارىن ناسيحاتتاۋ ماقساتىندا ونكۇندىك باعدارلاما ۇيىمداستىرىلدى.
اباي اتامىزدىڭ اقىن ءىنىسى, دارىندى شاكىرتى, مۇراگەرى, ءىزباسارى شاكارىم بابامىزدىڭ وشپەس مۇراسىن وسىلاي اسپەتتەپ, كەيىنگى ۇرپاققا جەتكىزۋدى وزىمىزگە پارىز سانايمىز. شاراعا قاتىسۋشىلارعا شاكارىم قۇدايبەردى ۇلىنىڭ اقىن, سازگەر, شەبەر اۋدارماشى, تەرەڭ ويشىل فيلوسوف, تاريحشى, تۇرىك ادەبيەتتەرىن دە زەرتتەگەن, جان-جاقتى ەنتسيكلوپەديالىق ءبىلىمى بار وقىمىستى بولعانىن اڭگىمەلەدىك. اقىن بابامىز ناقاق جالانىڭ قۇربانى بولىپ, گپۋ جەندەتتەرىنىڭ قولىنان قازا تاپتى, باقاناس اۋىلىنداعى «ساياتقورا» ماڭىنداعى قۇدىقتا 30 جىل بويى كومۋسىز جاتقان. 1961 جىلى احات شاكارىم ۇلىنىڭ ارقاسىندا عانا اعاسى ۇلى اقىن ابايدىڭ قاسىنا جەرلەندى.
مەرەكەلىك ونكۇندىك اياسىندا ۇيىمداستىرىلعان شارالار ورتالىق ساياباقتا, شاكارىم كوشەسىنىڭ بويىندا, جالعاسىن تابادى. اقىن شىعارماشىلىعىمەن كەڭىنەن تانىسقىسى كەلەتىن كوپشىلىك قاۋىم ءۇشىن قازاق ۇيىندە «ساحارانىڭ دانا ويشىلى» تاقىرىبىنداعى كىتاپ كورمەسى ون كۇن بويى قىزمەت ەتەدى.
شولپان ايكەباەۆا,
اباي اتىنداعى كىتاپحانا قىزمەتكەرى.
