كەشەلى بەرى الەمدىك عالامتور ۋكرايننىڭ اتاقتى كاسىپقوي بوكسشىسى ۆلاديمير كليچكونىڭ يسپانياداعى يبيتسانىڭ تۇنگى كلۋبتارىنىڭ بىرىندە ءوزىنىڭ بۇرىنعى قارسىلاسى دەرەك چيسورامەن شەكىسىپ قالعانى تۋرالى اقپاراتقا تۇنىپ تۇر.
«يسپانيا كۋرورتىنا دەمالۋعا كەلگەن اۋىر سالماقتاعى قوس بوكسشى كۇتپەگەن جەردەن تۇنگى كلۋبتا كەزدەستى. ءبىر-بىرلەرىن كورگەن بويدا سوزگە كەلىسىپ قالعان 37 جاستاعى ۋكراين مەن 29 جاسار بريتانيالىق جىگىتتىڭ ۇستاسۋى كوپ ۇزاماي توبەلەسكە ۇلاستى. ولاردىڭ تەكەتىرەسىن تەك كلۋبتىڭ ۋاقىتىندا جەتكەن كۇزەتشىلەرى عانا ارەڭ ايىرا الدى», – دەلىنگەن سول دەرەككوزدەردىڭ بىرىندە.
مۇنداي وقيعانىڭ ورىن العانىن چيسورانىڭ جاتتىقتىرۋشىسى دون چارلز دا جوققا شىعارا قويمادى.
«ءيا, ەكى بوكسشىنىڭ ءبىر-بىرىنە دەگەن كوزقاراسى ءتۇزۋ دەپ ايتۋ قيىن. بىراق ولار دەمالىپ جاتقان جەرلەرىندە تۇنگى كلۋبتا جوق جەردەن جولىعىپ قالدى», – دەپ مالىمدەدى ول.
ەستەرىڭىزدە بولسا, وتكەن جىلدىڭ اقپان ايىندا دۇنيەجۇزىلىك بوكس كەڭەسىنىڭ (WBC) نۇسقاۋى بويىنشا الەم چەمپيونى اتاعى ءۇشىن تارتىستى كەزدەسۋ الدىندا وتكەن ولشەۋ ءراسىمى كەزىندە بريتانيالىق بوكسشى ۋكراينالىق قارسىلاسى ۆيتالي كليچكونىڭ جاعىنان شاپالاقپەن تارتىپ جىبەرگەن ەدى. كەلەسى كۇنى كەزدەسۋ قارساڭىندا شىمقاي قارا ءتۇستى جىگىت باسەكەلەسىنىڭ ءىنىسى ۆلاديمير كليچكونىڭ بەتىنە تۇكىرىپ جىبەرگەن بولاتىن.
سول كەزدە ۆيتالي انگليالىق بالەقوردى بۇل قىلىعى ءۇشىن شارشى الاڭدا سىباعاسىن بەرەتىنىن ايتىپ ەدى. اقىرى سوڭىندا كليچكولاردىڭ ۇلكەنى سول سوزىندە تۇرىپ, قارسىلاسىن رينگتە ءبىراز توپەلەپ الدى. بىراق, نوكاۋتقا تۇسىرە المادى. ول وسىلايشا چيسورانى ۇپاي سانىمەن جەڭىپ شىقتى.
ارتىنان بۇكىلالەمدىك بوكس كەڭەسى چيسورانى الگىندەگى ادەپسىز قىلىعى ءۇشىن جازاعا تارتىپ, وعان $50 مىڭ ايىپپۇل سالعان بولاتىن. الايدا, بۇل جازا بريتاندىق سپورتشىنى اقىلعا شاقىرا الماعان ءتارىزدى. كليچكومەن بولعان كەزدەسۋدەن كەيىن بىرنەشە ساعاتتان سوڭ-اق ءباسپاسوز ءماجىلىسى ۇستىندە ول بۇكىلالەمدىك بوكس قاۋىمداستىعىنىڭ (WBA) نۇسقاۋى بويىنشا بۇرىنعى الەم چەمپيونى دەۆيد حەدپەن ۇستاسىپ ۇلگەردى. ءتىپتى, سول وقيعادان كەيىن ول دەۆيدتى اتىپ ولتىرەم دەپ قورقىتقانىن دا جۇرتشىلىق ءالى ۇمىتا قويماعان شىعار.
مىنە, سول دەرەك تاعى دا كورگەنسىز ارەكەتىمەن كوزگە ءتۇسىپ وتىر. دەرەككە ءوزى نە كەرەك؟
مۇرات ايتقوجا.
