2020 جىلدان باستاپ اەك تاعايىنداۋ ەرەجەسى مەن كوپ بالالى وتباسىلاردىڭ بالالارىنا بەرىلەتىن جاردەماقىلارىنا وزگەرىستەر مەن تولىقتىرۋلار ەنگىزىلدى. ەندى بۇل اڭگىمەلەر ءبىر ارناعا توعىسار دەگەن ويدامىز. ايتالىق, بۇعان دەيىنگى تاجىريبەدە قول-اياعى بالعاداي وتباسى يەلەرى مەن مۇشەلەرى جۇمىس ىستەمەسە دە كوپ جاعدايدا ااك-ءتى الىپ كەلدى.
الداعى ۋاقىتتا مۇنداي ماسىلدىقتان باس تارتۋعا تۋرا كەلەتىنى ايتپاسا دا تۇسىنىكتى. ياعني, ەڭبەككە جارامدى وتباسى مۇشەلەرى مىندەتتى تۇردە جۇمىس ىستەۋگە ءتيىس. مۇندايدا جۇمىس جوق, جۇمىس تابىلمايدى دەپ قارا اسپاندى ءتوندىرىپ, ءارتۇرلى سىلتاۋ ايتۋشىلار دا از كەزدەسپەيدى. مۇمكىن سولاي دا شىعار. ايتسە دە ماسىلدىق پيعىلعا بوي ۇرۋشىلاردىڭ اراسىندا ءتيىستى ۇيىمدار ۇسىنعان جۇمىستان باس تارتاتىندار دا بار. جاڭادان ەنگىزىلگەن وزگەرىستەرگە ساي مۇنداي جاعدايدا ولارعا اتاۋلى الەۋمەتتىك كومەك تاعايىندالمايتىنى بەلگىلى بولىپ وتىر.
قىسقاسى, 2020 جىلدان باستاپ ااك ءار وتباسى مۇشەسىنە وتباسى تابىسى مەن كەدەيشىلىك شەگىنىڭ اراسىنداعى ايىرماشىلىقتى ەسەپتەۋ ارقىلى تولەنبەك. مىسالى, بۇگىندە تۇرعىنداردىڭ باسىم بولىگىن 1, 2 جانە 3 بالاعا دەيىنگى بەرىلەتىن جاردەماقىنىڭ جاي-كۇيى كوبىرەك تولعاندىراتىنى بايقالادى. بۇل رەتتە الەۋمەتتىك تولەمنىڭ بۇل ءتۇرى الداعى كەزدە دە بۇرىنعىشا قالا بەرمەك. ياعني, وتباسىنداعى كىرىس كەدەيلىك شەگىنەن اسىپ كەتپەسە, ءار بالاعا تولەنەتىن قارجىلاي كومەك توقتامايدى دەپ مالىمدەيدى الەۋمەتتىك قورعاۋ مەكەمەسىنىڭ ماماندارى.
ااك تاعايىنداۋ ەڭ الدىمەن وبلىستارداعى جۇمىسپەن قامتۋ جانە الەۋمەتتىك باعدارلامالار باسقارمالارىنا جاۋاپتى مىندەتتەر جۇكتەيدى. اسىرەسە الەۋمەتتىك مەكەمە ماماندارىنىڭ تۇرمىسى تومەن وتباسى يەلەرىمەن جانە الەۋمەتتىك كومەككە مۇقتاج وزگە دە جاندارمەن ءجيى كەزدەسىپ, وي-پىكىر الماسىپ تۇرۋىنىڭ ورنى ايرىقشا دەۋگە بولادى. بۇل باعىتتا اقتوبە وڭىرىندە سوڭعى كەزدە وڭ ءۇردىس بايقالادى. وسى ورايدا ءتيىستى باسقارما تۇرعىندارمەن الەۋمەتتىك جەلى ارقىلى دا بايلانىس ورناتىپ, ولاردىڭ سان الۋان سۇراقتارىنا جاۋاپ قايتارىپ جۇرگەنىنە كۋامىز.
بۇل باعىتتاعى باستى ماسەلە تۇرعىنداردى جۇمىسپەن قامتۋدىڭ وڭتايلى ءتاسىلىن بەلگىلەي بىلۋگە بايلانىستى بولماق. بۇل ءۇشىن وڭىردە ارنايى جۇمىس جارمەڭكەلەرى ۇيىمداستىرىلىپ, جۇمىسسىز جۇرگەندەردىڭ وتباسىنا كىرىس كىرگىزۋ مۇمكىندىكتەرى قاراستىرىلۋدا. وسى ىلكىمدى ءىستى ودان ءارى جالعاستىرۋ ءۇشىن 2020 جىلى 2020 جۇمىس ورنىن اشۋ جوسپارلانىپ وتىر. باسقارما تاراپىنان ىسكە جارامدى وتباسى مۇشەلەرى ەڭبەك ەتۋدەن باس تارتپاۋى كەرەكتىگى جونىندە دە وي سالارلىق اڭگىمەلەر ايتىلىپ, وعان ناقتى مىسالدار كەلتىرىلۋدە. راس, بۇعان دەيىن وڭىردە تابىس پەن كىرىس كوزىن جاسىرىپ, ااك-ءتى زاڭسىز يەلەنۋ دەرەكتەرى دە بولعانى جاسىرىن ەمەس. قازىرگى كەزدە بۇعان جول بەرمەۋ تەتىكتەرى قاراستىرىلعان. اتاۋلى الەۋمەتتىك كومەككە ارقا سۇيەپ, التىنمەن پاراپار ۋاقىت پەن قولدا بار مۇمكىندىكتى ۋىسىنان شىعارىپ الاتىن وتانداستارىمىز ءالى دە جەتكىلىكتى. بۇل جاعداي ماسىلدىق پيعىل مەن كوزقاراستى ودان ءارى تەرەڭدەتە تۇسپەك. وسى تۇستا مەملەكەت تاراپىنان تولەنەتىن ااك-ءتىڭ عۇمىرى شەكسىز ەمەس ەكەنىن ۇعىنا ءبىلۋدىڭ دە ورنى ايرىقشا.
ءبىر سوزبەن ايتقاندا بۇگىنگى كۇنى كەدەيلىك شەگىندە جۇرگەن جاندارعا تاعايىندالاتىن اتاۋلى الەۋمەتتىك كومەك تۇراقتى تابىس پەن كىرىس كوزى ەمەس, تەك ۋاقىتشا عانا بەرىلەتىن قارجىلاي كومەك ەكەنىن ءتۇيسىنۋ قاجەت. ويتكەنى, ءومىر ۇدايى وزگەرىس پەن قوزعالىس ۇستىندە. وسىندايدا «جاس وسپەي مە, جارلى بايىماي ما؟» دەگەن حالقىمىزدىڭ ناقىلعا بەرگىسىز ويلى ءسوزى ەسكە ورالا بەرەدى.
«كاسىبىڭ – ءناسىبىڭ» دەگەندەي, كەز كەلگەن وتباسىنىڭ ءوز كاسىپتەرىن اشۋعا ۇمتىلۋىنا ءتيىستى قولداۋ كورسەتىلۋىنىڭ ورنى بولەك. بۇل رەتتە ەلىمىزدە جاڭا كاسىپكە بەيىمدەۋ باعىتىندا تەگىن وقىتۋ كۋرستارى جۇيەسى بەلگىلەنۋى ونى شيراتا تۇسۋگە سەپتىگىن تيگىزبەك.
اقتوبە
