سەمەي قالاسىنىڭ ىرگەسىندە بۇرىنعى جاڭاسەمەي اۋدانىنا قاراستى قۇرمانقوجا دەگەن اۋىل بولعان ەدى. قازىردە ورنى دا جوق سول قاسيەتتى اۋىلدان حالقىمىزدىڭ ماقتانىشىنا اينالعان نەبىر ازاماتتار شىققانىن بىرەۋ بىلسە, بىرەۋدىڭ بىلمەۋى دە مۇمكىن.
ايتالىق, ريم وليمپياداسىنىڭ كۇمىس جۇلدەگەرى, شاشاسىنا شاڭ جۇقپاس جەلاياق عۇسمان قوسانوۆ, اتاق-داڭقى شەتەلدىكتەرگە دەيىن ءمالىم بولعان اكادەميك-ماتەماتيك تولەۋباي امانوۆ, ءبىرى رەسپۋبليكامىزدىڭ حالىق ءارتىسى, ەكىنشىسى ەڭبەك سىڭىرگەن ءارتىس, جەزتاڭداي انشىلەر مادەنيەت ەشەكەەۆ پەن بولات سىبانوۆ تا وسى اۋىلدىڭ تۋماسى.
بۇگىندە كوزى ءتىرى بولسا بۇلاردىڭ سوڭعىسىنىڭ 75 جىلدىعىن دۇركىرەتىپ تويلاپ جاتقان بولار ەدىك. ال جان-جاقتى تالانت يەسى اتانعان بوكەڭ وعان ابدەن لايىق جان بولاتىن. الايدا, وكىنىشكە قاراي اعامىز وسىدان ون بەس جىل بۇرىن, ەلى الپىس جىلدىعىن ەندى تويلايمىز دەپ دايىندالىپ جاتقاندا, كەنەتتەن ءفاني دۇنيەدەن باقي دۇنيەگە اتتانىپ كەتە باردى.
ءيا, جان-جاقتى تالانت يەسى دەمەكشى, بالا بولات ون جاسىنان ءانشى اتاندى. ون ءۇش جاسىندا سەمەيگە كەلىپ, قالا مەكتەبىندە وقيدى. ال, ون التى-ون جەتى جاسىندا وسىنداعى اباي اتىنداعى وبلىستىق دراما تەاترىنا اكتەر بولىپ جۇمىسقا ورنالاسادى. مۇندا قىزمەت ەتكەن ونداعان جىلدار ىشىندە ونداعان رولدەردە وينايدى. سونىڭ ىشىندە م.اۋەزوۆ, ع.مۇسىرەپوۆ, سونداي-اق شەتەل جانە ورىس كلاسسيكتەرىنىڭ درامالىق شىعارمالارىندا باستى رولدەردىڭ ءيىن قاندىرىپ, ساحناعا شىعارا ءبىلدى. ياعني, ونەر سۇيەر قاۋىمعا ەڭ الدىمەن تالانتتى اكتەر رەتىندە تانىلدى.
بوكەڭ تەاتر ساحناسىندا وسىلايشا تالابىن ۇشتاي ءجۇرىپ, انشىلىك ونەرىن دە دامىتا تۇسۋمەن بولدى. سونىڭ ايعاعىنداي, سەگىز سەرىنىڭ اتاقتى «اقبۇلاق», اسەت بەيسەۋوۆتىڭ «جۇلدىزىم» سەكىلدى اۋەزدى اندەرىنىڭ بوكەڭنىڭ ورىنداۋىندا جۇلدىزى جانعانىن ەشكىم جوققا شىعارا قويماس. سونىمەن بىرگە, وسى تۇستا ونىڭ «تاڭ سامالى», «جانىم-اي», «عاشىقتار», «جان انا», «باقىتىم» سياقتى جانە باسقا ءوز اندەرى حالىق اراسىندا كەڭىنەن تارالىپ كەتتى. الپىستان استام اندەرىنىڭ كوبىنىڭ ءسوزىن ءوزى جازعاندىقتان بوكەڭدى اقىن دەپ تە ەسەپتەۋ كەرەك.
مىنە, جۋىردا وسىنداي تالانت يەسىنىڭ مەرەيتويىنا وراي, ءبىر كەزدە ءوزى قىزمەت ىستەگەن اباي اتىنداعى تەاتردا ونى ەسكە الۋ كەشى بولىپ ءوتتى. وندا تالانتتى اكتەر, تاماشا ءانشى, بەلگىلى سازگەر قاقىندا مازمۇندى ەستەلىكتەر مولىنان ايتىلدى. ال نۇريدەن يمانباەۆ, گۇلشات ەرۋوۆا, تۇرسىنعازى راحيموۆ, باقىت ۇدەرباەۆا سياقتى جانە باسقا جەرگىلىكتى انشىلەر بوكەڭنىڭ اۋەزدى اندەرىن كەلىستىرە ورىنداپ جاتتى.
وسى ورايدا, بوكەڭنىڭ ۇلى قانات اكە جولىن قۋىپ انشىلىگىمەن جۇرتشىلىق كوڭىلىنەن شىعا باستاعانىن ايتپاسقا بولمايدى. سونداي-اق, ءۇمىت جەڭگەمىزگە دە حالىق ءدان ريزا. وسى كىسىنىڭ باس بولۋىمەن بوكەڭنىڭ ءان كىتابى جارىققا شىقتى, قالاداعى ءبىر ۇلكەن كوشەگە ەسىمى بەرىلدى. ءيا, حالقى باردا مۇنداي تالانتتاردىڭ ەسىمى ەشقاشان ۇمىتىلمايدى.
داۋلەت سەيسەن ۇلى.
سەمەي.
