وتكەن جىلى ەل گازەتى «ەگەمەننىڭ» مەرەيلى مەجەسى – عاسىر تويى ەل كولەمىندە كەڭىنەن اتالىپ ءوتتى. اعا باسىلىمنىڭ ايتۋلى داتاسى الاشتىڭ باس اقىنى اباي تۋعان توپىراقتان باستاۋ الىپ, جەر-جەردە, تۋعاندارىنا 125 جىل تولعان, تاعدىرلارى گازەت تاريحىمەن تىعىز بايلانىستى تۇلعالار ساكەن سەيفۋللين, بەيىمبەت مايلين, ءىلياس جانسۇگىروۆ, تۇرار رىسقۇلوۆ سىندى بابالارىمىزدىڭ مەرەيتويلارىمەن ساباقتاستىرىلىپ, «ۇشقىننىڭ» العاشقى سانى جارىق كورگەن ورىنبور قالاسىنا ەكسپەديتسيا ۇيىمداستىرۋ سىندى عيبراتتى ءىس-شارالارمەن تۇيىندەلدى. بۇل, «ەگەمەننىڭ» تويى – ەلدىكتىڭ تويى ەكەنىن تانىتسا كەرەك.
جالپى, ەلىمىز ءۇشىن 2019 ماڭىزدى وقيعالار مەن تولايىم تابىستارعا تولى جىل بولدى. ازاتتىقتىڭ ارحيتەكتورى ەلباسى نۇرسۇلتان نازارباەۆ ءوز وكىلەتتىگىن توقتاتىپ, ەل تىزگىنىن ۇستاۋعا بۇگىنگى مەملەكەت باسشىسى قاسىم-جومارت توقاەۆتىڭ كانديداتۋراسىن ۇسىنۋ ارقىلى بۇكىل الەمگە بيلىك اۋىسۋىنىڭ بەيبىت ۇلگىسىن كورسەتتى. كوپ ۇزاماي ەلىمىزدە كەزەكتەن تىس پرەزيدەنت سايلاۋى ءوتىپ, باسىم داۋىسپەن قاسىم-جومارت كەمەل ۇلى مەملەكەت باسشىسى رەتىندە ابىرويلى مىندەتكە انت بەرىپ كىرىستى.
الاش شەجىرەسىندەگى بۇل تاريحي وقيعا – ماڭگىلىك ەل بولۋدى مۇرات تۇتقان ەل ەرتەڭىنىڭ جارقىن ءبىر بەلەسى دەر ەدىك. جىلدىڭ باسقا دا ماڭىزدى وقيعالارى ەل كولەمىندە بەرىك ىنتىماق, زور ىجداھاتپەن تابىستى اتالىپ ءوتتى.
ەلىمىز ءۇشىن بيىل دا ايتۋلى جىلداردىڭ ءبىرى بولماق. پرەزيدەنت قاسىم-جومارت توقاەۆ ءوز جولداۋىندا ءال-فارابي مەن ابايدىڭ مەرەيتويلارىن تويلاۋ تۋرالى جوسپار بەكىتتى. بۇل رەتتە باس باسىلىم ۇلى تۇلعالارىمىزدى جىل بويى كەڭىنەن كورسەتۋدى كوزدەپ وتىر. گازەت بەتىندە «اباي جولى», ء«ال-فارابي الەمى» سياقتى تۇراقتى ايدارلار اشىلىپ, قازاق توپىراعىنان شىققان ۇلى ويشىلداردىڭ رۋحاني مۇرالارى جان-جاقتى ناسيحاتتالماق. بۇل تاقىرىپتار توڭىرەگىندە دە «ەگەمەننىڭ» ويلى وقىرماندارىنا بەرەر ولجالارى وراسان دەگىمىز كەلەدى.
بيىل سونداي-اق ەڭ باستى اتاپ وتەتىن ايتۋلى شارالاردىڭ ءبىرى – التىن وردانىڭ 750 جىلدىعى ەكەنىن بىلەسىزدەر. قازاق حاندىعىنىڭ تۇپقازىعى – التىن وردانى ەل كولەمىندە ەرەكشە ۇلىقتاۋ – تاريحتا ەسىمدەرى التىن ارىپتەرمەن جازىلعان قاستەرلى حان-سۇلتاندارىمىز بەن باتىر-بەكتەرىمىزدى كەلەشەك ۇرپاققا كەڭىنەن تانىتۋدىڭ تاعى ءبىر ورايلى ءساتى. بۇل رەتتە شەجىرەلى تاريحىمىزدى تەرەڭ زەردەلەۋ – ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىن ءارى قاراي كەشەندى جالعاستىرۋ ەكەنى انىق.
جالپى, «Egemen Qazaqstan» ساليقالى ساياساتتىڭ ساراپشىسى رەتىندە دە, ەل ىشىندەگى قوعامدىق, الەۋمەتتىك ماسەلەلەردى وتكىر كوتەرۋدە دە كوش باسىندا بولا بەرمەك. بىلتىردىڭ وزىندە «ەگەمەننىڭ» بەتىندە كوتەرىلگەن وزەكتى ماسەلەلەردىڭ بىرنەشەۋى پرەزيدەنت تاراپىنان شۇعىل نازارعا الىنىپ, وڭ شەشىمىن تاپقانىن ايتا كەتكەن ءجون.
«گازەت – حالىقتىڭ كوزى, قۇلاعى ءھام ءتىلى» ەكەنىن جاقسى بىلەتىن جاسامپاز جىلناما ەل تاريحىنداعى ەرەكشە وقيعالاردى گازەت بەتىندە وسىلاي جاريالاي وتىرىپ, وقىرمان تالابى مەن تالعامىن سالماقتى تارازىلاي بەرمەك.
بيىل گازەتىمىز تۇتاس ءبىر ءداۋىردى تۇيىندەپ, جاڭا جۇزجىلدىققا قادام باستى. وسىناۋ جاڭا كەزەڭگە ءبىز ءداستۇر ساباقتاستىعىن ساقتاي وتىرىپ, بۋىن الماسۋ پروتسەسىن وتكەرۋ ارقىلى جالىندى جىگەرگە تولى جاڭا بۋىنمەن كەلدىك. بۇل كورىنىس سوناۋ عاسىر باسىندا «ەگەمەننىڭ» العاشقى سانىن جارىققا شىعارعان الاش قايراتكەرلەرىنىڭ جالىندى جاس بەينەلەرىن كوز الدىمىزعا اكەلەدى. ۇرپاق ساباقتاستىعى, ءداستۇر جالعاستىعى دەگەنىمىز دە وسى بولار.
قۇرمەتتى وقىرمان, 2019 جىلدى جەمىستى اياقتاعان «Egemen Qazaqstan» ەندىگى جىلى دا جوسپارلى جۇمىستارىمەن ەلگە قارقىندى قىزمەت ەتە بەرەدى.
ەل تىنىسىنىڭ تامىرشىسى, قازاق تاريحىنىڭ عاسىرلىق شەجىرەسىنە اينالعان گازەت ءار قازاقتىڭ شاڭىراعىنا وسى جىلدا تەك قانا ءسۇيىنشى جاڭالىقتارىمەن عانا ەنسىن دەگىمىز كەلەدى.
جاڭا جىل قۇتتى بولسىن!
