2020 جىلى رەسپۋبليكالىق بيۋدجەتتىڭ تابىسى 11,2 ترلن تەڭگەنى قۇرايدى دەپ جوسپارلانىپ وتىر. ونىڭ 7,9 ترلن تەڭگەسى سالىق تۇسىمدەرىنەن, 121,1 ملرد تەڭگەسى سالىقتىق ەمەس تۇسىمدەردەن, 4,4 ملرد تەڭگەسى نەگىزگى كاپيتالدى ساتۋدان, 3,1 ترلن تەڭگەسى ترانسفەرتتەردەن تۇسۋگە ءتيىس. بيۋدجەت شىعىندارىنىڭ كولەمى 12,4 ترلن تەڭگەگە جەتىپ, سايكەسىنشە تاپشىلىق 1,5 ترلن تەڭگە توڭىرەگىندە بولادى دەپ بەكىتىلدى.
بيىلدان باستاپ رەسپۋبليكالىق بيۋدجەتكە ءىرى كاسىپكەرلىك سۋبەكتىلەرىنىڭ عانا كورپوراتيۆتىك تابىس سالىعى تۇسپەك. شاعىن جانە ورتا بيزنەستەن كەلەتىن كورپوراتيۆتىك تابىس سالىعى ايماقتىق بيۋدجەتتەردىڭ ەنشىسىندە. الايدا, پرەزيدەنت ق.توقاەۆتىڭ جولداۋىندا ايتىلعان تاپسىرماعا وراي شاعىن جانە ورتا بيزنەس تابىس سالىعىنان بوساتىلعانى بەلگىلى. كاسىپكەرلىكتى قولداۋعا باعىتتالعان بۇل وزگەرىس ايماقتاردىڭ بيۋدجەتىن ءبىراز تابىستان ايىراتىنى تۇسىنىكتى.
دونور وبلىستار رەسپۋبليكالىق بيۋدجەتكە 420 ملرد تەڭگە اۋدارادى دەپ جوسپارلاندى. ەڭ مول تابىس اكەلەتىن وڭىرلەردىڭ تىزىمىندە بۇرىنعىداي اتىراۋ وبلىسى كوش باستاپ تۇر – 207 ملرد تەڭگە. ودان كەيىنگى ورىندارعا الماتى قالاسى (171 ملرد), نۇر-سۇلتان (32 ملرد), ماڭعىستاۋ وبلىسى (8,2 ملرد) جايعاستى.
رەسپۋبليكالىق بيۋدجەتتەن ايماقتاردا 36 باعىت بويىنشا جۇمىس جۇرگىزۋگە 2,1 ترلن تەڭگە قاراستىرىلدى. اتاپ ايتقاندا, اقمولا وبلىسىنا – 144 ملرد تەڭگە, اقتوبەگە – 108 ملرد, الماتى وبلىسىنا – 200 ملرد, شىعىس قازاقستانعا – 215 ملرد, جامبىلعا – 194 ملرد, باتىس قازاقستانعا – 74 ملرد تەڭگە, قاراعاندى وبلىسىنا 142 ملرد تەڭگە باعىتتالادى. بۇل قاراجاتتىڭ نەگىزگى بولىگى اگروونەركاسىپ كەشەنىن سۋبسيديالاۋ, اتاۋلى الەۋمەتتىك كومەك تولەۋ, مەديتسينالىق نىسانداردى ماتەريالدىق-تەحنيكالىق جابدىقتاۋ, ۇستازدار مەن مادەنيەت سالاسى قىزمەتكەرلەرىنىڭ ەڭبەكاقىسىن كوتەرۋگە, «اۋىل – ەل بەسىگى» باعدارلاماسى اياسىنداعى جوبالاردى قارجىلاندىرۋعا جانە دە باسقا 36 باعىتقا جۇمسالماق. ءىى دۇنيەجۇزىلىك سوعىستاعى جەڭىستىڭ 75 جىلدىعىن اتاپ ءوتۋ شارالارى دا وسى ساناتتا.
«رەسپۋبليكالىق بيۋدجەت تۋرالى» زاڭدا ەڭ تومەنگى كۇنكورىس مولشەرى مەن زەيناتاقى بەلگىلەنىپ, ايلىق ەسەپتىك كورسەتكىش بەكىتىلدى. سونىمەن, قازىرگى تاڭدا ەڭ تومەنگى زەينەتاقى كولەمى – 38 636 تەڭگە, تومەنگى بازالىق زەينەتاقى مولشەرى – 16 839 تەڭگە بولدى. ەلدەگى ەڭ تومەنگى ەڭبەكاقى 42 500 تەڭگەگە كوتەرىلدى. ايلىق وسەپتىك كورسەتكىش – 2 651 تەڭگە.
