كەشە پرەمەر-مينيستر سەرىك احمەتوۆ حالىقارالىق كورمەلەر بيۋروسىنىڭ (حكب) باس حاتشىسى ۆيسەنتە لوسسەرتالەسپەن كەزدەستى. كەزدەسۋ بارىسىندا استانادا ەكسپو-2017-ءنى ۇيىمداستىرۋ جانە وتكىزۋ, قازاقستان مەن حكب-ءنىڭ ءوزارا ءىس-قيمىلى ماسەلەلەرى تالقىلاندى, دەپ حابارلادى پرەمەر-ءمينيستردىڭ ءباسپاسوز قىزمەتى.
س.احمەتوۆ اتاپ وتكەندەي, ەكسپو-2017-ءنى وتكىزۋگە دايىندىق مەملەكەت باسشىسىنىڭ ايرىقشا باقىلاۋىندا تۇر.
مەملەكەتتىك كوميسسيا ەكسپو-2017-ءنى ۇيىمداستىرۋ مەن وتكىزۋدىڭ ۇلتتىق جوسپارىن بەكىتتى, ونىڭ جۇزەگە اسۋى قاتاڭ باقىلاۋدا, دەدى س.احمەتوۆ.
ۇكىمەت باسشىسى قازاقستاننىڭ ەكسپو-2017-ءنى ەڭ جوعارى دەڭگەيدە وتكىزۋگە بارلىق كۇش-ءجىگەرىن سالاتىنىنا, وندا بالامالى جانە جاڭعىرمالى ەنەرگەتيكا سالاسىنداعى ەڭ ۇزدىك «نوۋ-حاۋ», «سەرپىندى» جانە پەرسپەكتيۆالى جوبالاردىڭ ۇسىنىلاتىنىنا سەندىردى.
قازىر ءبىز تىركەۋ مالىمەتتەرىن وقىپ-زەرتتەۋ جانە ءتيىستى تۇزەتۋلەر ەنگىزۋ جونىندەگى جۇمىستارعا تىكەلەي كىرىستىك. «مازمۇنى بويىنشا جوسپار» مەيلىنشە جاقسى ازىرلەنگەن, ويلاستىرىلعان ءارى سىندارلى. وندا قازاقستان پرەزيدەنتىنىڭ «قازاقستان-2050» ستراتەگياسىندا قامتىلعان وي-پايىمدارى جاقسى كورىنىس تاپقان, دەدى ۆ.لوسسەرتالەس.
حكب باسشىسى ۆ.لوسسەرتالەس قازاقستانعا جۇمىس ساپارىمەن كەلدى. ونىڭ بارىسىندا ول تىركەۋ مالىمەتتەرىن دايىنداۋ جانە استانادا ەكسپو-2017-ءنى ۇيىمداستىرۋ ماسەلەلەرىمەن تانىساتىن بولادى.
