پوليتسەي فورماسىن كيگەن بىرنەشە ونداعان ءتالىپتەر سەيسەنبىگە قاراعان ءتۇنى پاكستاننىڭ سولتۇستىك باتىسىنداعى دەرا-يسمايل-حان قالاسىنداعى تۇرمەگە شابۋىل جاسادى. سونىڭ سالدارىنان جۇزدەگەن تۇتقىن قاشىپ كەتكەن. بۇل تۇرمەدەگى بەس مىڭ تۇتقىننىڭ ىشىندە ونداعان تالىپتەر مەن تىيىم سالىنعان راديكالدى توپتاردىڭ سودىرلارى بار.
امەريكانىڭ ءبىرقاتار شتاتتارىندا فاستفۋد يندۋسترياسى قىزمەتكەرلەرىنىڭ ەرەۋىلى بولىپ ءوتتى. BurgerKing, McDonald’s جانە Wendy’s جەدەل تاماقتانۋ رەستوراندارىنىڭ نارازىلىق ءبىلدىرگەن قىزمەتكەرلەرى ءوز وتباسىلارىمەن بىرگە كوشەلەرگە شىعىپ, كومپانيا باسشىلىعىنان جۇمىس ساعاتىنا تولەنەتىن اقىنى 7,5-تەن 15 دوللارعا دەيىن ءوسىرۋدى تالاپ ەتتى.
شۆەيتساريانىڭ گرانج-پرە-مارنان قالاسى ماڭىندا سوقتىعىسقان پويىزداردىڭ ءبىرىنىڭ ءماشينيسى قيراعان لوكوموتيۆتىڭ ىشىنەن ءولى كۇيىندە تابىلعان. ونىڭ قازا تاپقانى مۇردەنى اشۋ پروتسەدۋراسىنان كەيىن رەسمي راستالماق. ەكىنشى ماشينيست اپاتتان جاراقات العانىمەن, ءتىرى قالعان كورىنەدى.
يراكتىڭ استاناسى باعداد پەن باسرا قالاسىندا بىرنەشە ءدۇركىن جارىلىستار ورىن العان. الدىن-الا حابارلانعان مالىمەتتەر بويىنشا, جارىلىس سالدارىنان 48 ادام قازا تاۋىپ, 220 ادامنىڭ ءتۇرلى دەنە جاراقاتتارىن العانى بەلگىلى بولىپ وتىر. تەك باعدادتىڭ وزىندە عانا مينا قويىلعان 11 اۆتوموبيل جارىلعان, ولاردىڭ بەسەۋى مۇسىلمان-شيتتەر تۇراتىن اۋدانداردا ورىن العان.
تۋنيس ۇكىمەتى ەلدە جالعاسىپ جاتقان ساياسي داعدارىستىڭ ودان بەتەر شيەلەنىسە تۇسۋىنە قاراماستان وتستاۆكاعا كەتۋگە نيەتتى ەمەس. ورىن العان تارتىپسىزدىكتەرگە بايلانىستى ەلدىڭ پرەمەر-ءمينيسترى الي لاراەد ۇلتتىق تەلەديدار ارقىلى ءسوز سويلەپ, ءبىز بيلىككە جارماسىپ وتىرعان جوقپىز, بىراق ءبىزدىڭ الدىمىزدا مىندەتتەر تۇر, ال, ءبىز ولاردىڭ اتقارىلۋى ءۇشىن جاۋاپتىمىز, دەپ اتاپ كورسەتكەن.
الدىن الا باعالاۋلار بويىنشا, كانن قالاسىنداعى Carlton قوناق ۇيىندەگى كورمەدەن ۇرلانعان بريلليانتتاردىڭ قۇنى 103 ميلليون ەۋرونى قۇرايدى. بۇل تەك وسى ءوڭىر تاريحىنداعى عانا ەمەس, سونىمەن بىرگە ءبۇكىل الەم بويىنشا كولەمى جاعىنان ەڭ ۇلكەن ۇرلىق بولىپ وتىر. كۇزەتشىنى تاپانشامەن قورقىتقان توناۋشى اسىل تاستار تولعان چەمودانىن الىپ, قوناق ءۇيدەن جايباراقات شىعىپ كەتكەن كورىنەدى.
گرۋزيانىڭ مادەنيەت مينيسترى يوسيف ءستاليننىڭ ەسكەرتكىشىن ونىڭ تۋعان قالاسى گوريگە قايتارۋ ءجونىندە شەشىم قابىلدادى. ۆەدومستۆو وسىلايشا كەڭەستىك كوسەم ەسكەرتكىشىن قايتا قالپىنا كەلتىرۋ تۋرالى قالالىق جينالىستىڭ ۇسىنىسىن قاناعاتتاندىردى. ەسكەرتكىش ءستاليننىڭ تۋعان كۇنىنە وراي 21 جەلتوقساندا قالپىنا كەلتىرىلەتىن بولادى.
ماسكەۋ بازارلارىندا ءدۇيسەنبى كۇنى باستالعان پوليتسەيلەردىڭ پروفيلاكتيكالىق وپەراتسياسى بارىسىندا قازىردىڭ وزىندە 470-تەن استام ادام قاماۋعا الىنعان.
اقپارات اگەنتتىكتەرى ماتەريالدارى نەگىزىندە ازىرلەندى.
