قاراعاندى وبلىسىنداعى مايوروۆكا اۋىلىنىڭ بۇرىنعى اكىمىنىڭ تۋىسى جەرلەستەرىنە تراۆماتيكالىق قارۋدان وق جاۋدىردى. بۇل تۋرالى «كۋرسيۆ» جازادى.
وسى اۋىلدىڭ بۇرىنعى اكىمى تولەگەن وسپانوۆتىڭ اعايىنى اۋەلىدە اۋىلداستارىمەن توبەلەسەدى. ارتىنان كۋاگەرلەردىڭ ايتۋىنان ءمالىم بولعانىنداي, قىزمەتتىك كولىكتىڭ رۋلىندە تولەگەن وسپانوۆ بولادى دا, سول كولىكتىڭ ىشىندە وتىرعان تۋىسى جەرگىلىكتى جاستارعا وق جاۋدىرادى. سونىڭ سالدارىنان جيىرماعا جۋىق ادام جاراقات العان كورىنەدى. ال بىرەۋىنىڭ ءحالى وتە مۇشكىل.
ت. وسپانوۆ ءوزىنىڭ وسى وقيعاعا قاتىسى جوقتىعىن, كەرىسىنشە تۋىسىنىڭ باسقالاردان ءزابىر كورگەنىن ايتادى. سوندىقتان قايتادان اۋىل اكىمى بولۋعا ۇمىتتەنىپ وتىرعان بۇل ازاماتتىڭ ءىس-ارەكەتىن تەكسەرۋ ماقساتىمەن وبلىستا ارنايى كوميسسيا قۇرىلدى.
دانيار تۇيمەباي.
