پاكستاننىڭ سولتۇستىك-باتىسى دەرا-يسمايل-حان قالاسىندا «تاليبان» راديكالدى قوزعالىسىنىڭ سودىرلارى ءوز وكىلدەرىن بوساتۋ ماقساتىندا تۇرمەگە شابۋىل جاسادى. بۇل تۋرالى «رەيتەر» اگەنتتىگىنىڭ اقپارىنا سىلتەمە جاساعان يتار-تاسس حابارلاپ وتىر.
دەرا-يسمايل-حان قالاسىنداعى تۇرمەدە شامامەن بەس مىڭ ادام قاماۋدا ۇستالعان بولاتىن. ولاردىڭ ىشىندە 250 قىلمىسكەر «تەريح-ي-تاليبان پاكستان» مەن وزگە دە ەكسترەميستىك توپتاردىڭ وكىلدەرى بار
تاليبتەردىڭ وكىلى شاحيدۋللا ءشاحيدتىڭ سوزىنە قاراعاندا, ولار ءوز جاقتاۋشىلارىن بوساتۋعا ءجۇز سودىر مەن جەتى جانكەشتى جىبەرگەن. ولار جارىلعىش زاتتاردى قولدانۋ ارقىلى تۇرمەنىڭ ەلەكتر قۋاتىن ىستەن شىعارىپ, قاقپاسى مەن قابىرعالارىن بۇزىپ, ىشكە كىرگەن. بۇعان قوسا, سودىرلار تۇرمە جانىنداعى تۇرعىن ءۇي مەن اۋرۋحانا شاتىرىنا ورنالاسىپ, سول جەردەن اسكەريلەر مەن پوليتسيا قىزمەتكەرلەرىنە وق جاۋدىرعان.
ءبىر قىزىعى, حايبەر-پاحتۋنحۆا پروۆينتسياسى تۇرمەلەرىنىڭ باسشىسى حاليد ابباستىڭ ايتۋىنشا, شابۋىل جونىندە بيلىك ءبىر اپتا بۇرىن حاباردار بولعان. الايدا, ونىڭ تەز ارادا ورىن الاتىنىن كۇتپەگەن كورىنەدى.
ريا «نوۆوستي» اگەنتتىگىنىڭ حابارلاۋىنشا, تاليبتەر تۇرمەگە جاسالعان شابۋىلدىڭ ءساتتى وتكەنىن, سونداي-اق 300-گە جۋىق قىلمىسكەردىڭ بوساتىلعانىن مالىمدەگەن.
«جالپى 243 ادام تۇرمەدەن قاشىپ شىققان, ونىڭ التاۋى كەيىنىرەك قۇقىق قورعاۋشىلاردىڭ ىزدەستىرۋ جۇمىستارى ناتيجەسىندە قۇرىقتالدى. ال قاشقىنداردىڭ اراسىندا 30 ادام اسا قاۋىپتى قىلمىسكەر سانالادى», – دەپ مالىمدەدى پاكستان ۇكىمەتىنىڭ وكىلى مۋشتاك دجادۋن.
ايدار ورىسباەۆ.
