الماتى قالاسىندا ورنالاسقان قازاقستان-جاپون يننوۆاتسيالىق ورتالىعىنىڭ قىزمەتكەرلەرى قان قۇرامىنداعى سارى سۋدى جاقىننان ساۋلەلەندىرۋ ارقىلى قاي مۇشەنىڭ وبىرعا شالدىققانىن ون ءمينوت ىشىندە ءدوپ باسىپ ايتا الادى. وسىدان ءۇش جىل بۇرىن قولعا الىنعان بۇل ءىستىڭ ناتيجەسى بار كورىنەدى. اتالعان مەرزىم ارالىعىندا عالىمدار جەكە كلينيكالارمەن بىرلەسىپ, مىڭ جارىمعا تارتا ازاماتتىڭ قان قۇرامىن تەكسەرگەن. سوندا ولاردىڭ قاتەرلى ىسىككە شالدىققانى دالەلدەنىپتى. سوعان قاراماستان, بۇل ءتاسىل ەلىمىزدىڭ مەديتسينا سالاسىنا ءالى تولىق ەنگىزىلمەگەن. باستى سەبەپ, قاراجات تاپشىلىعى قولبايلاۋ بولىپ تۇر.
ستاتيستيكالىق دەرەككە جۇگىنسەك, جىل سايىن 30 مىڭداي قازاقستاندىق قاتەرلى ىسىكپەن ەسەپكە الىنادى ەكەن. ال الەم بويىنشا 10 ملن. ادام تىركەۋگە الىنعان. دارىگەرلەر ازىرگە قاتەرلى ىسىكتى تۇبىرىمەن جوياتىن ەم-دومدى تاپقان جوق. جالپى, ەل اراسىندا «جامان اۋرۋ» اتالىپ كەتكەن وسى سىرقات 5 ساتىعا بولىنەدى. اۋرۋدىڭ جاڭا پايدا بولعان كەزى مەديتسينا تىلىمەن ايتساق, راك ينتسيتو دەپ اتالادى. ەكىنشى ساتىسىندا ول ۇلكەيىپ, كەلەسى قاباتقا وتەدى. ءۇشىنشى, ءتورتىنشى ساتىلارىندا دەرت اسقىنىپ, ءتۇيىن سالىپ تارايدى. سوڭعى كەزەڭى وتە قاۋىپتى. ال قازاقستان-جاپون يننوۆاتسيالىق ورتالىعىنىڭ ديرەكتورى دياس مىرزاقوجا تىڭ ءتاسىل نەگىزىندە قاتەرلى ىسىكتى جەدەل انىقتاپ, ادام ءومىرىن ءبىرشاما ۇزارتۋعا قادام جاسالىپ وتىرعانىن ايتادى.
ءامىرحان الماعانبەتوۆ,
«ەگەمەن قازاقستان».
