قازاقستان • 26 جەلتوقسان، 2019

الماتىدا «ابب ەڭ وزىق پاتسيەنتى» ءى رەسپۋبليكالىق بايقاۋى مارەگە جەتتى

36 رەت كورسەتىلدى

بۇگىن الماتىدا دەنساۋلىق ساقتاۋ مينيسترلىگىنىڭ قولداۋىمەن كارديولوگيا جانە ىشكى اۋرۋلار عىلىمي-زەرتتەۋ ينستيتۋتى ۇيىمداستىرعان «اۋرۋلاردى باسقارۋ باعدارلاماسىنىڭ ەڭ وزىق پاتسيەنتى» اتتى ءبىرىنشى رەسپۋبليكالىق كونكۋرسىنىڭ قورىتىندىسى شىعارىلدى.

الدىمەن «ابب وزىق پاتسيەنتى» كونكۋرسى ەلىمىزدىڭ بارلىق ايماقتارىندا ەكى اي ىشىندە اۋداندىق، قالالىق جانە وبلىستىق دەڭگەيلەردە وتكىزىلگەندىگىن ەسكە سالا كەتۋ كەرەك.

كارديولوگيا جانە ىشكى اۋرۋلار عزي باسقارما ءتورايىمى روزا قۋانىشبەكوۆا قازاقستاندا 2013 جىلدان بەرى جۇزەگە اسىرىلىپ كەلە جاتقاندىعىن اتاي كەلە: «دەنساۋلىق ساقتاۋ مينيسترلىگى ابب ەنگىزۋدە ۇيىمداستىرۋ-ادىستەمەلىك باسشىلىقتى ءبىزدىڭ ينستيتۋتقا جۇكتەدى. باعدارلاماعا: ارتەريالىق گيپەرتەنزيا، سوزىلمالى جۇرەك جەتكىلىكسىزدىگى، قانت ديابەتى، وكپەنىڭ سوزىلمالى وبسترۋكتيۆتىك اۋرۋى كىرەدى. ونى ەنگىزۋ ەمحانالاردا جۇكتەمە مەن كەزەكتىلىكتى، ستاتسيونارلىق جانە جەدەل مەديتسينالىق كومەككە قاجەتتىلىكتى ازايتۋعا، سونداي-اق وزىنە ءوزى كومەك بەرۋدى قولدانۋ جولىمەن پاتسيەنتتىڭ ءوزىنىڭ دەنساۋلىعىنا دەگەن جاۋاپكەرشىلىكتى ارتتىرۋعا باعىتتالعان»، – دەيدى.

ينستيتۋت باسشىسىنىڭ ايتۋىنشا، ايماقتاردا ابب جۇزەگە اسىرۋ جوعارى ناتيجە كورسەتتى: ابب ەنگىزىلگەن پاتسيەنتتەردىڭ توبىندا شۇعىل اۋىرعاندار سانى ازايدى، بارلىق قاتىسۋشىلاردىڭ دەنساۋلىق كورسەتكىشتەرى جاقساردى. نەگىزگى ارتىقشىلىعى: دارىگەر مەن پاتسيەنت سەرىكتەس بولدى. «وسىعان بايلانىستى، باعدارلامانى كوپشىلىككە تاراتۋ ماقساتىندا ءبىز كونكۋرس وتكىزۋدى شەشتىك، بۇگىن ءبىز ولاردىڭ ىشىندەگى ەڭ وزىقتارىن ماراپاتتادىق، ولار – يرينا ۆوروبەۆا (باتىس قازاقستان وبلىسى، ورال ق. №1 قالالىق ەمحاناسىنىڭ پاتسيەنتى) جانە سەرىك مەڭدىباي (جامبىل وبلىسى،تالاس اۋداندىق ەمحاناسىنىڭ پاتسيەنتى)»، – دەپ اتاپ ءوتتى.

رەسپۋبليكالىق كونكۋرستىڭ جەڭىمپازى سەرىك مەڭدىباي ءوز دەنساۋلىعىنا دەگەن كوزقاراسىنىڭ وزگەرگەندىگى، ءومىر ءسۇرۋ سالتىن تولىقتاي قايتا قاراستىرعاندىعى، دۇرىس تاماقتانۋعا، سپورتقا كوپ كوڭىل بولگەندىگى جانە وسىدان كەيىن ونىڭ دەنساۋلىعىنىڭ قالپىنا كەلگەندىگى تۋرالى ايتادى.

«وقجەتپەس» «الماتى» ەسك اق فيليالى ديرەكتورىنىڭ ەمدەۋ-ساۋىقتىرۋ جۇمىستار جونىندەگى ورىنباسارى سالتانات بەيسەمباەۆا، وڭالتۋ قىزمەتىن ۇسىناتىن ۇيىم رەتىندە كارديولوگيا جانە ىشكى اۋرۋلار عزي ۇيىمداستىرعان «اۋرۋلاردى باسقارۋ باعدارلاماسى بويىنشا ەڭ جاقسى پاتسيەنت» اتتى العاشقى رەسپۋبليكالىق بايقاۋىن قولداۋعا شەشىم قابىلداپ، 2 جەڭىمپازعا شيپاجايعا جولداما بولگەندەرىن اتادى.

«وسىنداي وزىق پاتسيەنت كونكۋرسىن وتكىزۋ قاجەت، ويتكەنى پاتسيەنتتەر تارتىپتىلىك كورسەتىپ، ءوز دەنساۋلىعىنا جاۋاپتى بولاتىندىعىن تۇسىنەدى، مەديتسينا قىزمەتكەرلەرىمەن سەرىكتەس بولىپ، بۇل رەتتە دەنساۋلىقتارى جاقسارىپ، دۇرىس تاماقتانىپ، دەنە قيمىلىمەن اينالىسا باستايدى. العاشقى كومەك كورسەتۋ داعدىلارىن مەڭگەرەدى، دەنساۋلىعى ناشارلاعان كەزدە وزىنە ءوزى قالاي كومەك بەرەتىندىگى مەن اسقىنۋلاردى قالاي بولدىرماۋ جونىندە ءبىلىم الادى. وقۋعا، ەمدەلۋگە دەگەن ءپوزيتيۆتى ويلاۋ جاقسى ناتيجەلەرگە اكەلەدى»، – دەپ اتاپ ءوتتى.

ابب وزىق پاتسيەنتتەرىنە سەرتيفيكاتتار مەن پرەزيدەنت ءىس باسقارماسىنىڭ مەديتسينالىق ورتالىعىنىڭ «الماتى» شيپاجايىنا جولداما بەرىلدى.

«اۋرۋلاردى باسقارۋ باعدارلاماسىنىڭ ەڭ وزىق پاتسيەنتى» اتتى ءبىرىنشى رەسپۋبليكالىق كونكۋرسىنىڭ جەڭىمپازدارىن قۇتتىقتاۋ سالتاناتىنا سونىمەن قاتار پاتسيەنتتەردى ەمدەگەن دارىگەرلەر مەن مەيىرگەرلەر، ابب ۇيلەستىرۋشىلەرى دە كەلدى. ولار قۇرمەت گراموتاسىمەن، العىس حاتپەن جانە «التىن دارىگەر» توسبەلگىسىمەن ماراپاتتالدى.

سوڭعى جاڭالىقتار

ۇقساس جاڭالىقتار