ۆەدومستۆو وكىلى ايتقانداي, ەلىمىزدىڭ الەۋمەتتىك-ەكونوميكالىق احۋالىن جاقسارتۋدا تسيفرلى تەحنولوگيالاردىڭ ماڭىزى زور. بۇل فورۋم وسى باعىتتا جەتىستىككە جەتكەن مەملەكەتتەرمەن تاجىريبە الماسىپ, تىڭ ۇسىنىستار جاسالاتىن بىرەگەي الاڭ. تەحنوكراتيالىق جولعا ءتۇسۋ ءۇشىن اۋەلى مەملەكەتتىك تسيفرلى ساياساتتى ايقىنداۋ قاجەت. سول سەبەپتى ۇكىمەت «تسيفرلى قازاقستان» باعدارلاماسىن بەكىتتى.
– ەلباسىنىڭ باستاماسىمەن «تسيفرلى قازاقستان» باعدارلاماسى ازىرلەندى. ونىڭ كومەگىمەن ەكونوميكادان باستاپ, مەملەكەتتىك قىزمەت كورسەتۋدى, جوعارى جىلدام ءارى قورعالعان تەلەكوممۋنيكاتسيالىق ينفراقۇرىلىمدى تسيفرلاندىرۋ كوزدەلگەن. البەتتە, بايلانىس تەحنولوگيالارى ءبىر ورىندا تۇرمايتىنى بەلگىلى. قازىر الەمدە 5G ينتەرنەتتى ەنگىزۋگە بايلانىستى پىكىرتالاس قىزۋ ءوربىپ جاتىر. جۋىردا مىسىردىڭ شارم-ءال-شەيح قالاسىندا وسى ماسەلەگە ارنالعان اۋقىمدى كونفەرەنتسيا دا ءوتتى. 5G ۇلتتىق ەكونوميكا مەن «اقىلدى قالالاردىڭ» وركەندەۋىنە, سول سەكىلدى تىڭ ماماندىقتارعا جول اشاتىنى ءشۇباسىز. ءبىر ادامعا شاققاندا قازاقستان ءموبيلدى ترافيكتى بەلسەندى قولداناتىن ەلدەردىڭ قاتارىندا. وسىعان قاراپ حالىقتىڭ جوعارى جىلدام ينتەرنەتكە سۇرانىسىن باعامداي بەرۋگە بولادى. بيىل وسى تەحنولوگيانى سىناقتان وتكىزۋ جۇمىستارى اتقارىلدى. اتاپ ايتقاندا, نۇر-سۇلتان جانە الماتىدا 5G تەحنولوگياسىنىڭ مۇمكىندىكتەرى پىسىقتالدى. 5G تەك بايلانىس جۇيەسىمەن شەكتەلمەيدى. بۇل سونىمەن بىرگە تەلەمەديتسينا, ونەركاسىپتىك تسيفرلاندىرۋ, ۇشقىشسىز باسقارىلاتىن كولىك قۇرالدارىن باسقارۋ سىندى جان-جاقتى باعىتتاردى قامتيدى, – دەدى د.تۇياقوۆ.
ءۇشىنشى جىل قاتارىنان ۇيىمداستىرىلعان حالىقارالىق شارادا 20-دان اسا سپيكەر اقپاراتتىق تەحنولوگيا سالاسىنداعى جاڭالىقتارمەن ءبولىسىپ, 20 مەملەكەتتەن كەلگەن مىڭعا تارتا مەيمان قازاقستانداعى تسيفرلاندىرۋ باعىتىنداعى جۇمىستارمەن تانىستى. فورۋمدا مەملەكەتتىك قىزمەتتەر, ونەركاسىپ, اگروونەركاسىپتىك كەشەن, تۇرعىن ءۇي-كوممۋنالدىق شارۋاشىلىق سالالارىن تسيفرلاندىرۋ, «تسيفرلى قازاقستان» جانە يندۋستريا 4.0 مەملەكەتتىك باعدارلامالارىن جۇزەگە اسىرۋدا ىنتىماقتاستىق ورناتۋدىڭ جولدارى قاراستىرىلدى. بۇدان بولەك فورۋم قاتىسۋشىلارى ەلىمىزدەگى العاشقى «اقىلدى قالا» اقكولگە بارادى.
