قۋاتى 300 مۆت مويناق گەس ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى اياسىندا جانە قازاقستان ەلەكترەنەرگەتيكاسىنىڭ 2030 جىلعا دەيىنگى دامۋ باعدارلاماسىنا سايكەس سالىندى. ول الماتى وبلىسىنىڭ رايىمبەك اۋدانىنداعى شارىن وزەنىندە ورنالاسقان. كاسىپورىننىڭ جوبا بويىنشا ورتاشا جىلدىق ەلەكتر ەنەرگياسىن ءوندىرۋ كولەمى – 1,027 ملرد كۆت س.
قۇرىلىستىڭ نەگىزگى ماقساتى – قازاقستان رەسپۋبليكاسىنىڭ ەلەكتر ەنەرگياسى تاپشى وڭتۇستىك ايماعىنا (الماتى, جامبىل, قىزىلوردا جانە تۇركىستان وبلىستارى) ەلەكتر ەنەرگياسى مەن قۋاتىن جەتكىزۋ ءۇشىن قولايلى جاعداي جاساۋ جانە الماتى ەنەرگيا جۇيەسىنىڭ جۇكتەمەسىندەگى كۇندىك جانە اپتالىق قالىپسىزدىقتى جابۋ.
وزەننىڭ سۋ وتكىزۋ رەجىمىن جاقسارتۋ ءۇشىن مويناق گەس-ءىنىڭ تومەنگى ساعاسىندا سۋدىڭ تاۋلىكتىك اعىسىن رەتتەيتىن سۋ قويماسى-كەرى رەتتەگىشى بار سۋ تورابى سالىنعان.
تۇتاس العاندا, 2012 جىلى پايدالانۋعا بەرىلگەن ساتتەن باستاپ سۋ ەلەكتر ستانساسى 7 195 ملن كۆت ساعات ەلەكتر ەنەرگياسىن ءوندىردى.
ستانسا قازاقستان ءۇشىن ۇلكەن ماڭىزعا يە. ول ەلىمىزدىڭ وڭتۇستىك وڭىرىندە ەلەكتر ەنەرگياسىنا دەگەن ءوسىپ كەلە جاتقان سۇرانىستى جابۋعا كومەكتەسەدى. ودان تىس مويناق گەس-ءى ەلەكتر ەنەرگياسىنىڭ ەڭ جوعارى مولشەرىن تيىمدىلىكپەن وندىرۋگە جانە قازاقستاننىڭ ەنەرگيا جۇيەسىن رەتتەپ, تۇراقتى جۇمىس ىستەۋى ءۇشىن قۋات بەرۋگە قىزمەت ەتەدى.
ستانسا ءوزىنىڭ بىرقاتار تەحنولوگيالىق ەرەكشەلىكتەرى مەن شەشىپ وتىرعان مىندەتتەرى تۇرعىسىنان بىرەگەي بولىپ سانالادى جانە «سامۇرىق-ەنەرگو» حولدينگىنىڭ قۋات وندىرەتىن كاسىپورىندارى قاتارىندا عانا ەمەس, رەسپۋبليكانىڭ قولدانىستاعى ەلەكتر ستانسالارى اراسىندا دا ەرەكشەلەنەدى. «شارىن وزەنىندەگى مويناق گەس»-ءى جوباسى – قازاقستانداعى جانە تمد اۋماعىنداعى سۋ قويماسىنىڭ دەڭگەيى مەن گيدرواگرەگاتتار ورنالاسقان جەردىڭ اراسىنداعى بيىكتىگى 500 مەتر بولاتىن دەريۆاتسيالىق ۇلگىدەگى العاشقى جوعارى قىسىمدى سۋ ەلەكتر ستانساسى.
مويناق گەس-ىندە الەمدەگى سۋ ەلەكتر ستانسالارى اراسىندا 1 مۆت قۋات ءوندىرۋ ءۇشىن جۇمسالاتىن سۋدىڭ شىعىنى بويىنشا ەڭ ۇزدىك كورسەتكىشتەردىڭ بىرىنە يە – سەكۋندىنا 0,25 شارشى مەتر. سالىستىرار بولساق: قازاقستانداعى ەڭ ءىرى گەس – ەرتىس وزەنىندەگى ءشۇلبى گەس-ءىنىڭ ۇلەس شىعىنى 5 م3/س/مۆت تەڭ, ال تۇركىستان وبلىسىنداعى سىرداريا وزەنىندەگى شاردارا گەس-ءنىڭ ۇلەس شىعىنى – 7,5 م3/س/مۆت. ستانسادا تەحنيكالىق كورسەتكىشتەرى مەن تيىمدىلىگى جوعارى, سوڭعى موديفيكاتسياداعى سۋ اگرەگاتتارى ورنالاستىرىلعان.
مويناق گەس-ءى حالىقارالىق ىنتىماقتاستىقتىڭ ءساتتى ۇلگىسى بولىپ تابىلادى. ستانسانىڭ نەگىزگى نىساندارىن جوبالاۋ جانە قۇرۋ قىتايدىڭ حالىقارالىق سۋ شارۋاشىلىعى جانە ەنەرگەتيكا كورپوراتسياسىنىڭ (CWE) قاتىسۋىمەن ىسكە اسىرىلدى. گەس عيماراتىندا Andritz Hydro (اۋستريا) جاساپ شىعارعان سۋ تۋربينالارى ورناتىلعان, ال سۋ گەنەراتورلارى حاربين قالاسىندا (قحر) قۇراستىرىلعان.
بۇگىندە مويناق گەس-ءى كەڭسۋ وزەنىندەگى سۋدىڭ ءبىر بولىگىن بەستوبە سۋ قويماسىنا اعىزۋ ارقىلى ستانسا ونىمدىلىگىن جىلىنا 100 ملن كۆت س ارتتىرۋدى جوسپارلاپ وتىر.
