نىساننىڭ اشىلۋ سالتاناتىندا كونتسەرتتىك باعدارلامالار ۇيىمداستىرىلدى. سونىمەن قاتار قازاقستاننىڭ حالىق ءارتيسى تۇڭعىشباي جامانقۇلوۆ, مەملەكەت جانە قوعام قايراتكەرى ورازكۇل اسانعازى, «ورتالىق قازاقستان» تۋريزم, شەبەرلەر جانە قوناق ءۇي اسسوتسياتسياسىنىڭ پرەزيدەنتى مايا اعادىلوۆا, اقىن, قازاقستاننىڭ ەڭبەك سىڭىرگەن قايراتكەرى مارالتاي رايىمبەك ۇلى جامبىل وڭىرىنە دەگەن جۇرەكجاردى قۇتتىقتاۋ سوزدەرىن جەتكىزىپ, تاراز تاريحىن تانىتۋ بارىسىنداعى جەمىستى جۇمىستاردى ايرىقشا اتاپ ءوتتى. اقىن مارالتاي رايىمبەك ۇلى كوپشىلىككە تاراز تۋرالى ولەڭىن وقىپ بەردى.
پايدالانۋعا بەرىلگەن جاڭا امفيتەاتردىڭ سىيىمدىلىعى 1000 ادام. اشىق اسپان استىنداعى ساحنادا الداعى ۋاقىتتا حالىقارالىق بايقاۋلار, كونكۋرستار, باسقا دا ونەر بايگەلەرى جانە مەرەكەلىك كەشتەر وتەتىن بولادى. نىساننىڭ قۇرىلىسىن جۇرگىزگەن باس مەردىگەر – «جاڭا ارنا 2002» جاۋاپكەرشىلىگى شەكتەۋلى سەرىكتەستىگى. ايتا كەتەيىك, ساحنا قۇرىلىسىنىڭ جالپى اۋماعى 2000 شارشى مەتردى قۇرايدى. ساحنانىڭ جەردەن بيىكتىگى 1 مەتر 20 سانتيمەتر. ۇزىندىعى 32 مەتر بولسا, بيىكتىگى 7 مەتردەن اسادى. مۇنداي امفيتەاتر ەلىمىزدە بۇعان دەيىن نۇر-سۇلتان, الماتى, اقتاۋ قالالارىندا بولسا, ەندى تاريحي تاراز شاھارىنداعى جاڭا كەشەندە بوي كوتەرىپ وتىر.
