شاراعا كوميتەت مۇشەلەرى, يندۋستريا جانە ينفراقۇرىلىمدىق دامۋ مينيسترلىگىنىڭ, قازاقستاننىڭ قۇرىلىس سالۋشىلار قاۋىمداستىعىنىڭ باسشىلىعى, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ, سالالىق مەكەمەلەردىڭ, تۇرعىن ءۇي قۇرىلىس جيناق بانكىنىڭ جانە «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىستى.
كوميتەت توراعاسى سەرىك جاقسىبەكوۆ ءوز سوزىندە جوبالىق-سمەتالىق قۇجاتتار ساراپتاماسىنىڭ ساپاسىن تومەندەتۋگە, ەلىمىزدىڭ قالالارىندا الەۋمەتتىك نىسانداردى سالۋ ءۇشىن بىرىڭعاي جوبالاردى پايدالانۋعا, نىسانداردى جوبالاۋدىڭ قىمباتتاۋىنا قاتىستى ماسەلەلەردى سەناتورلار بىرنەشە مارتە قاراعانىن جانە كوتەرگەنىن اتاپ ءوتتى.
«ەلىمىزدىڭ جالپى ىشكى ونىمىندەگى قۇرىلىستىڭ ۇلەسى وتكەن جىلى 5,3 پايىزدى قۇرادى, ورىندالعان قۇرىلىس جۇمىستارىنىڭ كولەمى – 3 862 995 ملرد.تەڭگە, قۇرىلىس ۇيىمدارىنىڭ سانى 7 654 بولدى. وسىعان وراي, قۇرىلىس جانە تۇرعىن ءۇي-كوممۋنالدىق شارۋاشىلىق سالاسىنداعى وزەكتى ماسەلەلەردى تالقىلاۋ جانە ولاردى شەشۋ جولدارىن تابۋ ەلىمىزدىڭ الەۋمەتتىك-ەكونوميكالىق مىندەتتەرىنە قول جەتكىزۋگە ەلەۋلى ۇلەس قوسۋعا مۇمكىندىك بەرەتىنىنە سەنىمدىمىن» دەپ تولىقتىردى س.جاقسىبەكوۆ.
كەزدەسۋدە يندۋستريا جانە ينفراقۇرىلىمدىق دامۋ ءمينيسترىنىڭ ءبىرىنشى ورىنباسارى قايىربەك وسكەنباەۆ بايانداما جاسادى. ول 2020 جىلى مەملەكەتتىك قوردان بەرىلەتىن تۇرعىن ۇيگە كەزەگىنە تۇرعانداردىڭ ەسەبىن ورتالىقتاندىرىپ جۇرگىزۋگە جانە باقىلاۋعا كومەكتەسەتىن سەرۆيستىك باعدارلامالىق ءونىمنىڭ ىسكە قوسىلاتىنى تۋرالى ايتتى.
شارا بارىسىندا قازاقستان قۇرىلىس سالۋشىلار قاۋىمداستىعىنىڭ اتقارۋشى ديرەكتورى ۆلاديمير بوريسوۆ تۇرعىن ءۇي قۇرىلىسىنا ۇلەستىك قاتىسۋ تۋرالى زاڭدى بۇزۋشىلاردىڭ جۇمىس ىڭعايىمەن تانىستىرىپ, نۇر-سۇلتان جانە الماتى قالالارىنداعى سونداي كومپانيالاردىڭ قارا ءتىزىمىن اتادى. «بۇل كومپانيالار ءۇيدىڭ قاڭقاسى تۇرعىزىلعانعا دەيىن ساتىلىمدى جارنامالايدى, كەيىننەن اقشانى تارتۋ ءۇشىن جەرگىلىكتى بيلىكتىڭ رۇقساتىنسىز پاتەرلەردى ساتادى. اكىمشىلىك ايىپپۇلداردى تولەگەننەن كەيىن ءۇيدى پايدالانۋعا قابىلداۋ قاجەت. سوڭىندا بۇل جوسىقسىز كومپانيالار الدىن الا برونداۋ شارتىن پاتەردى ساتىپ الۋ-ساتۋ شارتىنا قايتا راسىمدەيدى» دەدى ۆ.بوريسوۆ.
«قازاقستان رەسپۋبليكاسى جوبالاۋشىلارىنىڭ ۇلتتىق قاۋىمداستىعى» زتب ۆيتسە-پرەزيدەنتى سەرىك رۇستەمبەكوۆ وتاندىق وندىرۋشىلەر ماسەلەسىن كوتەرە وتىرىپ, مەملەكەتتىك جانە كوممەرتسيالىق قۇرىلىس نىساندارىنىڭ جوبالارىندا وتاندىق ماتەريالداردى يمپورتتىق ماتەريالدارعا نەگىزسىز اۋىستىرۋدىڭ جولىن كەسۋگە دەپۋتاتتاردان كومەك كورسەتۋدى سۇرادى.
كوميتەت توراعاسى سەرىك جاقسىبەكوۆ كەزدەسۋدى قورىتىندىلاي كەلىپ, تالقىلاۋ ناتيجەسى بويىنشا ازىرلەنگەن ۇسىنىستار زاڭ شىعارۋ جۇمىسى بارىسىندا ەسكەرىلەتىنىن اتاپ ءوتتى.
