«رۋحانيات جانە تاريحتانۋ» ورتالىعى قازاقستاننىڭ حالىق جازۋشىسى شەرحان مۇرتازا اتىمەن اتالادى. اتالعان ورتالىقتا بۇگىندە جامبىل وڭىرىنە قاتىستى رۋحاني قۇندىلىقتار, تاريحي تانىمدار, سالت-ءداستۇر, جورالعىلارىمىزدىڭ ءبارى كورىنىس تاپقان. الداعى ۋاقىتتا ورتالىقتا جەرگىلىكتى ايتىسكەرلەر مەن جازبا اقىنداردى, جالپى قالامگەرلەردى قولداۋ بويىنشا شارالار تۇراقتى تۇردە ۇيىمداستىرىلاتىن بولادى. اتالعان ورتالىققا شەرحان مۇرتازانىڭ ەسىمىن بەرۋ ۇسىنىلىپ, بۇل ۇسىنىس رەسپۋبليكالىق ونوماستيكالىق كوميسسيادان قولداۋ تاپتى. بۇگىنگى تاڭدا ۇكىمەت قاۋلىسىنىڭ جوباسى دايىندالۋدا ەكەن. بۇل ورايدا شىعىستىق ساۋلەت ۇلگىسىندە سالىنعان عيماراتتىڭ كىرەبەرىسىندە شەرحان مۇرتازانىڭ گورەلەف ءمۇسىنى ورناتىلعان. عيمارات ەكى قاباتتان تۇرادى. نىساننىڭ ءبىرىنشى قاباتىندا ۇلكەن جانە كىشى ءماجىلىس زالدارى بار. مۇندا زيالى قاۋىم وكىلدەرى مەن بۇقارالىق اقپارات قۇرالدارى, قوعام بەلسەندىلەرى, وبلىس تۇرعىندارى مەن قوناقتارى باس قوساتىن بولادى.
سونداي-اق ءبىرىنشى قاباتتا جاڭا اشىلعان امفيتەاتردا ءوز ونەرىن حالىق نازارىنا ۇسىناتىن ونەرپازداردىڭ گريم بولمەلەرى دە ورنالاسقان. ال, ورتالىقتىڭ ەكىنشى قاباتىنداعى ۇلكەن حولدا شەرحان مۇرتازانىڭ شىعارماشىلىعىنا ارنالىپ كومپوزيتسيا جاسالعان. كومپوزيتسيانىڭ استىندا ايگىلى قالامگەر وتىرعان ەكى كرەسلو مەن جۋرنال ستولى قويىلعان. حولدىڭ ەكى جاق قابىرعالارىنداعى كورمە سورەلەرىندە جازۋشىنىڭ كوزى تىرىسىندە وبلىستىق كىتاپحاناعا سىيعا تارتقان زاتتارى كوپشىلىك نازارىنا ۇسىنىلدى. مۇندا جازۋشى پايدالانعان جازۋ ماشينكاسى, سۋۆەنيرلىك قالامى, ءيىسسۋ قۇتىسى, كىلەمشەسى, شاپانى, مانتياسى, پورتفەلى, ءتىپتى جەكە «كيەۆ» فوتواپپاراتى, ءتۇرلى ماراپاتتارى, كۋالىكتەرى جانە وزگە دە جەكە باسىنا قاتىستى قۇجاتتارى قويىلعان. ورتالىق «تاريحتانۋ جانە شەرحانتانۋ» اتتى ەكى بولىمنەن تۇرادى. «تاريحتانۋ» ءبولىمى نەگىزىنەن جامبىل وڭىرىندەگى ەجەلگى داۋىردەن بۇگىنگى كۇنگە دەيىنگى وتكەن تاريحىمىزدى زەرتتەپ, زەردەلەپ, ارحيۆ قۇجاتتارى جانە تاريحي جازبا دەرەككوزدەرى ارقىلى ناقتى فاكتىلەردى جيناقتاسا, «شەرحانتانۋ» ءبولىمى ادەبيەتتى, تاريحتى, ەتنوگرافيانى, اڭىز-اڭگىمەلەردى, جىر-داستانداردى جانە اقىن-جىراۋلاردىڭ ەڭبەكتەرىن جۇيەلى تۇردە زەردەلەپ, اقىن, جازۋشى, ايتىسكەر, سازگەر, تاريحشى جانە ولكەتانۋشىلاردىڭ ەڭبەكتەرىنەن التىن قور قالىپتاستىرۋدى قولعا الادى. بۇل بولىمدە سالت-ءداستۇر, حالىق اۋىز ادەبيەتى جانە ادەبي شىعارمالار, ءداستۇرلى مۋزىكا, شەرحانتانۋ شىعارماشىلىق زەرتتەۋ بولمەلەرى بىرىكتىرىلگەن. مۇندا كەلەشەكتە شەرحان مۇرتازانىڭ مۇرالارى تۋرالى اقپاراتتار توپتاستىرىلىپ, بروشيۋرا دايىنداۋ, بەينەروليكتەر ازىرلەۋ دە جوسپاردا بار.
