تۇڭعىش پرەزيدەنت – ەلباسى ن. نازارباەۆتىڭ تاپسىرماسىنا سايكەس, 2020 جىلدىڭ 1 قاڭتارىنان باستاپ ەڭبەككە قابىلەتىنەن ايىرىلۋ, اسىراۋشىسىنان ايىرىلۋ جانە جۇمىسىنان ايىرىلۋ بويىنشا جاردەماقى الاتىن 132 مىڭنان استام ازاماتقا الەۋمەتتىك تولەمدەردىڭ مولشەرى ورتا ەسەپپەن 30%-عا ارتادى.
بۇدان وزگە, كەلەسى جىلدان باستاپ ەڭبەككە قابىلەتىنەن ايىرىلۋ جانە اسىراۋشىسىنان ايرىلۋ بويىنشا الەۋمەتتىك جاردەماقى الۋشىلارعا قايتا ەسەپتەۋگە قوسىمشا رەتىندە الەۋمەتتىك تولەمدەردى 5%-عا يندەكستەۋ قاراستىرىلعان.
قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتى بويىنشا, اعىمداعى جىلدىڭ 11 ايىندا الەۋمەتتىك تولەمدەردىڭ جالپى سوماسى 178,8 ملرد تەڭگەنى قۇرادى.
«جالپى, ەلىمىزدىڭ بيۋدجەتىندەگى الەۋمەتتىك شىعىنداردىڭ ۇلەسى جىل سايىن ارتىپ كەلەدى. سالىستىرۋ ءۇشىن ايتار بولساق, 2018 جىلى بۇل ۇلەس 43% بولدى, 2019 جىلى – 45%, 2020 جىلى — 50%. بۇل ءبىزدىڭ ەل باسشىلىعىنىڭ ساياسي باعىتى الەۋمەتتىك سيپاتتا ەكەنىن, ياعني حالىقتىڭ ءال-اۋقاتىن ارتتىرۋعا باعىتتالعانىن بىلدىرەدى» دەدى ب. ساپارباەۆ.
2019 جىلعى 1 جەلتوقسانداعى جاعداي بويىنشا مىندەتتى الەۋمەتتىك ساقتاندىرۋ جۇيەسى 6,3 ملن-نان استام قازاقستاندىقتى قامتىپ وتىر, بۇل ەلىمىزدىڭ جۇمىسپەن قامتىلعان حالقىنىڭ 72%-نان استامىن قۇرايدى.
«بۇگىندە ءبىز دايىنبىز. قازاقستاندىقتاردىڭ مالىمەتتەرىن وزەكتىلەندىردىك, ستاتۋستارىن انىقتاپ, ەسەپكە الدىق, قولدانىستاعى اقپاراتتىق جۇيەلەردى كىرىكتىردىك» دەدى ب. ساپارباەۆ.
2019 جىلدىڭ 11 ايىندا جۇمىس بەرۋشىلەر ەسەبىنەن الەۋمەتتىك مەديتسنالىق ساقتاندىرۋ قورىنا 275 ملرد تەڭگەگە جۋىق قارجى ءتۇستى. جىل سايىن كەمىندە 500-700 ملرد تەڭگە جيناۋ مىندەتى جۇر.
ءمامس ەنگىزۋ ناتيجەسىندە كەلەسى جىلدان باستاپ ءبىر ساقتاندىرىلۋشىعا شىعىندارىنىڭ 57,5%-عا – 55 مىڭ تەڭگەدە 87 مىڭ تەڭگەگە دەيىن ءوسۋى كۇتىلەدى, مەديتسينالىق ينفراقۇرىلىم دامىتىلادى, مەديتسينالىق تەحنيكامەن جاراقتاندىرىلۋ دەڭگەيى 70%-دان اسادى, جوعارى تەحنولورگيالى مەديتسينالىق كومەككە قولجەتىمدىلىك مەن مەديتسينالىق قىزمەتتەر كورسەتۋ ساپاسى ارتادى.
