مەرەكەلىك شاراعا وبلىس بويىنشا 350 بالا شاقىرتۋ الدى. ولاردىڭ اراسىندا جەتىم بالالار, از قامتىلعان وتباسىنان شىققان جانە ەرەكشە كۇتىمدى قاجەت ەتەتىن بالالار بار. شارا ينتەراكتيۆتى شوۋ-قويىلىم تۇرىندە ءوتىپ, وعان بالالاردىڭ ءبارى قاتىستى.
- بۇگىندە ەلىمىزدىڭ بارلىق قالالارىندا جاڭاجىلدىق ەرتەڭگىلىكتەر ءوتىپ جاتىر. اتىراۋداعى بۇل شارا ەستەرىڭىزدە قالادى دەگەن ويدامىن. بارشاڭىزعا مەرەكەلىك كوڭىل كۇي, ارماندارىڭىزدىڭ ورىندالۋىن تىلەيمىن. بولاشاقتا ەلىمىزدىڭ ناعىز پاتريوتتارى بولۋ ءۇشىن ساباقتارىڭىزدى جاقسى وقىپ, ماقساتتارىڭىزعا جەتىڭىزدەر. بىزدە وعان قاجەت بارلىق جاعداي بار. جاڭا مەكتەپتەر, وقۋ ورتالىقتارى سالىنىپ جاتىر. الداعى جىلى اتىراۋدا جاستار مەن وقۋشىلار سارايى اشىلادى. ول ءار بالانىڭ قاجەت ءبىلىم مەن داعدىنى مەڭگەرۋىنە مۇمكىندىك بەرەتىن ورىن بولادى, - دەدى وبلىس اكىمى.
ايماق باسشىسى ەل بولاشاعى جاستارعا مەملەكەت تاراپىنان ايرىقشا كوڭىل ءبولىنىپ وتىرعانىن اتاپ ءوتتى. 2019 جىلدى ەلباسى جاستار جىلى دەپ جاريالادى. كوپتەگەن ماڭىزدى شارالار ۇيىمداستىرىلدى.
جاڭاجىلدىق مەرەكەلىك باعدارلاما تەاترلاندىرىلعان قويىلىممەن, شىرشا جانىنداعى ءداستۇرلى حورمەن جالعاستى. ال, ەڭ ەرەكشەسى - سىيلىقتار بولدى. وبلىس اكىمى ماحامبەت دوسمۇحامبەتوۆ بالالارعا جاڭاجىلدىق تاتتىلەر مەن بىلىمدەرىن جەتىلدىرۋگە كومەكتەسەتىن پلانشەت سىيلادى.
اتىراۋ وبلىستىق ءبىلىم بەرۋ باسقارماسى باسشىسىنىڭ مىندەتىن اتقارۋشى جانسۇلۋ تورەمۇراتوۆا بۇل سىيلىقتىڭ بالالارعا مەكتەپتە كومەكشى قۇرال بولاتىنىن ايتادى. پلانشەتكە بارلىق وقۋ باعدارلاماسى جۇكتەلگەن, ينتەرنەتكە قوسىلماي-اق اقپارات الۋعا بولادى.
جاڭاجىلدىق مەرەكەلىك قويىلىم ەرتەگى كەيىپكەرلەرىمەن سۋرەتكە تۇسۋمەن اياقتالدى. بالالارعا بۇل ناعىز ەرتەگىدەي اسەر سىيلادى.
