قازاقستان رەسپۋبليكاسىنىڭ برازيليالىق دجيۋ-دجيتسۋ جانە گرەپپلينگ فەدەراتسياسى جانە بىرقاتار دەمەۋشىلەردىڭ قولداۋىمەن «رۋحاني جاڭعىرۋ» باعدارلاماسى اياسىندا ۇيىمداستىرىلعان ايتۋلى شاراعا وسى سپورت ءتۇرىن سەرىك ەتكەن جاس ورەندەر, الماتى قالاسى مەن وبلىسى اۋماعىندا ورنالاسقان بالالار ءۇيىنىڭ تاربيەلەنۋشىلەرى, بەلگىلى قوعام قايراتكەرلەرى مەن سپورت فۋنكتسيونەرلەرى جانە بىلىكتى باپكەرلەر مەن مايتالمان ماماندار قاتىستى.
– ءبىزدىڭ فەدەراتسيا قايىرىمدىلىق ءىس-شارالاردان ەشۋاقىتتا تىس قالعان ەمەس. ماسەلەن, الماتى قالاسىنداعى №1 بالالار ۇيىندە دجيۋ-دجيتسۋ زالىن اشىپ, قاجەتتى قۇرالدارمەن جابىقتادىق. جاتتىعۋ پروتسەسسىن ساپالى جۇرگىزۋ ءۇشىن ارنايى مامان تاعايىندادىق. قازىرگى كەزدە ءبىر توپ بالالار سول ۇيىرمەلەردە تەگىن جاتتىعۋدا. الماتىنىڭ ىرگەسىندەگى باعاناشىل اۋىلىندا ورنالاسقان بالالار ۇيىنە دە كومەكتەسىپ تۇرامىز. سول جەرلەردە جاتتىعاتىن ۇل-قىزدار فەدەراتسيا ەسەبىنەن رەسپۋبليكالىق جانە جارىستارعا شىعىپ تۇرادى. ال بۇگىن دەمەۋشىلەردىڭ قولداۋىمەن ءوتكەن شارا بارىسىندا ءبىز 2019 جىلدى قورىتىندىلاپ, جاس ورەندەر اراسىنان ۇزدىكتەردى ماراپاتتادىق. سونىمەن قاتار, بالالار ءۇيىنىڭ تاريبەلەنۋشىلەرىنە سىي-سياپات جاسادىق, – دەيدى قازاقستان رەسپۋبليكاسىنىڭ برازيليالىق دجيۋ-دجيتسۋ جانە گرەپپلينگ فەدەراتسياسىنىڭ ۆيتسە-پرەزيدەنتى اقمارال قاناتباەۆا.
