ۇكىمەت • 20 جەلتوقسان، 2019

پارلامەنت سەناتى تەمىرجول كولىگى ماسەلەلەرى جونىندەگى زاڭ جوباسىن ماقۇلدادى

16 رەت كورسەتىلدى

بۇل قۇجات سالاداعى 3 نەگىزگى ماسەلەنى شەشۋگە باعىتتالعان. ءبىرىنشىسى – جولاۋشىلار تاسىمالىن سۋبسيديالاۋدى وڭتايلاندىرۋ جانە اشىق ەتۋ. ەكىنشىسى – جاسىرىن جۇك ءترانزيتىنىڭ الدىن الۋ. ءۇشىنشى ماسەلە – تۇتىنۋشىلار قۇقىعىن قورعاۋدى ەسەپكە الا وتىرىپ، كىرمە جولداردىڭ قىزمەتىن رەتتەۋ. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

مەملەكەت باسشىسىنىڭ جولداۋىن ىسكە اسىرۋ ماقساتىندا ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تەمىرجول كولىگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى 2019 جىلعى 20 جەلتوقساندا پارلامەنت سەناتىندا ءبىرىنشى وقىلىمدا ماقۇلداندى.  

زاڭ جوباسىنىڭ ءبىرىنشى باعىتى (جولاۋشىلار تاسىمالىن سۋبسيديالاۋدى وڭتايلاندىرۋ جانە اشىق ەتۋ) بويىنشا جولاۋشىلار قوزعالىسىندا لوكوموتيۆتىك تارتىمنىڭ جەكە وپەراتورىن قۇرۋ جوسپارلانعان. بيۋدجەتتەن قوسىمشا قاراجات قاراستىرماي-اق، كروسس سۋبسيديالاۋدان باس تارتۋ ءۇشىن جولاۋشىلار تاسىمالداۋشىلارىن قولداۋعا جۇك تاسىمالداۋشىنىڭ تەڭگەرىمدەۋشى تولەمى ەنگىزىلەدى. بۇل جولاۋشىلار تاسىمالىنىڭ ناقتى شىعىندارىن كورۋگە مۇمكىندىك بەرەدى. اتالمىش نورما جاڭا مەحانيزمدى پىسىقتاۋ ءۇشىن تەك ءبىر جىل، ياعني 2020 جىلى ىسكە اسىرىلادى. وزگەرىستەر ناتيجەسىندە مەملەكەتتىك سۋبسيديانى تاراتۋ اشىقتىعى ارتا تۇسەدى. وسىلايشا، جولاۋشىلار تاسىمالىن سۋبسيديالاۋ مەحانيزمى بىرىڭعاي ستاندارتقا كەلتىرىلەدى.

ەكىنشى باعىت (جۇكتەردىڭ جاسىرىن ءترانزيتىنىڭ الدىن الۋ) بويىنشا جۇك تاسىمالداۋ كەزىندە ىشكى (يمپورتتىق/ەكسپورتتىق) جانە ترانزيتتىك تاريفتەر بار. ترانزيتتىك تاريف ىشكى تاريفتەردەن 4 ەسە جوعارى بولعاندىقتان، كاسىپكەرلەر يمپورتتىق-ەكسپورتتىق تارتىپتە جۇك تاسىمالداۋ ارقىلى جاسىرىن ترانزيت سحەماسىن قولدانادى. وسىنداي ءتاسىلدىڭ سەبەبىنەن «قازاقستان تەمىر جولى» جىل سايىن 16 ملرد. تەڭگەگە جۋىق كىرىستەن قاعىلىپ وتىر. سوعان بايلانىستى ءجۇرۋ جولىندا تيەپ ءتۇسىرۋدى جانە كولىك ءتۇرىن اۋىستىرۋ ءراسىمىن قامتيتىن «جۇك ءترانزيتى» ۇعىمى ەنگىزىلەدى.

ءۇشىنشى باعىت بويىنشا، قازىرگى ۋاقىتتا كىرمە جولداردى بولشەكتەپ الۋ جاعدايى ورىن الىپ وتىر. ياعني، ءىرى مەنشىك يەلەرى جەكە بولىكتەردى ساتۋ ارقىلى ءبىر كىرمە جولدى بىرنەشە بولىككە بولەدى. جانە جاڭا تارماق يەلەرىنە جەڭىلدەتىلگەن تارتىپتە كورسەتىلەتىن قىزمەتتەر ءۇشىن جوعارى تاريف بەكىتەدى. سونداي-اق ۆاگونداردىڭ باعىتتامالى بۇرمالار ارقىلى ءجۇرىپ وتكەنى ءۇشىن جەكە تولەم الۋ وقيعالارى كەزدەسەدى.

سوندىقتان كىرمە جولدار قىزمەتتەرىن تۇتىنۋشىلارىنىڭ قۇقىقتارىن قورعاۋ ءۇشىن زاڭ جوباسىمەن كەلەسى نورمالار قاراستىرىلعان:

1) كىرمە جولداردى ساتۋ جانە ساتىپ الۋ شارتتارىن تابيعي مونوپوليا سالاسىنداعى ۋاكىلەتتى ورگانمەن كەلىسۋ;

2) قايتادان ساتىپ الىنعان جولدارعا جاڭا تاريفتەر بەكىتۋ;

3) تەك تۇتىنۋشىعا دەيىنگى كىرمە جولدىڭ قاشىقتىعىنا تولەم الۋ;

4) باعىتتامالى بۇرما ارقىلى اقىسىز ءجۇرىپ ءوتۋدى رەگلامەنتتەۋ.

زاڭ جوباسىن پارلامەنت ماجىلىسىندە كەلىسۋ بارىسىندا دەپۋتاتتار جول ءجۇرۋ بيلەتتەرىن زاڭسىز ساتۋ، قايتا ساتقانى ءۇشىن جاۋاپكەرشىلىككە تارتۋ، سونداي-اق قۇرىلىس جوبالارىن مەكەمەدەن تىس كەشەندى ساراپتاما جاساۋ ماسەلەلەرى بويىنشا تۇزەتۋلەر ەنگىزدى. ونىڭ ىشىندە، جەكە جانە زاڭدى تۇلعالارعا جول ءجۇرۋ قۇجاتتارىن زاڭسىز ساتۋ، قايتا ساتۋ ءۇشىن اكىمشىلىك جاۋاپكەرشىلىك قايتا ەنگىزىلىپ، ايىپپۇل مولشەرى 100-دەن 500 ايلىق ەسەپتىك كورسەتكىشكە دەيىن ۇلعايتىلدى.

سوڭعى جاڭالىقتار

ۇقساس جاڭالىقتار