ەكى كۇندىك فورۋم جۇمىسىندا ەلىمىزدەگى مۋزەيلەردىڭ قازىرگى الەمدەگى وزگەرمەلى جاعدايلارعا بەيىمدەلۋى مەن مۋزەيلەر الەۋەتىن ءتيىمدى پايدالانۋى تالقىلاندى. «الىس جانە جاقىن شەتەلدەردىڭ مۋزەي ءىسىن دامىتۋداعى تاجىريبەلەرى», «قازاقستان مۋزەيلەرى: ماسەلەلەر مەن شەشۋ جولدارى» تاقىرىپتارىندا پانەلدىك وتىرىستار ۇيىمداستىرىلىپ, وتاندىق ماماندار مەن تۇركيا, گرەكيا, سولتۇستىك ماكەدونيا, مالايزيا, تاتارستان, وزبەكستان ەلدەرىنەن كەلگەن مۋزەي باسشىلارى مەن ماماندارى باياندامالار جاسادى.
فورۋم جۇمىسىنىڭ اياسىندا «التىن ادامنىڭ الەم مۋزەيلەرىنە شەرۋى» مۋزەي جوباسى قورىتىندىلانىپ, شەتەلدىك ساراپشىلاردىڭ قاتىسۋىمەن ءباسپاسوز ءماسليحاتى ءوتتى.
ۇلتتىق مۋزەي ديرەكتورىنىڭ ورىنباسارى اباي ساتىبالدين «التىن ادامنىڭ» ءۇش جىلدىڭ ىشىندە تاياۋ جانە الىس شەتەلدىڭ 12 ەلىندە كورمەگە قويىلعانىن, ونى 1 ميلليوننان استام شەتەلدىكتەردىڭ تاماشالاعانىن باياندادى. ونىڭ ايتۋىنشا, ۇلتتىق مۋزەي بۇل جوبانى 2017 جىلى «رۋحاني جاڭعىرۋ» باعدارلاماسى اياسىندا جۇزەگە اسىرا باستاعان.
ءباسپاسوز ءماسليحاتىندا الەمنىڭ جەتەكشى مۋزەيلەرىنىڭ باسشىلارى ءسوز سويلەپ, جوبا تۋرالى ءوز ويلارىمەن ءبولىستى. «بۇل جادىگەردىڭ تانىستىرىلىمى وزبەكستاندا ۇلكەن قىزىعۋشىلىق تۋعىزدى. « ۇلى دالا» اتاۋىمەن وتكەن كورمەگە ءبىر ايدىڭ ىشىندە 10 مىڭنان استام كورەرمەن كەلدى», دەدى وزبەكستاننىڭ مەملەكەتتىك ونەر مۋزەيىنىڭ ديرەكتورى ۆاسيلا فايزيەۆا. ال قازان كرەملى (تاتارستان رەسپۋبليكاسى) يسلام مادەنيەتى مۋزەيىنىڭ مەڭگەرۋشىسى يلنۋر نيزاميەۆ «التىن ادامنىڭ» تەك قازاق حالقىنىڭ ەمەس, بۇكىل ادامزاتتىڭ مۇراسى ەكەنىنە توقتالىپ, ودان ەجەلگى ادامداردىڭ كوشپەلى ءومىرىنىڭ تولىق تسيكلىن كورۋگە بولاتىنىن اتاپ ءوتتى. ي.نيزاميەۆتىڭ سوزىنشە, تاتارستانداعى كورمەگە 4 مىڭ ادام بارعان. جيىندا مالايزيا مۋزەيلەر دەپارتامەنتىنىڭ كۋراتورى ماستۋرا بينتي موحد ساح, افينا ەپيگرافيالىق مۋزەيى ديرەكتورىنىڭ ورىنباسارى يوننا ۆەنيەري, انادولى وركەنيەتتەرى مۋزەيىنىڭ ديرەكتورى يۋسۋف كيراچ ءسوز سويلەدى. سونداي-اق شارادا ەسىك «التىن ادامىن» تاپقان, ۇلتتىق ارحەولوگتار مەكتەبىنىڭ نەگىزىن قالاۋشىلاردىڭ ءبىرى كەمال اقىشەۆتىڭ تۋعانىنا 95 جىل تولۋىنا وراي دايىندالعان دەرەكتى فيلم كورسەتىلدى.
ۇلتتىق مۋزەي وتكىزگەن ۇلكەن فورۋم اياسىندا شىعىس قازاقستان وبلىستىق تاريحي-ولكەتانۋ مۋزەيى «قازاق التايىنىڭ قازىنالارى» اتتى كورمەسىن اشتى. كورمەگە شىعىس قازاقستان وبلىسى, تارباعاتاي اۋدانىندا زەينوللا ساماشەۆ 2018-2019 جىلدارى باسقارعان ارحەولوگيالىق ەكسپەديتسيانىڭ تابىسى – ەجەلگى ساق مادەنيەتىنىڭ التىن بۇيىمدارى قويىلدى. «ەلەكە سازى» قورعاندارىنان تابىلعان ارحەولوگيالىق ولجالار ب.ە.ب VIII-VII عاسىرلارعا جاتادى. كورمەگە تۇڭعىش رەت «ەلەكە سازى» قورعانىنان تابىلعان جەتىنشى التىن ادامنىڭ عىلىمي رەكونسترۋكتسياسى قويىلدى.
