سالتاناتتى شارا بارىسىندا ءسوز سويلەگەن قالا اكىمىنىڭ ورىنباسارى باقتيار ماكەن جاستار جىلىندا اتقارىلعان جوبالاردى اتاپ ءوتتى.
«بيىل مەملەكەت تاراپىنان جاستارعا جوعارى دەڭگەيدە كوڭىل ءبولىندى. ولاردىڭ ءبىلىم الۋىنا, جۇمىس ىستەۋىنە, ءوزىن دامىتۋىنا ارنالعان جوبالار جۇزەگە اسىرىلۋدا. اكىمدىكتىڭ ۇيىتقى بولۋىمەن جاستار جىلىنىڭ جول كارتاسى بويىنشا 136 جوبا اياسىندا 600-دەن استام ءىس-شارا وتكىزىلدى. بۇگىنگى بالل – نۇر-سۇلتان قالاسى جاستارىنىڭ بارشا ساناتىن ءبىر اۋەن, ءبىر يدەيا اياسىنا جينايتىن, جاستارىمىز اسىعا كۇتەتىن جىلدىڭ قورىتىندى شارالارىنىڭ ءبىرى. بيىل جاستار بالى الەمنىڭ 9 مەملەكەتىنىڭ بەلسەندى جاستارىنىڭ قاتىسۋىمەن حالىقارالىق دەڭگەيدە ۇيىمداستىرىلىپ وتىر», دەدى ول.
سونداي-اق اكىم ورىنباسارى تاۋەلسىزدىك كۇنىنە قارسى جاستارعا پاتەر تابىستالعانىن دا تىلگە تيەك ەتتى.
«14 جەلتوقساندا قازاقستان رەسپۋبليكاسىنىڭ تاۋەلسىزدىك كۇنى قارساڭىندا جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي بەرۋ باعدارلاماسى ىسكە اسىرىلدى. ونىڭ ناتيجەسى بويىنشا قالانىڭ جۇمىس ىستەيتىن جاستارىنا 1050 پاتەر تابىستالدى», دەدى ب. ماكەن.
ۇيىمداستىرۋشىلاردىڭ حابارلاۋىنشا, بيىلعى قايىرىمدىلىق بالل حالىقارالىق دەڭگەيدە وتۋدە, ياعني وعان رەسەي, قىتاي, نيگەريا, تاجىكستان, وزبەكستان, قىرعىزستان, ۋكراينا, يندونەزيا جانە ۆەنەسۋەلا ەلىنىڭ وكىلدەرى قاتىسىپ جاتىر.
