اناردىڭ تۋعان جەرى – شىعىس قازاقستان وبلىسى, قوتانقاراعاي اۋدانى. اكەسى تولەگەن راحىمجانوۆ كوپ جىل مەكتەپ ديرەكتورى مىندەتىن اتقارعان ولكەگە وتە تانىمال پەدوگوگ. ماماندىعى ادەبيەتشى. كەزىندە كازگۋ-دە ءبىلىم العان. توكەڭنىڭ ديپلوم جۇمىسىنا اكادەميك مۇحتار اۋەزوۆ جەتەكشىلىك ەتكەن ءھام اسا جوعارى باعا بەرگەن. 2010 جىلى دۇنيەدەن وتكەن قالامگەردىڭ ارتىندا «تۋعان جەر سەنى جىرلايمىن», «بۋىرقانعان بۇقتىرما», «اسىل دارىن» اتتى جىر جيناقتارى جانە «ولەڭمەن ورىلگەن ءومىر» اتتى ەستەلىگى قالدى.
ادەبيەتشى-قالامگەر وتباسىندا تۋىپ, قازاقى تاربيەگە شومىلىپ وسكەن انار قارىنداسىمىز دا اكە جولىن قۋىپ ادەبيەتشى بولاماققا نيەت ەتكەنىمەن جولى بولا قويماپتى. سودان 1985 جىلى الماتى قالاسىندا كەلىپ قۇرىلىستا نەسىبەسىن ايىرىپ جۇرگەن. جەلتوقسان داۋىلى كوتەرىلگەن 16-سى كۇنى انار قىز قاسىندا سىنىپتاسى گۇلشات بار جاستارمەن بىرگە الاڭعا ەنتەلەپ جەتىپ بارماي ما. حالىق كوپ.
– ءتۇس اۋىپ قالعان كەز ەدى, - دەپ ەسكە الادى قارىنداسىمىز: – جاستار مەن ميليتسيانىڭ قاقتىعىسى باستالىپ كەتتى. اپىر-توپىردا قۇربىم گۇلشاتتان كوز جازىپ قالدىم. قولدارىندا دۋبينكالارى بار توپ جاساق جاستاردى كەرى تىقسىرعان كەزدە, مەن مۇزعا تايىپ ۇشىپ ءتۇستىم. دەرەۋ ءۇش ميليتسيا قازاق جىگىتى مەنى جۇلقىپ تۇرعىزىپ, سۇيرەپ الا جونەلدى. ء«وزىم جۇرەمىن» دەپ ايقاي سالعانىم ەسىمدە... ارادا جىلدار ءوتتى. 2010 جىلدىڭ ءبىر كۇنى جاڭاقورعاندا تۇرىپ جاتقان باياعىداعى قۇربىم گۇلشات حابارلاستى. ول «گازەتتەردە جاريالانىپ جۇرگەن سۋرەتىڭدى كوردىڭ بە؟» دەدى. «جوق, ول قانداي گازەت؟». دەرەۋ گازەتتى تاۋىپ الىپ قاراسام, ءبىر توپ ميليتسيانىڭ قورشاۋىندا ايدالىپ بارا جاتقان ءدال ءوزىم. ۇستىمدە شاقپاق پالتو. شاشىم قيىلعان, بۇيرا. ويتكەنى ەكى كۇن بۇرىن شاشىمدى قيىپ, حيميا سالدىرعانمىن. مەنى ۇستاپ الىپ كەتىپ بارا جاتقان كەزدە الاڭدا سۋرەتكە ءتۇسىرىپ الىپتى. بۇل سۋرەتتىڭ تاريحى وسى, - دەدى انار راقىمجانوۆا.
انار تولەگەنقىزى قازىر الماتى دا تۇرادى, شاعىن ساۋدا ورنى بار. جولداسى مارات بايەكەنوۆ ەكەۋى بالا-شاعاسىن ءوسىرىپ, امان-ەسەن ءجۇرىپ جاتىر.
