حانىمدار مەن مىرزالار!
قۇرمەتتى قاسىم-جومارت كەمەل ۇلى!
بارشاڭىزدى ەلىمىزدىڭ ەڭ ۇلىق مەرەكەسى – تاۋەلسىزدىك كۇنىمەن شىن جۇرەكتەن قۇتتىقتايمىن!
ءبىز – تالاي سىناقتاردى باستان وتكەرگەن حالىقپىز. دەگەنمەن, باسىنا باق دارىعان ەلمىز, قايسار بابالاردىڭ ۇرپاعىمىز. ۇلى دالا ەلى عاسىرلار بويى التايدان اتىراۋعا, الاتاۋدان ارقاعا دەيىنگى ۇلان-عايىر اتىراپتى مەكەندەگەنى جەر جۇزىنە ءمالىم.
ءبىز – اتا-بابامىز امانات ەتكەن ءۇستىرت پەن قارت كاسپيدىڭ جاعاسى, سىر مەن ەرتىستىڭ اراسىن الىپ جاتقان دارحان دالانىڭ زاڭدى مۇراگەرىمىز. قازاقتىڭ بايتاق جەرى – بابادان قالعان ەڭ اسىل قازىنا. بۇل – قازاق جەرى.
اتادان بالاعا ميراس بولعان كەڭ دالانى ساقتاپ قالۋ وڭايعا تيگەن جوق. ءباھادۇر حالقىمىز نەبىر جاۋگەرشىلىك زامانداردا ەركىندىك ءۇشىن قىلىش سەرمەپ, بودان بولعان قيىن كەزەڭدەردە بوستاندىقتى اڭساپ وتكەنى بەلگىلى. كەشەگى الاش ارىستارىنىڭ دا يگى مۇراتى – ەگەمەندىك ەدى.
ءبىز اتا-بابانىڭ اسىل ارمانىن ورىنداپ, وسىدان 28 جىل بۇرىن تاۋەلسىزدىكتىڭ ىرگەسىن بىرگە قالادىق. الەم قارتاسىندا قازاقستان دەگەن دەربەس رەسپۋبليكا, ازات ەل پايدا بولدى. ول كۇندەر وڭايعا سوققان جوق.
تاۋەلسىزدىكتىڭ قيىندىقتاردان باستالۋى ءبىزدى ۇلكەن جاۋاپكەرشىلىككە جەتەلەدى. زاۋىتتار توقتاپ, تىرشىلىك تۇرالاپ قالعانى ەل ەسىندە. سول اۋىرتپالىقتاردى بىرلىك پەن تاتۋلىقتىڭ ارقاسىندا ەڭسەردىك, مەملەكەتىمىزدى اياققا نىق تۇرعىزدىق.
ءبىز ەلدىگىمىزدى باياندى ەتىپ قانا قويماي, قازاقستاندى الەم مويىنداعان مەملەكەتكە اينالدىرا بىلدىك. ۇلتىمىزدىڭ ساعىن سىندىرىپ, باعىن تايدىرعان كۇردەلى كەزەڭدەر ارتتا قالىپ, ەلىمىزدىڭ جاڭا تاريحى – مەملەكەتتىگىمىزدىڭ جاڭا ءداۋىرى باستالدى.
تاۋەلسىزدىك – ءبىزدىڭ جولىمىزدىڭ باستاۋى عانا. 28 جىلدا تولاعاي تابىستارعا قول جەتكىزىپ, بيىك بەلەستەردى باعىندىرىپ كەلەمىز. كوزدەگەن تۇپكى ماقساتىمىز – الەمدەگى ەڭ وزىق وتىز ەلدىڭ قاتارىنا كىرۋ.
جاسالىپ جاتقان يگى جۇمىستاردىڭ ءبارى كەلەر ۇرپاق ءۇشىن ەكەنىن مەن ءاردايىم ايتىپ كەلەمىن. بابادان قالعان قاستەرلى جەرىمىزدى كوزدىڭ قاراشىعىنداي ساقتاۋ, تاۋەلسىزدىگىمىزدى تۇعىرلى ەتۋ ەندىگى كەزەكتە جاستارعا امانات!
ءبىز 1991 جىلى 16 جەلتوقساندا ارنايى زاڭ قابىلداپ, بۇكىل الەمگە قازاقستان ەندى تاۋەلسىز مەملەكەت ەكەنىن جاريالادىق. ءبارىمىز بىرگە مەملەكەتتىلىگىمىزدىڭ نەگىزىن قالادىق ءارى جاڭا ءداۋىردىڭ كۋاگەرى بولدىق.
بابالارىمىزدىڭ عاسىرلار بويعى اڭسارىن جۇزەگە اسىرۋدىڭ ۇلى قۇرمەتى ءبىزدىڭ بۋىننىڭ ۇلەسىنە تيگەنىن ماقتان تۇتامىن. ولاردىڭ ەرلىگىن, وسى ارماندى جۇزەگە اسىرۋ جولىندا جان قيعان ارقايسىسىن قۇرمەت تۇتامىز.
ءبىز وتكەندى جادىمىزدا ۇستاپ, بولاشاققا ۇمتىلا وتىرىپ, وسىدان 28 جىل بۇرىن «ماڭگىلىك ەل» قۇرۋعا باعىت الدىق. وسى جىلدار ىشىندە وزگە مەملەكەتتەر عاسىرلارىن سارپ ەتكەن جولدى ءجۇرىپ وتتىك. حالقىمىزدىڭ ىنتىماعىنىڭ ارقاسىندا قۋاتتى, تاۋەلسىز جانە وركەندەۋشى مەملەكەت قۇردىق. وسى جولدىڭ ونە بويىندا مەن ارقايسىڭىزدىڭ, ءاربىر قازاقستاندىقتىڭ ولشەۋسىز قولداۋىن سەزىندىم. بۇگىن ارقايسىڭىزعا دا ءوزىمنىڭ ريزاشىلىعىمدى جەتكىزە-
ءمىن.
تاۋەلسىزدىكتىڭ ارايلى تاڭىندا ءبىز كسرو كۇيرەگەننەن كەيىن مۇراعا قالعان اتوم قارۋىنان باس تارتتىق جانە ەڭ ءىرى يادرولىق پوليگوننىڭ ءبىرىن جاپتىق. ءبىز جاپپاي قىرىپ-جويۋ
قارۋىن جويۋدى جانە يادرولىق قارۋسىزدانۋدى جۇيەلى تۇردە جاقتاپ كەلەمىز. بۇل ءبىزدىڭ قاعيداتتى ۇستانىمى-
مىز.
ءاربىر مەملەكەت ءۇشىن شەكارانى دەليميتاتسيالاۋ مەن دەماركاتسيالاۋ ماڭىزدى ماسەلە بولىپ سانالادى. ءبىز بارلىق كورشىسىمەن شەكاراسى ناقتى ايقىندالعان الەمدەگى بىردەن-ءبىر مەملەكەتپىز.
تاۋەلسىزدىك جىلدارى ءبىز اشىق ءارى نارىقتىق ەكونوميكا قالىپتاستىردىق. قازاقستان ينۆەستيتسيا تارتۋ جونىنەن, ەكونوميكاسىنىڭ كولەمى بويىنشا ورتالىق ازيا ءوڭىرىنىڭ دارا كوشباسشىسى. ءبىزدىڭ حالىقارالىق كاپيتال سالىمدارى نارىعىنداعى بۇدان ءارى قارايعى جاعدايىمىز ىسكە قوسىلعان «استانا» حالىقارالىق قارسى ورتالىعىن نىعايتا تۇسۋگە باعىتتالعان.
ءبىز قۇرلىقتىڭ شىعىسى مەن باتىسىن جالعاعان كولىك ءدالىزىن سالۋ ارقىلى گەوساياسي الەۋەتىمىزدى ىسكە اسىردىق. ينفراقۇرىلىمدىق جانە يندۋستريالىق دامۋ باعدارلامالارىن تابىستى جۇزەگە اسىرىپ كەلەمىز. رەكوردتىق مەرزىمدە سالىنعان جاڭا استانا بولاشاققا ۇمتىلۋدىڭ سيمۆولىنا جانە ەكونوميكالىق ءوسىمنىڭ درايۆەرىنە اينالدى. قازاقستاننىڭ الەمدەگى باسەكەگە قابىلەتتى 50 مەملەكەتتىڭ قاتارىنا كىرۋى ەلىمىزدىڭ ايشىقتى تابىسى بولىپ سانالادى. وسىنىڭ ءبارى ءبىزدىڭ جەتىستىكتەرىمىزدىڭ از عانا بولىگى.
تاۋەلسىز قازاقستاندى قالىپتاستىرۋ ناتيجەسىن حالىقارالىق قوعامداستىق جوعارى باعالاپ وتىر. ءبىزدى بۇكىل الەم بىلەدى جانە قۇرمەتتەيدى. جاھاندىق باستامالارىمىز جان-جاقتى قولداۋ تابۋدا. بىتىمگەرلىك قادامدارىمىز بىرقاتار مەملەكەتارالىق قايشىلىقتى شەشۋگە جانە اسكەري قاقتىعىستى توقتاتۋعا مۇمكىندىك بەردى.
دوستار!
تاۋەلسىزدىك, بۇل – حالىقتىڭ قاناتى! وسىناۋ باعا جەتپەس تارتۋ ءاربىر حالىقتىڭ ماڭدايىنا جازىلا بەرمەيدى. ءتىپتى قولى جەتكەندەردىڭ ءبارى بىردەي وعان تابىستى يەلىك ەتە المايدى.
ءبىز 1991 جىلى قاناتىمىزدى بايلاعان شىرماۋدى ءۇزىپ, ەركىن سامعاۋعا ۇمتىلدىق. ءبىزدى داۋىلدى بورانمەن قورقىتتى. ەكونوميكالىق تۇرالاۋعا, ۇلتارالىق قاقتىعىسقا ۇشىرايدى دەپ بولجادى. وڭاي بولعان جوق.
كۇيرەۋ قاۋپىن تۋدىرعان جاھاندىق, الەمدىك ۇردىستەردىڭ تۋربۋلەنتتى اعىندارى بىزگە دە جەتتى. بىراق سۇرىقسىز بولجامدار مەن سىناقتارعا قاراماستان, بارلىعىنا توتەپ بەرىپ, نىعايا تۇستىك! جاڭا بيىكتەرگە شىعۋعا دايىنبىز!
ەرىك-جىگەر, سەنىم جانە مەملەكەت تاعدىرىنا دەگەن جاۋاپكەرشىلىك ۇلتىمىزدى بىرىكتىردى. بۇگىن ءبىز «قازاقستان – 2050» cتراتەگياسىنىڭ باستى ماقساتى – الەمدەگى ەڭ وزىق وتىز ەلدىڭ قاتارىنا قوسىلۋ جولىندا كەلەمىز.
بۇل – تاۋەلسىز قازاقستاننىڭ جارقىن جەڭىستەرى مەن تولاعاي تابىستارىنىڭ, جاڭا تاريحىنىڭ جالعاسىنا اينالارى ءسوزسىز. ول تاريحتى وركەندەپ كەلە جاتقان مەملەكەتتە تۇلەپ ۇشقان جالىندى جاستاردىڭ جازارى حاق. وسكەلەڭ ۇرپاققا اعا بۋىننىڭ ومىرلىك جانە كاسىبي مول تاجىريبەسى سەپتىگىن تيگىزەدى دەپ سەنەمىن.
الدىڭعى بۋىننىڭ وكىلى رەتىندە مەنىڭ جاستارعا ايتار تىلەگىم بار. ءبىز سەندەر جاقسى ءومىر ءسۇرۋ ءۇشىن بارلىق جاعدايدى جاسادىق. سوندىقتان تەك قانا العا ۇمتىلىپ, بيىك بەلەستەردى باعىندىرىڭدار, اسقار اسۋلارعا تالپىنىڭدار. ەڭ باستىسى – ەلىمىزدە بىرلىك, بەيبىتشىلىك پەن كەلىسىمدى ساقتاي بىلىڭدەر. بۇل – ءبىزدىڭ تاۋەلسىزدىگىمىزدىڭ باستى جەتىستىگى جانە الداعى جەڭىستەرىمىزدىڭ كەپىلى.
قادىرلى قاۋىم!
مەن وتىز جىل بويى جاس ۇرپاقتىڭ جارقىن بولاشاعى مەن ەل مۇددەسى جولىندا ادال قىزمەت ەتكەنىمدى ماقتان تۇتامىن. بۇل – ۇلكەن مارتەبە, زور باقىت.
ەلىم ءۇشىن, حالقىم ءۇشىن, تاۋەلسىز قازاقستانىم ءۇشىن تاريحتىڭ قاي سىناعىنا دا تاۋەكەل دەپ باس تىگۋگە دايىن تۇردىم. مەملەكەتتىلىك پەن تاۋەلسىزدىك سياقتى قاستەرلى قۇندىلىقتاردى ساقتاۋعا تىرىستىم. بار كۇش-قايراتىمدى تۋعان ەلىمنىڭ ەڭسەسىن بيىك ۇستاۋعا ارنادىم. ارتىمدا ارقاسۇيەر حالقىمنىڭ تۇرعانى بارلىق سىناقتاردان سۇرىنبەي وتۋىمە ۇيىتقى بولدى. ەگەمەندىكتىڭ العاشقى ساتتەرىنەن باستاپ وتانىمىزدى وركەندەتۋگە, ەلدىگىمىزدى نىعايتۋعا زور ۇلەس قوسقان, زاماننىڭ اۋىر جۇگىن بىرگە كوتەرگەن بارشا قازاقستان جۇرتشىلىعىنا شىنايى العىسىمدى بىلدىرەمىن.
ءبىزدىڭ بۋىن ءداۋىر مەن ءداۋىر, عاسىر مەن عاسىر الماسىپ, زامان وزگەرىپ جاتقان تۇسقا تۋرا كەلدى. وسىناۋ كۇردەلى كەزەڭدە حالقىمىزدىڭ بەيبىت تە بەرەكەلى عۇمىر كەشۋى باستى جەتىستىك دەپ سانايمىن. ەندىگى كەزەكتە وسى تابىستاردى ەسەلەي ءتۇسۋ ماڭىزدى.
ەل كونستيتۋتسياسىنا ساي جاڭا پرەزيدەنت سايلاندى. بۇل – تاريحي كەزەڭ. جاڭا ەل باسىنىڭ العاشقى قادامدارى وڭاي بولمايدى. ەلىمىز وركەندەۋ جولىندا ىركىلمەي ءوسىپ-ونە بەرۋى ءۇشىن بارلىعىمىز پرەزيدەنت قاسىم-جومارت كەمەل ۇلى توقاەۆتى قولداپ, ونىمەن بىرگە بولۋىمىز كەرەك.
ءبىز بيلىك ساباقتاستىعىن ساقتاي وتىرىپ, ستراتەگيالىق باعىت-باعداردان اۋىتقىماۋعا ءتيىسپىز. سەبەبى ءبىزدىڭ ويىمىز دا ءبىر, مۇرات-ماقساتىمىز دا ورتاق. ول – قازاقستاننىڭ تاۋەلسىزدىگىن نىعايتۋ, ەلىمىزدى ماڭگىلىك ەتۋ.
ءابىش كەكىلباي ۇلى: «تاۋەلسىزدىك – ءتاتتى ءسوز عانا ەمەس, ۇلتتىق جاۋاپكەرشىلىك», – دەگەن ەدى. ەندەشە بارشاڭىزدى تاۋەلسىزدىكتى تۇعىرلى ەتۋ جولىندا ايانباي ەڭبەك ەتۋگە شاقىرامىن. ءتول مەرەكەمىز قۇتتى بولسىن!
مەملەكەتتىگىمىز ماڭگىلىك بولسىن!
