دوڭگەلەك ۇستەلدى اشقان مەملەكەتتىك ءارحيۆتىڭ ديرەكتورى ساۋلە مالىكوۆا الدىمەن قازاقستاننىڭ تاۋەلسىزدىك جىلدارىندا اسقان بيىك بەلەستەرىنە توقتالدى. سونىڭ ىشىندە قازاقستاننىڭ قول جەتكىزگەن ساياسي-ەكونوميكالىق تابىستارى ايتىلدى. ەلىمىزدىڭ ەقىۇ-عا توراعا بولعاندىعى, ونىڭ ءسامميتىن وتكىزگەندىگى, ەحرو-2017 سياقتى دۇنيەجۇزىلىك ماڭىزى بار كورمەنى ۇيىمداستىرعاندىعى, الەمدىك اۋقىمداعى مادەني, سپورتتىق شارالاردى وتكىزگەندىگى جاس جەتكىنشەكتەرگە ۇلكەن تابىس رەتىندە جەتكىزىلدى. سونىمەن بىرگە تاۋەلسىزدىك جىلدارىندا ارحيۆ قورىنىڭ دا ماڭىزدى قۇجاتتارمەن تولىققاندىعى تىلگە تيەك ەتىلدى. «بۇل - ءبىزدىڭ تاريحشىلارىمىز بەن زەرتتەۋشىلەرىمىزدىڭ ءوز ەڭبەكتەرىن شىنايى فاكتىلەرگە سۇيەنىپ جازۋىنا جاعداي تۋعىزدى. اسىرەسە, الاش قايراتكەرلەرىنىڭ ءومىرى مەن ىستەرى جايلى تابىلعان جاڭا قۇجاتتار ولاردىڭ ءىس-ارەكەتتەرىن تەرەڭىرەك بىلۋگە مۇمكىندىك بەرەدى», دەدى ول.
مەملەكەتتىك ءارحيۆتىڭ قىزمەتكەرى زاكيرينا زامزاگۇل تاۋەلسىزدىك بەلەستەرى جونىندە تولىمدى بايانداما جاسادى. ال جەلتوقسان وقيعاسىنىڭ سەبەپتەرى مەن سالدارى تۋرالى «بىتەۋ جارا. (جەلتوقسان 1986)» اۆتورى رەتىندە وسى جولداردىڭ اۆتورى اڭگىمەلەدى.
شاراعا قاتىسقان جاستار دا ءوز ونەرلەرىن ورتاعا سالدى. سونىڭ ىشىندە ونىنشى سىنىپتىڭ وقۋشىسى مۋسادين دۋرسۋنوۆ ماعجاننىڭ «مەن جاستارعا سەنەمىن!» دەگەن ولەڭىن ناقىشىنا كەلتىرىپ وقىپ بەردى. ءوزى ورىس مەكتەبىندە وقىسا دا بۇل بالا قازاق ءتىلىن ۇيرەنۋگە دەگەن قۇلشىنىسى جوعارى ەكەنىن كورسەتتى. شارانىڭ سوڭىنان جينالعان جاستار ارحيۆ قىزمەتكەرلەرى دايىنداعان ايرىقشا قۇجاتتاردىڭ كورمەسىن تاماشالادى.
قىزىلجار
