ايتۋلى دودانىڭ ىرىكتەۋ سىنى اقتوبە قالاسىندا ءوتتى. سول سىناقتان سۇرىنبەي وتكەن الماتالىقتار مىقتىلارمەن كۇش سىناسۋ قۇرمەتىنە يە بولدى. وسىلايشا, ءتورت ۇزدىك كوماندا الاتاۋ باۋرايىنداعى اسەم شاھاردا باس قوستى. بالۋان شولاق اتىنداعى مادەنيەت جانە سپورت سارايىندا ۇيىمداستىرىلعان جارىستىڭ جارتىلاي فينالىندا شىمكەنت قالاسىنان باسىم تۇسكەن ولار اقتىق ايقاستا ماڭعىستاۋ وبلىسىنا سان سوقتىردى. ەكى رەتىندە دە 3:2 ەسەبى تىركەلدى.
ءسوز ورايى كەلگەندە, كونفەدەراتسيا كۋبوگىنىڭ جەڭىمپازى اتانعان كوماندانىڭ ساپىندا ارۋجان مۇحتار (55 كيلو), ارۋجان بارگوش (61 كيلو), الەكساندرا بۋدكينا (+61 كيلو), ديدار ءامىرالى (67 كيلو), باتىرحان قوشانوۆ (75 كيلو) جانە داۋلەت داۋلەتحان (+75 كيلو) سىندى جەكپە-جەك شەبەرلەرى ونەر كورسەتكەنىن ايتا كەتكەن ابزال.
ايتۋلى كوماندانىڭ اعا جاتتىقتىرۋشىسى اسقار مولداعاليدىڭ ايتۋىنشا, الماتى قالاسىندا سپورتتىڭ وسى ءتۇرى بويىنشا جەڭىسپەن ورىلگەن باي ءداستۇر بار. ۇزاق جىلدار بويى جەرلەستەرىمىز كوپتەگەن بايراقتى باسەكەلەردە تولاعاي تابىستارعا قول جەتكىزىپ ءجۇر. بۇگىنگى تاڭدا دا سول ءداستۇر جالعاسىن تابۋدا. الماتىلاقتاردىڭ كونفەدەراتسيا كۋبوگىندا توپ جارۋى وسىنىڭ ايقىن دالەلى. جانە دە قالا اكىمدىگى مەن سپورت باسقارماسىنىڭ كاراتەگە دەگەن ىقىلاسى ەرەكشە ەكەنىن دە اتاپ وتكەن ءجون. ولار ۇنەمى جەكپە-جەك شەبەرلەرىنە قولداۋ كورسەتۋدە.
ءيا, الماتىدا «رۋحاني جاڭعىرۋ», «سپورتتىق الماتى», «سپورت مەنىڭ اۋلامدا» جانە تاعى باسقا باعدارلامالار مەن جوبالاردىڭ جۇزەگە اسىپ جاتقانىن وسىدان-اق انىق بايقاۋعا بولادى.
الماتى
