تاڭعى ساعات بەس كەزىندە اقتوبە قالاسىنىڭ تۇرعىنى پوليتسيا بولىمشەسىنە قوڭىراۋ شالىپ اۆتوكولىگى ۇرلانعانىن حابارلايدى. سوداڭ سوڭ وسى دەرەك بويىنشا ىزگە تۇسكەن ساقشىلار قوناەۆ كوشەسى بويىنداعى №9 ءۇيدىڭ جانىنان ءتورت جاس ازاماتتىڭ «ۆاز-2114» اۆتوكولىگىن ايداپ الىپ كەتكەنىن انىقتايدى.
ء بىراز ۋاقىتتان سوڭ كەزەكشى پاترۋل قالا سىرتىندا قارعا مالتىعىپ قالعان «ۆاز-2114»-ءتىڭ سالونىندا وتىرعانداردى قولعا تۇسىرەدى. وسى كەزدە ولار ءدال جاۋاپ بەرۋدەن جالتارىپ سىرعاقسي بەرەدى. مۇندا ءبىر گاپ بار ەكەنىن سەزگەن پاترۋلدەر ءارى-بەرىدەن كەيىن اۆتوكولىكتى ايداپ كەتكەندەر وزدەرىنىڭ ارىپتەستەرى ەكەنىن ءبىلىپ, ايراناسىر كۇيگە تۇسەدى. ياعني, بۇلار اقتوبەدەگى مامانداندىرىلعان كۇزەت باسقارماسىنىڭ قىزمەتكەرلەرى بولىپ شىعادى. از-كەم ۋاقىت سوزبەن ىرعاسىپ, تاجىكەلەسكەننەن كەيىن ۇستالعاندار پاترۋلدىك بايلانىس كەزەكشىلەرىنە وزدەرىنىڭ ارىپتەس ەكەندىكتەرىن العا تارتىپ, بوساتىپ جىبەرۋلەرىن سۇرايدى. ءارى اۆتوكولىكتى ۇرلاۋ نەمەسە توناۋ ءۇشىن ەمەس, ءجاي قىزىق كورىپ سەيىلدەپ قايتۋ ءۇشىن ايداپ كەتكەندەرىن ايتىپ اقتالادى. «بۇل جەردە ءبىز قىلمىس جاسادىق دەپ ەسەپتەمەيمىز. بار ايىبىمىز – اۋەسقويلىق سەزىمنىڭ جەتەگىندە كەتىپ قالعانىمىز. مىنە, اۆتوكولىكتى وزدەرىڭىز كورىپ تۇرسىزدار. مۇرتى دا بۇزىلعان جوق», دەپ اقتالادى تورتەۋ.
الايدا ولاردىڭ بۇل ۋاجدەرى نازارعا الىنباي, پاترۋلدىكتەر كولىك سالونىندا وتىرعانداردىڭ قولدارىنا كىسەن سالىپ, پوليتسيا بولىمشەسىنە الىپ كەتەدى. قازىرگى كۇنى اقتوبە وبلىستىق پوليتسيا دەپارتامەنتىنىڭ مەنشىكتى قاۋىپسىزدىك باسقارماسى اتالعان دەرەك بويىنشا ءتيىستى تەكسەرۋلەر جۇرگىزۋدە. ءاۆتوموبيلدى قىمقىرىپ «سەيىل» قۇرعىسى كەلگەندەردىڭ تورتەۋى دە قىزمەتتەرىنەن بوساتىلعان.
اقتوبە
